નવસારી: (Navsari) નવસારી એલ.સી.બી. પોલીસે (Police) બાતમીના આધારે જલાલપોર કોળીવાડમાં ઘરમાંથી 4.96 લાખના વિદેશી દારૂ (Alcohol) સાથે મહિલાને ઝડપી પાડી હતી. જ્યારે દારૂ ભરાવનારને વોન્ટેડ જાહેર કરી આગળની તજવીજ હાથ ધરી છે.
મળતી માહિતી મુજબ, નવસારી લોકલ ક્રાઈમ બ્રાંચ પોલીસે બાતમીના આધારે જલાલપોર કોળીવાડ ખાતે રહેતી પ્રોહી બુટલેગર જ્યોતિબેન રમેશભાઈ પટેલના ઘરે છાપો માર્યો હતો. જ્યાંથી પોલીસને 4,96,650 રૂપિયાની વિદેશી દારૂની 3463 નંગ બાટલીઓ મળી આવતા જ્યોતિબેન રમેશભાઈ પટેલને ઝડપી પાડી હતી. પોલીસે જ્યોતીબેનની પૂછપરછ કરતા વલસાડ તાલુકાના માલવણ ગામે રહેતા કલ્પેશભાઈ દુર્લભભાઈ પટેલ વિદેશી દારૂનો જથ્થો આપી ગયો હોવાનું કબુલ્યું હતું. જેથી પોલીસે કલ્પેશભાઈને વોન્ટેડ જાહેર કરી આગળની તજવીજ હાથ ધરી છે.
વિજલપોરની સોસાયટીમાં ઘરમાંથી 39 હજારના વિદેશી દારૂ સાથે મહિલા ઝડપાઈ, એક વોન્ટેડ
નવસારી : જલાલપોર પોલી બાતમીના આધારે વિજલપોર અશોકવન સોસાયટીમાં ઘરમાંથી 39 હજારના વિદેશી દારૂ સાથે મહિલાને ઝડપી પાડી હતી. જ્યારે વિદેશી દારૂનો જથ્થો આપનારને વોન્ટેડ જાહેર કરી આગળની તજવીજ હાથ ધરી છે. મળતી માહિતી મુજબ, જલાલપોર પોલીસે બાતમીના આધારે વિજલપોર અશોકવન સોસાયટીમાં રહેતા કલાબેન દિપકભાઈ ટંડેલના ઘરે છાપો માર્યો હતો. જ્યાંથી પોલીસને 39,975 રૂપિયાની વિદેશી દારૂની 311 નંગ બાટલીઓ મળી આવતા કલાબેનને ઝડપી પાડી હતી. પોલીસે કલાબેનની પૂછપરછ કરતા નાની દમણમાં રહેતા સુરેશ પટેલે વિદેશી દારૂનો જથ્થો ભરી આપ્યો હોવાનું કબુલતા પોલીસે સુરેશ પટેલને વોન્ટેડ જાહેર કર્યો હતો. પોલીસે ઘટના સ્થળેથી વિદેશી દારૂ સહીત રોકડા 840 રૂપિયા મળી કુલ્લે 40,815 રૂપિયાનો મુદ્દામાલ કબ્જે કરી આગળની તજવીજ હાથ ધરી છે.
