એન્યુઅલ પાસના નામે ચાલી રહેલા એક મોટા ફ્રોડ અંગે જાહેર જનતાને ચેતવણી આપી
ગૂગલ સર્ચમાં આવતી અજાણી જાહેરાતો પર ક્લિક નહિ કરવા અપીલ
( પ્રતિનિધિ )વડોદરા,તા.25
નેશનલ હાઈવે ઓથોરિટી ઓફ ઇન્ડિયાએ ફાસ્ટેગ એન્યુઅલ પાસના નામે ચાલી રહેલા એક મોટા ફ્રોડ અંગે જાહેર જનતાને ચેતવણી આપી છે. આ કૌભાંડમાં ઠગ અસલી જેવી જ દેખાતી નકલી વેબસાઇટ્સ બનાવીને લોકોને છેતરી રહ્યા છે. આ નકલી પોર્ટલ્સ ગૂગલ સર્ચમાં ટોપ પર દેખાય તે માટે પેઇડ એડવટાઈઝમેન્ટ અને સર્ચ એન્જિન ઓપ્ટિમાઇઝેશન જેવી યુક્તિઓનો ઉપયોગ કરવામાં આવે છે, જેના કારણે સામાન્ય યુઝર્સ આસાનીથી છેતરાઈ જાય છે.
નેશનલ હાઈવે ઓથોરિટીએ સોશિયલ મીડિયાના એક પ્લેટફોર્મ પર સ્પષ્ટ કર્યું છે કે, નાણાકીય નુકસાનથી બચવા માટે માત્ર વેરિફાઇડ ચેનલ્સનો જ ઉપયોગ કરવો જોઈએ. આ છેતરપિંડીની પદ્ધતિ વિશે વિગતવાર જણાવતાં ઓથોરિટીએ કહ્યું કે, જ્યારે યુઝર્સ આવી નકલી વેબસાઇટ્સ પર જાય છે, ત્યારે તેમની પાસેથી મોબાઇલ નંબર, વાહનનો રજિસ્ટ્રેશન નંબર અને પેમેન્ટની વિગતો જેવી સંવેદનશીલ માહિતી માંગવામાં આવે છે. પેમેન્ટ કર્યા પછી પૈસા સીધા સ્કેમર્સના ખાતામાં જાય છે, પરંતુ યુઝરને કોઈ સત્તાવાર કન્ફર્મેશન મળતું નથી. ઘણીવાર યુઝર્સને નકલી રસીદ આપી દેવામાં આવે છે, જેની હાઇવે પર કોઈ માન્યતા હોતી નથી. ગૃહ મંત્રાલયના ઇન્ડિયન સાયબર ક્રાઇમ કોઓર્ડિનેશન સેન્ટરે પણ આ બાબતે ચિંતા વ્યક્ત કરી છે કે હવે અસલી અને નકલી વેબસાઇટ વચ્ચે તફાવત પારખવો મુશ્કેલ બની રહ્યો છે. આવા સાયબર ફ્રોડથી બચવા માટે એનએચએઆઈએ કેટલીક મહત્ત્વની ઍડ્વાઇઝરી જારી કરી છે. યુઝર્સને સલાહ આપવામાં આવી છે કે ફાસ્ટેગ એન્યુઅલ પાસ જેવી સેવાઓ માટે હંમેશા સત્તાવાર રાજમાર્ગયાત્રા એપનો જ ઉપયોગ કરવો. આ ઉપરાંત, ઓનલાઇન સર્ચ કરતી વખતે સ્પોન્સર્ડ લિંક કે અજાણી જાહેરાતો પર ક્લિક કરવાનું ટાળવું જોઈએ. કોઈપણ ચૂકવણી કરતાં પહેલા વેબસાઇટનું યુઆરએલ બે વાર ચેક કરવું અને ક્યારેય પણ પોતાનો ઓટીપી, કાર્ડ ડિટેલ્સ કે લોગિન પાસવર્ડ કોઈની સાથે શેર ન કરવા. જો કોઈ વેબસાઇટ શંકાસ્પદ જણાય તો તરત જ તેને બંધ કરી દેવી હિતાવહ છે.
