રાજસ્થાનના જૈસલમેર જિલ્લામાંથી એક અત્યંત ચોંકાવનારી અને દિલ દહોળી નાખે તેવી ઘટના સામે આવી છે. અહીં એક ડંપિંગ યાર્ડ વિસ્તારમાં 500થી વધુ ગાયોની સડી ગયેલી લાશો મળતાં સમગ્ર વિસ્તારમાં ભારે હડકંપ મચી ગયો છે. ઘટનાની તસવીરો અને વિડિયો સોશિયલ મીડિયામાં વાયરલ થતાં લોકોમાં ભારે રોષ ફાટી નીકળ્યો છે.
માહિતી મુજબ, જૈસલમેરના બહારવટિયા વિસ્તારમાં આવેલા એક ડંપિંગ યાર્ડમાં મોટી સંખ્યામાં ગાયોના મૃતદેહો ફેંકવામાં આવ્યા હતા. ઘણા મૃતદેહો સડી ગયેલી હાલતમાં જોવા મળ્યા હતા, જેના કારણે આસપાસના વિસ્તારમાં ભારે દુર્ગંધ ફેલાઈ ગઈ હતી. સ્થાનિક લોકોએ જ્યારે આ ભયાનક દૃશ્ય જોયું ત્યારે તેઓ પણ હચમચી ઉઠ્યા હતા.
સ્થાનિક લોકોના જણાવ્યા અનુસાર, છેલ્લા કેટલાક દિવસોથી વિસ્તારમાં અસહ્ય દુર્ગંધ આવતી હતી. ત્યારબાદ લોકોએ તપાસ કરતાં ખુલાસો થયો કે એક વિશાળ ખાડા અને ડંપિંગ ઝોનમાં મોટી સંખ્યામાં ગાયોના મૃતદેહો પડ્યા છે. ઘણા મૃત દેહો અર્ધસડી હાલતમાં હતા જ્યારે કેટલાકના માત્ર હાડપિંજર જ બચ્યા હતા.આ ઘટના સામે આવતા જ સ્થાનિક પ્રશાસન, પશુપાલન વિભાગ અને નગરપાલિકાની ટીમો ઘટનાસ્થળે દોડી આવી હતી. અધિકારીઓએ પ્રાથમિક તપાસ શરૂ કરી છે. ગાયોના મોત કેવી રીતે થયા અને મૃતદેહોને અહીં કોણે ફેંક્યા તે મુદ્દે તપાસ હાથ ધરવામાં આવી છે.
સ્થાનિક ગૌરક્ષક સંગઠનો અને હિંદુ સંગઠનોમાં આ ઘટનાને લઈને ભારે રોષ જોવા મળી રહ્યો છે. સંગઠનોએ આરોપ લગાવ્યો કે ગાયોની યોગ્ય સંભાળ લેવામાં બેદરકારી દાખવાઈ છે અને સમગ્ર મામલે જવાબદાર લોકો સામે કડક કાર્યવાહી થવી જોઈએ. કેટલાક સંગઠનોએ આ ઘટનાને “ગૌમાતાની અવમાનના” ગણાવી હતી.ઘટનાની જાણ થતા મોટી સંખ્યામાં લોકો સ્થળ પર એકત્ર થયા હતા. પોલીસે પરિસ્થિતિ નિયંત્રણમાં રાખવા માટે સુરક્ષા વ્યવસ્થા ગોઠવી હતી. સ્થાનિક લોકોનું કહેવું છે કે જો સમયસર કાર્યવાહી કરવામાં આવી હોત તો આ સ્થિતિ ઊભી ન થઈ હોત.
પ્રાથમિક માહિતી મુજબ, કેટલીક ગાયો બીમારી કે ભૂખમરાના કારણે મરી હોવાની આશંકા વ્યક્ત કરવામાં આવી રહી છે. જોકે સત્તાવાર રીતે મોતનું ચોક્કસ કારણ હજુ સુધી જાહેર કરવામાં આવ્યું નથી. પશુચિકિત્સક ટીમ દ્વારા નમૂનાઓ લઈ તપાસ માટે મોકલવામાં આવ્યા છે.આ ઘટનાએ પશુ સંરક્ષણ અને ગૌશાળાઓની હાલત અંગે ફરી એકવાર ગંભીર પ્રશ્નો ઊભા કર્યા છે. સોશિયલ મીડિયામાં પણ લોકો દ્વારા ભારે નારાજગી વ્યક્ત કરવામાં આવી રહી છે. અનેક યુઝર્સે જવાબદાર અધિકારીઓ સામે કાર્યવાહી કરવાની માંગ કરી છે.
સ્થાનિક પ્રશાસને સમગ્ર મામલે તપાસ પૂર્ણ થયા બાદ કડક પગલાં લેવાની ખાતરી આપી છે. બીજી તરફ ગૌરક્ષક સંગઠનો દ્વારા આ મામલે વિરોધ પ્રદર્શન કરવાની ચેતવણી પણ આપવામાં આવી છે.
