વાહનોનું ભાડું ન ચૂકવ્યું અને ટ્રેક્ટર-ટ્રોલી પણ સગેવગે કરી દીધા
બે શખ્સો સામે ઉમરેઠ પોલીસ મથકે ગુનો દાખલ
આણંદ.
આણંદ જિલ્લાના ઉમરેઠ તાલુકાના લાલપુરા ગામના એક વૃદ્ધ ખેડૂત સાથે ટ્રેક્ટર અને ટ્રોલી ભાડે રાખવાના નામે લાખો રૂપિયાની છેતરપિંડી થઈ હોવાની ઘટના પ્રકાશમાં આવી છે. ખેડૂત પાસેથી વિશ્વાસમાં લઈ વાહનો ભાડે મેળવ્યા બાદ તેનું ભાડું ન ચૂકવી તેમજ વાહનો પરત ન કરી કુલ રૂપિયા 6,30,000 નો વિશ્વાસઘાત કરવા બદલ પોલીસે બે શખ્સો વિરુદ્ધ ગુનો નોંધી કાયદેસરની કાર્યવાહી હાથ ધરી છે.
પ્રાપ્ત માહિતી અનુસાર, ઉમરેઠના લાલપુરા ચેકપોસ્ટ પાસે રહેતા 60 વર્ષીય ખેડૂત સાલમભાઈ માધાભાઈ પરમારે ઉમરેઠ પોલીસ મથકે ફરિયાદ નોંધાવી છે. ફરિયાદમાં જણાવ્યા મુજબ, ખેડા જિલ્લાના ઠાસરા તાલુકાના સોમસિંહ ઉર્ફે સોમાભાઈ મંગળસિંહ ચાવડા અને ઉમરેઠના ધુળેટા ગામના ઈમરાનખાન મુસ્તફાખાન પઠાણ નામના બે શખ્સોએ ખેડૂત સાલમભાઇનો સંપર્ક કર્યો હતો. આ બંને શખ્સોએ પોતે વાહનો ભાડે અપાવવાની દલાલીનું કામ કરતા હોવાનું જણાવી સલામભાઇનું ટ્રેક્ટર અને ટ્રોલી માસિક કુલ ₹36,000ના ભાડે રાખ્યા હતા.
અલબત્ત, આ બન્ને ગઠિયાએ ખેડૂતનો વિશ્વાસ જીતીને જાન્યુઆરી 2026 માં આ વાહનો ભાડે લીધા હતા. જોકે, લાંબો સમય વીતવા છતાં નક્કી કર્યા મુજબનું ભાડું ખેડૂતને ચૂકવવામાં આવ્યું ન હતું. જ્યારે ખેડૂતે પોતાના વાહનો અને બાકી રહેલા ભાડાના પૈસાની ઉઘરાણી કરી, ત્યારે આરોપીઓએ વારંવાર વાયદાઓ કરીને સમય પસાર કર્યો હતો. અંતે ખેડૂતને શંકા જતા તપાસ કરતા જાણવા મળ્યું હતું કે બન્ને ગઠિયાએ તેમના ટ્રેક્ટર અને ટ્રોલી કોઈને વેચી દઈ અથવા અન્ય રીતે સગેવગે કરી દીધા છે. આમ, અંદાજે ₹4,50,000 ની કિંમતનું ટ્રેક્ટર, ₹30,000 ની ટ્રોલી અને બાકી ભાડાની રકમ ₹1,50,000 મળી કુલ રૂપિયા 6,30,000 ની છેતરપિંડી આચરવામાં આવી છે. ઉમરેઠ પોલીસે સાલમભાઈ પરમારની ફરિયાદના આધારે સોમસિંહ ચાવડા અને ઇમરાન પઠાણ સામે ગુનો નોંધી તપાસના ચક્રો ગતિમાન કર્યા છે. આ કેસની વધુ તપાસ પોલીસ ઇન્સ્પેક્ટર મુકેશભાઈ રામી ચલાવી રહ્યા છે.
