પેટ્રોલ-ડીઝલ ₹8 સુધી મોંઘું થતાં રાજકારણ ગરમાયું,
દેશમાં પેટ્રોલ અને ડીઝલના ભાવમાં સતત થઈ રહેલા વધારાને લઈને હવે રાજકીય માહોલ ગરમાયો છે. કોંગ્રેસ તેમજ આમ આદમી પાર્ટી (AAP)એ કેન્દ્ર સરકાર પર આકરા પ્રહાર કર્યા છે. વિરોધ પક્ષોએ આરોપ લગાવ્યો છે કે સામાન્ય જનતા પર મોંઘવારીનો વધુ બોજો લાદવામાં આવી રહ્યો છે અને ઈંધણના વધતા ભાવોથી મધ્યમવર્ગ તથા ગરીબ લોકો સૌથી વધુ પ્રભાવિત થઈ રહ્યા છે.
માહિતી મુજબ, છેલ્લા થોડા દિવસોમાં પેટ્રોલ અને ડીઝલના ભાવમાં તબક્કાવાર વધારો થયો છે. કેટલાક વિસ્તારોમાં કુલ વધારો ₹5થી ₹8 સુધી પહોંચ્યો હોવાનું જણાવવામાં આવી રહ્યું છે. તે પછી કોંગ્રેસે વડાપ્રધાન નરેન્દ્ર મોદીને નિશાન બનાવી તેમને “મહેંગાઈ મેન મોદી” કહી સંબોધ્યા હતા. કોંગ્રેસના નેતાઓએ આરોપ લગાવ્યો કે કેન્દ્ર સરકાર તેલ કંપનીઓના નફાને પ્રાથમિકતા આપી રહી છે જ્યારે સામાન્ય નાગરિકો મોંઘવારીના માર હેઠળ દબાઈ રહ્યા છે.
કોંગ્રેસના પ્રવક્તાઓએ જણાવ્યું કે લાંબા સમય સુધી ઈંધણના ભાવ સ્થિર રાખ્યા બાદ હવે એકસાથે વધારો કરીને જનતાને આર્થિક રીતે મુશ્કેલીમાં મૂકવામાં આવી રહી છે. પાર્ટીએ એવો પણ દાવો કર્યો કે મોંઘવારીને કારણે ઘરખર્ચ, પરિવહન ખર્ચ અને ખાદ્ય પદાર્થોના ભાવમાં વધુ વધારો થવાની શક્યતા છે. સાથે જ બીજી તરફ આમ આદમી પાર્ટીએ પણ કેન્દ્ર સરકારની નીતિઓને નિષ્ફળ ગણાવી હતી. AAPના નેતાઓએ આરોપ લગાવ્યો કે સરકારની વિદેશ નીતિ અને આયાત આધારિત ઊર્જા નીતિના કારણે દેશમાં ઈંધણ મોંઘું બન્યું છે. પાર્ટીએ એવો દાવો કર્યો કે ડીઝલના ભાવમાં વધારાથી ખેડૂતો પર મોટો બોજ પડશે અને આવનારા સમયમાં શાકભાજી, અનાજ તથા અન્ય આવશ્યક ચીજવસ્તુઓના ભાવ વધુ વધી શકે છે.
AAPના નેતાઓએ વધુમાં કહ્યું કે ચૂંટણી દરમિયાન ઈંધણના ભાવ નિયંત્રિત રાખવામાં આવ્યા હતા, પરંતુ હવે ધીમે ધીમે સતત વધારો કરવામાં આવી રહ્યો છે. પાર્ટીના મતે, સામાન્ય લોકો પહેલાથી જ બેરોજગારી અને મોંઘવારીથી પરેશાન છે ત્યારે પેટ્રોલ-ડીઝલના વધતા ભાવો તેમની મુશ્કેલીઓમાં વધારો કરશે.ઈંધણના વધતા ભાવોની સીધી અસર પરિવહન ક્ષેત્ર પર પણ પડી શકે છે. ટ્રાન્સપોર્ટ ખર્ચ વધતા દૈનિક જીવનમાં ઉપયોગી સામાન, દૂધ, શાકભાજી અને અન્ય ખાદ્ય વસ્તુઓના ભાવોમાં વધારો થવાની શક્યતા નિષ્ણાતો વ્યક્ત કરી રહ્યા છે. ખાસ કરીને કૃષિ ક્ષેત્રમાં ડીઝલના વધતા ખર્ચને કારણે ખેડૂતોની ખેતી ખર્ચમાં વધારો થશે તેવી ચિંતા વ્યક્ત કરવામાં આવી રહી છે.
વિરોધ પક્ષોએ કેન્દ્ર સરકાર પાસે ઈંધણના ભાવ ઘટાડવાની માંગ કરી છે. કોંગ્રેસે દેશભરમાં વિરોધ પ્રદર્શન કરવાની પણ ચેતવણી આપી છે, જ્યારે AAPએ મોંઘવારી સામે જનઆંદોલન ઊભું કરવાની વાત કરી છે. બીજી તરફ કેન્દ્ર સરકાર તરફથી હજુ સુધી આ મુદ્દે કોઈ વિશેષ સત્તાવાર નિવેદન સામે આવ્યું નથી.
