બોલિવૂડ અભિનેતા Bobby Deol ફરી એકવાર ચર્ચામાં આવ્યા છે. પોતાની કારકિર્દીના મુશ્કેલ સમય, વેબ સિરીઝમાં કરેલા ઇન્ટિમેટ સીન, પરિવારની પ્રતિક્રિયા અંગે તેમણે ખુલ્લેઆમ વાત કરી છે. એક ઇન્ટરવ્યૂ દરમિયાન બોબી દેઓલે જણાવ્યું કે વેબ સિરીઝ Aashramમાં કરેલા કેટલાક ઇન્ટિમેટ સીનને લઈને તેઓ શરૂઆતમાં ખૂબ જ હિચકાતા હતા અને આ કારણે તેમણે પોતાના પરિવારથી પણ આ પ્રોજેક્ટ વિશે વાત છુપાવી રાખી હતી.
બોબી દેઓલે જણાવ્યું કે જ્યારે તેમને Aashram સિરીઝ ઓફર થઈ ત્યારે તેઓ પોતાના કરિયરના એવા તબક્કામાં હતા જ્યાં તેમને એક મજબૂત કમબેકની જરૂર હતી. જોકે, સિરીઝમાં કેટલાક બોલ્ડ અને ઇન્ટિમેટ સીન હતા, જેના કારણે તેઓ અંદરથી અસ્વસ્થ અનુભવી રહ્યા હતા. ખાસ કરીને પરિવાર અને બાળકો શું વિચારશે તે બાબતે તેઓ ખૂબ જ ચિંતિત હતા.
અભિનેતાએ કહ્યું કે તેમણે આ સિરીઝ વિશે ઘરના મોટા ભાગના સભ્યોને જણાવ્યું જ નહોતું. માત્ર પોતાની પત્ની Tanya Deolને જ વિશ્વાસમાં લીધી હતી. બોબીએ પત્નીને પોતાના જીવનનો “બેકબોન” ગણાવ્યો અને કહ્યું કે દરેક મુશ્કેલ સમયમાં પત્નીએ જ તેમને હિંમત આપી છે.
બોબી દેઓલ વાત કરતાં કરતાં ભાવુક પણ થઈ ગયા હતા. તેમણે જણાવ્યું કે લાંબા સમય સુધી કામ ન મળવાથી તેઓ અંદરથી તૂટી ગયા હતા. ઘણા લોકો તેમને ભૂલી ગયા હતા અને ફિલ્મ ઈન્ડસ્ટ્રીમાં પોતાનું સ્થાન ગુમાવી દીધું હોવાની લાગણી થતી હતી. પરંતુ પરિવાર, ખાસ કરીને પત્ની અને બાળકોના સપોર્ટને કારણે તેમણે હાર સ્વીકારી નહોતી.વધુમાં
તેમણે જણાવ્યું કે તેમના પુત્રના એક વાક્યએ તેમની જિંદગી બદલાવી નાખી હતી. પુત્રએ તેમને કહ્યું હતું કે “તમે ફરીથી ઊભા થઈ શકો છો,” અને આ શબ્દોએ તેમને નવી ઊર્જા આપી હતી. ત્યારબાદ બોબીએ પોતાના પર વધુ મહેનત શરૂ કરી અને ફરીથી ઇન્ડસ્ટ્રીમાં મજબૂત વાપસી કરી.
Aashram વેબ સિરીઝમાં બોબી દેઓલના અભિનયને ભારે પ્રશંસા મળી હતી. આ સિરીઝમાં તેમણે એક એવા આધ્યાત્મિક ગુરુનું પાત્ર ભજવ્યું હતું, જેની આસપાસ અનેક રહસ્યો અને વિવાદો જોડાયેલા હોય છે. તેમના આ પાત્રે દર્શકો વચ્ચે નવી ઓળખ ઉભી કરી અને સોશિયલ મીડિયા પર “લોર્ડ બોબી” તરીકે પણ તેઓ ટ્રેન્ડ થવા લાગ્યા હતા.સિરીઝમાં તેમની સાથે અભિનેત્રી Aditi Pohankarએ પણ મહત્વપૂર્ણ ભૂમિકા ભજવી હતી. અગાઉ અદિતિએ પણ ખુલાસો કર્યો હતો કે ઇન્ટિમેટ સીન દરમિયાન બંને કલાકારોને શરૂઆતમાં થોડી અસહજતા અનુભવાઈ હતી, પરંતુ સમય જતાં બંને વચ્ચે સારી સમજણ બની ગઈ હતી.
બોબી દેઓલ હાલ પોતાના કરિયરના સફળ તબક્કામાં ગણાઈ રહ્યા છે. Animal ફિલ્મ પછી તેમની લોકપ્રિયતા વધુ વધી છે અને દર્શકો તેમની નવી ફિલ્મો , પ્રોજેક્ટ્સની આતુરતાથી રાહ જોઈ રહ્યા છે. અભિનેતાની આ ભાવુક વાતચીત સોશિયલ મીડિયા પર પણ ખૂબ વાયરલ થઈ રહી છે.
