સામાન્ય દેખાતા ફ્લેટમાં ચાલી રહ્યો હતો અજગરોનો ગેરકાયદે ઉછેર, પોલીસ દરોડામાં સામે આવ્યું ચોંકાવનારું સત્ય
ચીનના ઝેજિયાંગ પ્રાંતના તાઈઝોઉ શહેરમાંથી એક એવી ઘટના સામે આવી છે, જેણે સ્થાનિક પ્રશાસનથી લઈને વન્યજીવ નિષ્ણાતો સુધી સૌને ચોંકાવી દીધા છે. એક સામાન્ય એપાર્ટમેન્ટમાં રહેતા વ્યક્તિના ફ્લેટમાંથી એક-કે બે નહીં પરંતુ 309 જીવતા અજગર મળી આવ્યા હતા. સૌથી નવાઈની વાત એ હતી કે આ આખા ગેરકાયદે ધંધાનો પર્દાફાશ કોઈ ગુપ્ત બાતમી કે ફરિયાદના આધારે નહીં, પરંતુ વીજળીના અસામાન્ય બિલના આધારે થયો હતો.
આ કેસમાં પોલીસે માત્ર ફ્લેટમાંથી અજગરો જ નહીં, પરંતુ કરોડો રૂપિયાના ગેરકાયદે વન્યજીવ વેપારનું પણ ભાંડાફોડ કર્યું હતું. તપાસ દરમિયાન ખુલ્યું કે આરોપી છેલ્લા દસ વર્ષથી અજગરોનું બ્રીડિંગ કરીને તેનું વેચાણ કરી રહ્યો હતો.
એક અજગરથી શરૂ થઈ આખી તપાસ
માર્ચ 2024માં તાઈઝોઉ નજીકના એક પહાડી વિસ્તારમાં રહેતા એક વૃદ્ધ વ્યક્તિએ એક અસામાન્ય સાપ જોયો હતો. સાપ કદમાં મોટો હતો અને સ્થાનિક વિસ્તારમાં જોવા મળતા સામાન્ય સાપોથી સંપૂર્ણપણે અલગ દેખાતો હતો.વૃદ્ધે તાત્કાલિક સ્થાનિક વન્યજીવ સંરક્ષણ વિભાગને જાણ કરી. અધિકારીઓ સ્થળ પર પહોંચ્યા અને સાપને પકડી તેની તપાસ કરી. તપાસમાં જાણવા મળ્યું કે તે અજગર હતો.વન્યજીવ નિષ્ણાતોને અહીંથી શંકા ઊભી થઈ. કારણ કે તે વિસ્તાર અજગરોની કુદરતી વસાહત નહોતો. વધુમાં માર્ચ મહિનામાં તાપમાન ઓછું હોવાથી સામાન્ય રીતે સાપ બહાર સક્રિય જોવા મળતા નથી. તેથી નિષ્ણાતોએ અનુમાન લગાવ્યું કે અજગર કોઈ વ્યક્તિના ઘરમાંથી ભાગીને બહાર આવ્યો હશે.
વીજળીના બિલે આપ્યો સૌથી મોટો ક્લૂ
પોલીસે વન્યજીવ નિષ્ણાતો અને પ્રોફેશનલ સાપ ઉછેરનારાઓની મદદ લીધી. તપાસ દરમિયાન નિષ્ણાતોએ મહત્વની માહિતી આપી કે અજગરોને જીવતા રાખવા માટે સતત નિયંત્રિત તાપમાન જરૂરી હોય છે.અજગરોને સામાન્ય રીતે 20થી 30 ડિગ્રી સેલ્સિયસ તાપમાનમાં રાખવામાં આવે છે. તેના માટે હીટર, હ્યુમિડિફાયર અને અન્ય ઇલેક્ટ્રિક ઉપકરણો સતત ચલાવવા પડે છે.નિષ્ણાતોની આ માહિતી મળ્યા બાદ પોલીસે સમગ્ર વિસ્તારમાં વીજળીના બિલ અને વપરાશનો ડેટા તપાસવાનું શરૂ કર્યું.તપાસ દરમિયાન એક ફ્લેટનું વીજળી બિલ અત્યંત અસામાન્ય હોવાનું સામે આવ્યું. આ ફ્લેટ ‘ગુઓ’ નામના વ્યક્તિનો હતો.
શંકા કેમ ગઈ ગુઓ પર?
પોલીસે ગુઓની જીવનશૈલીની તપાસ કરી. જાણવા મળ્યું કે તે એકલો રહેતો હતો. તેના લગ્ન થયા નહોતા અને તેની પાસે કોઈ સ્થાયી નોકરી પણ નહોતી.સામાન્ય રીતે એકલા રહેતા વ્યક્તિનું વીજળી બિલ મર્યાદિત હોય છે, પરંતુ ગુઓના ફ્લેટમાં વીજળીનો વપરાશ અનેક ગણો વધારે હતો.આ બાબતે પોલીસને શંકા વધુ મજબૂત થઈ ગઈ.
ઓનલાઇન મંગાવવામાં આવતા સફેદ ઉંદરો
તપાસ આગળ વધતાં વધુ ચોંકાવનારા પુરાવા મળ્યા.પોલીસને ખબર પડી કે ‘દી’ નામનો વ્યક્તિ વારંવાર ગુઓના ફ્લેટ પર આવતો-જતો હતો. તે કુરિયર ઓફિસમાંથી મોટા પાર્સલ લઈ આવતો હતો.જ્યારે આ પાર્સલની વિગતો તપાસવામાં આવી ત્યારે જાણવા મળ્યું કે તેમાં જીવતા સફેદ ઉંદરો હતા.વન્યજીવ નિષ્ણાતોના જણાવ્યા મુજબ આવા સફેદ ઉંદરોનો ઉપયોગ સામાન્ય રીતે પાલતુ અજગરોને ખવડાવવા માટે કરવામાં આવે છે.આથી પોલીસને લગભગ ખાતરી થઈ ગઈ કે ફ્લેટમાં કોઈ મોટી ગેરકાયદે પ્રવૃત્તિ ચાલી રહી છે.
સોશિયલ મીડિયાએ પણ આપ્યા પુરાવા
પોલીસે ગુઓના સોશિયલ મીડિયા એકાઉન્ટ્સની તપાસ શરૂ કરી.ત્યાંથી અજગરોના ફોટોગ્રાફ, બ્રીડિંગ સંબંધિત પોસ્ટ્સ અને ગુપ્ત સંકેતોમાં વેચાણની ચર્ચાઓ મળી આવી.વધુ તપાસમાં જાણવા મળ્યું કે ગુઓ અને તેનો સાથીદાર દી અગાઉ બે અજગરો અન્ય વ્યક્તિને લગભગ 1,000 યુઆનમાં વેચી ચૂક્યા હતા.આ ડિજિટલ પુરાવાઓએ પોલીસની શંકાને મજબૂત બનાવી.
દરોડા દરમિયાન અધિકારીઓ પણ ચોંકી ઉઠ્યા
જ્યારે તમામ પુરાવા એકત્ર થયા બાદ પોલીસે દરોડો પાડવાનો નિર્ણય લીધો ત્યારે કોઈને અંદાજ નહોતો કે અંદર શું જોવા મળશે.ફ્લેટનો દરવાજો ખોલતા જ પોલીસ અને વન્યજીવ અધિકારીઓ આશ્ચર્યચકિત થઈ ગયા.ત્રણ રૂમના ફ્લેટમાં માત્ર એક રૂમમાં જ માનવી રહેતો હોવાના સંકેતો હતા. બાકીના બે બેડરૂમ અને લિવિંગ રૂમ સંપૂર્ણપણે અજગરોના કબ્જામાં હતા.
સેંકડો બોક્સમાં ભરાયેલા અજગર
ફ્લેટની અંદર પ્લાસ્ટિકના બોક્સ એક ઉપર એક ગોઠવાયેલા હતા.
દરેક બોક્સમાં એક અથવા વધુ અજગર રાખવામાં આવ્યા હતા.
કેટલાક નાના બચ્ચા હતા તો કેટલાક સંપૂર્ણ વિકસિત અને મોટા કદના અજગરો હતા.
તપાસ દરમિયાન કુલ 309 અજગરો ફ્લેટમાંથી જીવતા મળી આવ્યા.
આટલી મોટી સંખ્યામાં અજગરો એક સામાન્ય રહેણાંક ફ્લેટમાં રાખવામાં આવ્યા હોવાની ઘટના દુર્લભ માનવામાં આવે છે.
પડોશીઓને પણ નહોતી ખબર
સૌથી નવાઈની વાત એ હતી કે આસપાસ રહેતા લોકોમાંથી કોઈને પણ આ બાબતની જાણ નહોતી.પડોશીઓએ પોલીસને જણાવ્યું કે ગુઓ શાંત સ્વભાવનો વ્યક્તિ હતો અને વધારે લોકો સાથે સંપર્ક રાખતો નહોતો.કોઈએ ક્યારેય કલ્પના પણ કરી નહોતી કે તેમની બાજુના ફ્લેટમાં 300થી વધુ અજગરો રહેતા હશે.
10 વર્ષથી ચાલતો હતો ગેરકાયદે ધંધો
પૂછપરછ દરમિયાન ગુઓએ સ્વીકાર્યું કે તેને નાનપણથી જ સાપોનો શોખ હતો.
વર્ષ 2014માં તેણે પ્રથમ વખત ચાર અજગર ખરીદ્યા હતા.
તે બાદ તેણે સતત તેમનું બ્રીડિંગ શરૂ કર્યું અને વર્ષો દરમિયાન તેમની સંખ્યા વધતી ગઈ.
તપાસમાં જાણવા મળ્યું કે ગુઓ અને તેના સાથીદારે અત્યાર સુધીમાં લગભગ 80 અજગરો વેચી દીધા હતા.
વધુ એક સ્થળેથી મળ્યા 47 અજગર
પોલીસે તે દુકાનદારની પણ ઓળખ કરી જેણે 2014માં ગુઓને પ્રથમ અજગરો વેચ્યા હતા, તેના ઘરે દરોડો પાડવામાં આવ્યો ત્યારે ત્યાંથી પણ 47 અજગરો મળી આવ્યા.આ કાર્યવાહી બાદ કુલ 436 અજગરો જપ્ત કરવામાં આવ્યા હતા.
કરોડો રૂપિયાનો ગેરકાયદે વેપાર
તપાસમાં સામે આવ્યું કે જપ્ત કરાયેલા અજગરોની કુલ કિંમત 3 કરોડ યુઆનથી વધુ હતી.ભારતીય ચલણમાં તેની કિંમત સેંકડો કરોડ રૂપિયાની થાય છે.વન્યજીવ નિષ્ણાતોના જણાવ્યા મુજબ કેટલીક પ્રજાતિના અજગરોની આંતરરાષ્ટ્રીય બજારમાં ખૂબ ઊંચી કિંમત હોય છે, જેના કારણે તેમનો ગેરકાયદે વેપાર પણ વધતો રહે છે.
કોર્ટનો કડક નિર્ણય
ચીનના કાયદા મુજબ અજગર સંરક્ષિત વન્યજીવોની શ્રેણીમાં આવે છે.
પરવાનગી વિના તેમનું બ્રીડિંગ, વેચાણ કે વેપાર કરવો ગંભીર ગુનો ગણાય છે.
પોલીસ તપાસ પૂર્ણ થયા બાદ કેસ કોર્ટમાં પહોંચ્યો હતો.
સ્થાનિક અદાલતે ગુઓ, તેના સાથીદાર દી અને અજગર વેચનાર દુકાનદારને દોષિત ઠેરવ્યા હતા.
ત્રણેય આરોપીઓને જેલની સજા ફટકારવામાં આવી હતી.
વીજળીના બિલે ખોલી દીધી આખી પોલ
આ સમગ્ર ઘટનામાં સૌથી રસપ્રદ બાબત એ રહી કે જે રહસ્ય વર્ષો સુધી કોઈને ખબર ન પડ્યું, તેનો ખુલાસો આખરે વીજળીના બિલના કારણે થયો.અસામાન્ય વીજ વપરાશે પોલીસને શંકા તરફ દોરી, અને ત્યારબાદ થયેલી તપાસમાં એક સામાન્ય ફ્લેટમાંથી અજગરોના ગેરકાયદે સામ્રાજ્યનો પર્દાફાશ થયો.
આ ઘટના દર્શાવે છે કે ક્યારેક નાની લાગતી બાબતો પણ મોટા ગુનાઓ સુધી પહોંચાડતી મહત્વની કડી સાબિત થઈ શકે છે. આજે તાઈઝોઉની આ ઘટના સમગ્ર ચીનમાં ચર્ચાનો વિષય બની છે અને વન્યજીવોના ગેરકાયદે વેપાર સામે કડક કાર્યવાહી માટે એક મોટું ઉદાહરણ બની છે.
