અંધારાનો લાભ લઈ ઘૂસેલી ટોળકી પાસેથી તાળા તોડવાના સાધનો મળી આવ્યા
સિક્યુરિટી સ્ટાફની ઝડપી કાર્યવાહીને કારણે મોટી ચોરી ટળી, પોલીસે હાથ ધરી વધુ તપાસ
(પ્રતિનિધિ), વડોદરા, તા. ૨૪
વડોદરાની SSG Hospital કેમ્પસમાં ગત મોડી રાત્રે ચોરીના ઈરાદે ઘૂસેલી શંકાસ્પદ ટોળકીને હોસ્પિટલના સિક્યુરિટી જવાનોએ સતર્કતા દાખવી રંગેહાથ ઝડપી પાડી હતી. ઘટનાને પગલે હોસ્પિટલ પરિસરની સુરક્ષા વ્યવસ્થા ફરી ચર્ચામાં આવી છે.
પ્રાપ્ત વિગતો અનુસાર, રાત્રિના સમયે ફરજ પર તૈનાત સિક્યુરિટી જવાનોને હોસ્પિટલ પરિસરમાં શંકાસ્પદ રીતે ફરી રહેલા કેટલાક ઇસમો નજરે ચડ્યા હતા. તેમની હિલચાલ શંકાસ્પદ લાગતાં જવાનોએ તાત્કાલિક કાર્યવાહી કરી ટોળકીને ઘેરી લીધી હતી. તપાસ દરમિયાન ઇસમો પાસેથી તાળા તોડવા માટે વપરાતા પક્કડ તથા કટિંગ માટેની ખાસ બ્લેડો સહિતના સાધનો મળી આવ્યા હતા.
પ્રાથમિક તપાસમાં ટોળકી હોસ્પિટલના કોઈ વિભાગ અથવા દર્દીઓના સામાનને નિશાન બનાવવાના ઈરાદે આવી હોવાનું સામે આવ્યું છે. બનાવ અંગે સિક્યુરિટી સ્ટાફે તરત જ રાવપુરા પોલીસને જાણ કરતાં પોલીસ કાફલો સ્થળ પર પહોંચી ગયો હતો અને શંકાસ્પદ ઇસમોને કબજામાં લઈને વધુ પૂછપરછ શરૂ કરી છે.
સિક્યુરિટી સ્ટાફની ત્વરિત કાર્યવાહીને કારણે હોસ્પિટલમાં સંભવિત મોટી ચોરીનો બનાવ ટળી ગયો હોવાનું માનવામાં આવી રહ્યું છે. હાલ પોલીસ દ્વારા ટોળકીના અગાઉના ગુનાહિત રેકોર્ડ અંગે પણ તપાસ હાથ ધરવામાં આવી રહી છે.
