નિયમોનું પાલન ન કરવાના આરોપો વચ્ચે કડક કાર્યવાહી; થાપણદારોના હિત સુરક્ષિત હોવાનો RBIનો દાવો
ભારતીય રિઝર્વ બેંક (RBI)એ ફિનટેક ક્ષેત્ર માટે મોટા ઝટકા સમાન નિર્ણય લેતા પેટીએમ પેમેન્ટ્સ બેંકનું બેંકિંગ લાઇસન્સ તાત્કાલિક અસરથી રદ કરવાની જાહેરાત કરી છે. આરબીઆઈએ જણાવ્યું છે કે બેંક દ્વારા નિયમનકારી ધોરણોનું પૂરતું પાલન કરવામાં આવ્યું નહોતું અને તેની કામગીરી થાપણદારો તેમજ જાહેર હિત માટે જોખમી બની રહી હતી.
RBIના નિવેદન અનુસાર, બેંકિંગ રેગ્યુલેશન એક્ટ, 1949 હેઠળ જરૂરી નિયમોનું સતત ઉલ્લંઘન થતાં હવે બેંકને આગળ ચાલુ રાખવી યોગ્ય નથી. આ નિર્ણય શુક્રવારે કામકાજના કલાકો પૂર્ણ થતાં જ અમલમાં આવ્યો છે. સાથે જ આરબીઆઈએ હાઈકોર્ટમાં બેંકને સમેટી લેવા માટે અરજી કરવાની પણ તૈયારી દર્શાવી છે. મહત્વની બાબત એ છે કે આરબીઆઈએ સ્પષ્ટતા કરી છે કે પેટીએમ પેમેન્ટ્સ બેંક પાસે તમામ થાપણદારોની જવાબદારી ચૂકવવા માટે પૂરતી લિક્વિડિટી ઉપલબ્ધ છે, જેથી ગ્રાહકોને ગભરાવાની જરૂર નથી.
ઉલ્લેખનીય છે કે માર્ચ 2022થી જ આરબીઆઈએ પેટીએમ પેમેન્ટ્સ બેંક પર નજર રાખી હતી અને નવા ગ્રાહકો ઉમેરવા પર પ્રતિબંધ મૂકાયો હતો. ત્યારબાદ જાન્યુઆરી અને ફેબ્રુઆરી 2024 દરમિયાન વધુ કડક નિયંત્રણો લાદવામાં આવ્યા હતા, ગ્રાહકોના ખાતા, વોલેટ અને પ્રીપેડ ઇન્સ્ટ્રુમેન્ટ્સમાં નવા ડિપોઝિટ અથવા ટોપ-અપ લેવા પર રોક લગાવવામાં આવી હતી.
23 મે, 2017થી કામગીરી શરૂ કરનાર આ પેમેન્ટ્સ બેંક હવે કોઈપણ પ્રકારની બેંકિંગ પ્રવૃત્તિ કરી શકશે નહીં. આ નિર્ણય પેટીએમની પેરેન્ટ કંપની વન97 કમ્યુનિકેશન લિમિટેડ માટે મોટો આર્થિક અને પ્રતિષ્ઠાનો ઝટકો માનવામાં આવી રહ્યો છે.
ફિનટેક ક્ષેત્રમાં આ કાર્યવાહી ભવિષ્યમાં નિયમનકારી પાલન અંગે અન્ય કંપનીઓ માટે પણ કડક સંદેશા સમાન માનવામાં આવી રહી છે.
