પશ્ચિમ બંગાળની રાજનીતિમાં ફરી એકવાર તણાવ ચરમસીમાએ પહોંચ્યો છે. તૃણમૂલ કોંગ્રેસ (TMC)ના રાષ્ટ્રીય મહાસચિવ અને મમતા બેનર્જીના ભત્રીજા Abhishek Banerjee પર શનિવારે દક્ષિણ 24 પરગણાના સોનારપુર વિસ્તારમાં હુમલો થતાં રાજકીય ઘમાસાણ મચી ગયું છે. હુમલા બાદ તૃણમૂલ કોંગ્રેસના વડા Mamata Banerjeeએ ભાજપ સરકાર પર ગંભીર આક્ષેપો કરતાં કહ્યું કે “શાસકો હવે હત્યારા બની ગયા છે.”
મળતી માહિતી મુજબ, અભિષેક બેનર્જી સોનારપુર વિસ્તારમાં ચૂંટણી બાદ હિંસાનો ભોગ બનેલા પક્ષના કાર્યકરો અને તેમના પરિવારજનોને મળવા ગયા હતા. આ દરમિયાન મોટી સંખ્યામાં એકત્ર થયેલી ભીડે તેમના કાફલા પર હુમલો કર્યો હતો. હુમલાખોરોએ ઈંડાં અને પથ્થરો ફેંક્યા હતા તેમજ ધક્કામુક્કી અને મારપીટ પણ કરી હતી. ઘટનાના વીડિયો સોશિયલ મીડિયામાં વાયરલ થયા છે.
‘મને મારી નાખવાનો પ્રયાસ થયો’ – અભિષેક બેનર્જી
હુમલા બાદ અભિષેક બેનર્જીએ આરોપ લગાવ્યો કે આ હુમલો સંપૂર્ણપણે પૂર્વનિયોજિત હતો. તેમણે કહ્યું કે હુમલાના સમયે વિસ્તારમાં પોલીસ હાજર નહોતી અને હુમલાખોરોનો હેતુ તેમને જાનથી મારી નાખવાનો હતો. તેમણે આ હુમલાને “ભાજપ પ્રાયોજિત હુમલો” ગણાવ્યો.અભિષેકે જણાવ્યું કે, “મારી સાથે શું થયું તે દેશે જોયું છે. આ આખું કાવતરું પહેલેથી ગોઠવવામાં આવ્યું હતું. જો પોલીસ સમયસર પહોંચી હોત તો આવી ઘટના બનતી નહીં.”
મમતાનો ભાજપ પર આકરો હુમલો
ઘટના બાદ મમતા બેનર્જીએ સોશિયલ મીડિયા અને જાહેર નિવેદન દ્વારા ભાજપ પર સીધો હુમલો કર્યો. તેમણે કહ્યું કે રાજ્યમાં સત્તામાં આવેલી ભાજપ સરકાર વિરોધી અવાજોને દબાવવા માટે હિંસાનો સહારો લઈ રહી છે.મમતાએ લખ્યું, “Rulers became killers – Shame on you BJP” એટલે કે “શાસકો હત્યારા બની ગયા છે, ભાજપને શરમ આવવી જોઈએ.”તેમણે વધુમાં આક્ષેપ કર્યો કે હુમલા બાદ કેટલીક હોસ્પિટલો પર પણ દબાણ કરવામાં આવ્યું હતું જેથી અભિષેક બેનર્જીને યોગ્ય સારવાર ન મળે. તેમના જણાવ્યા પ્રમાણે ડોક્ટરો અને હોસ્પિટલ પ્રશાસન પર રાજકીય દબાણ લાવવામાં આવ્યું હતું.
હુમલા બાદ હોસ્પિટલમાં દાખલ કરાયા
હુમલામાં ઈજા થતાં અભિષેક બેનર્જીને કોલકાતાની હોસ્પિટલમાં દાખલ કરવામાં આવ્યા હતા. ત્યાં તેમની વિવિધ તબીબી તપાસ કરવામાં આવી હતી. મમતા બેનર્જી પણ હોસ્પિટલ પહોંચી તેમના સ્વાસ્થ્યની માહિતી મેળવી હતી,
કોંગ્રેસ અને સમાજવાદી પાર્ટી પણ આવી સાથે
આ ઘટનાની દેશભરમાં રાજકીય પ્રતિક્રિયાઓ જોવા મળી રહી છે. Mallikarjun Khargeએ હુમલાની નિંદા કરતાં કહ્યું કે રાજકીય મતભેદો ક્યારેય હિંસાને યોગ્ય ઠેરવી શકતા નથી. તેમણે લોકશાહી મૂલ્યો અને શાંતિપૂર્ણ રાજકારણ જાળવવાની અપીલ કરી હતી.તે જ સમયે Akhilesh Yadavએ પણ હુમલાની ટીકા કરી હતી અને તેને ગંભીર રાજકીય ઘટના ગણાવી હતી. તેમણે ઘટનાની નિષ્પક્ષ તપાસની માંગ કરી હતી.
ભાજપે તમામ આરોપો ફગાવ્યા
બીજી તરફ ભાજપે તૃણમૂલ કોંગ્રેસના તમામ આરોપોને રાજકીય નાટક ગણાવ્યા છે. ભાજપના નેતાઓએ હુમલામાં પક્ષની કોઈ ભૂમિકા હોવાનો ઇનકાર કર્યો છે અને દાવો કર્યો છે કે રાજ્યમાં તૃણમૂલ કોંગ્રેસ વિરુદ્ધ લોકોમાં ભારે અસંતોષ છે.
ભાજપનું કહેવું છે કે આ ઘટના પાછળ પક્ષનો કોઈ હાથ નથી અને તૃણમૂલ કોંગ્રેસ સહાનુભૂતિ મેળવવા માટે રાજકીય રીતે મુદ્દાને ઉછાળી રહી છે.
પશ્ચિમ બંગાળની રાજનીતિ વધુ ગરમાઈ
તાજેતરમાં પશ્ચિમ બંગાળમાં થયેલા રાજકીય ફેરફારો અને સત્તા પરિવર્તન બાદ રાજ્યમાં રાજકીય તણાવ સતત વધી રહ્યો છે. અભિષેક બેનર્જી પરનો હુમલો અને ત્યારબાદ મમતા બેનર્જીના આકરા નિવેદનોને કારણે રાજ્યની રાજનીતિ વધુ ગરમાઈ ગઈ છે. કોંગ્રેસ અને સમાજવાદી પાર્ટી સહિતના વિરોધ પક્ષો તૃણમૂલ કોંગ્રેસના સમર્થનમાં ઉભા રહ્યા છે, જ્યારે ભાજપ તમામ આરોપોને નકારી રહ્યું છે.
આ ઘટનાએ માત્ર પશ્ચિમ બંગાળ જ નહીં, પરંતુ સમગ્ર દેશની રાજનીતિમાં નવી ચર્ચા જગાવી છે અને આવનારા દિવસોમાં આ મુદ્દે વધુ રાજકીય ટકરાવ જોવા મળી શકે છે.
