મહિલાની ચેન લૂંટનાર શાતિર બદમાશોની કેમેરા સામે દાદાગીરી,મહિલાની ચેન લૂંટની ઘટનામાં ઝડપાયેલા આરોપીઓનો પોલીસ કસ્ટડીમાં પણ અહંકાર યથાવત, કેમેરા સામે દેખાડી હેકડી; વીડિયો વાયરલ થતાં લોકોમાં રોષ
દેશમાં ચેન સ્નેચિંગ અને લૂંટની ઘટનાઓ સતત વધી રહી છે ત્યારે એક ચોંકાવનારો કિસ્સો સામે આવ્યો છે. મહિલાની ચેન લૂંટવાની ઘટનામાં પોલીસે બે શાતિર બદમાશોને ઝડપી પાડ્યા હોવા છતાં તેમના વર્તનમાં કોઈ પસ્તાવો જોવા મળ્યો નથી. તેના બદલે આરોપીઓ પોલીસ કસ્ટડીમાં હોવા છતાં કેમેરા સામે મૂંછો પર તાવ આપતા દાદાગીરીભર્યા અંદાજમાં જોવા મળ્યા, જેનો વીડિયો સોશિયલ મીડિયામાં ઝડપથી વાયરલ થઈ રહ્યો છે.
મળતી માહિતી મુજબ, આરોપીઓએ રસ્તા પરથી પસાર થતી એક મહિલાને નિશાન બનાવી તેના ગળામાંથી સોનાની ચેન ઝૂંટવી લીધી હતી. સમગ્ર ઘટના આસપાસ લાગેલા સીસીટીવી કેમેરામાં કેદ થઈ ગઈ હતી. ઘટનાના વીડિયો અને ટેક્નિકલ સર્વેલન્સના આધારે પોલીસે આરોપીઓની ઓળખ કરી તેમની ધરપકડ કરી હતી. જો કે આરોપી ની ધરપકડ બાદ જ્યારે પોલીસ આરોપીઓને મીડિયા અને કેમેરા સમક્ષ લઈ આવી ત્યારે સામાન્ય રીતે આરોપીઓ ચહેરો છુપાવતા, શરમજનક સ્થિતિમાં જોવા મળે છે. પરંતુ આ કિસ્સામાં આરોપીઓનો અંદાજ એકદમ અલગ હતો. બંને શખ્સો નિર્ભયતાથી કેમેરા સામે ઊભા રહ્યા, મૂંછો પર હાથ ફેરવતા અને કોઈ ભય કે પસ્તાવો ન હોય તેવી હેકડી બતાવતા જોવા મળ્યા. તેમના આ વર્તનને કારણે લોકોમાં ભારે નારાજગી જોવા મળી રહી છે.
પોલીસ અધિકારીઓના જણાવ્યા અનુસાર આરોપીઓ અગાઉ પણ વિવિધ ગુનાહિત પ્રવૃત્તિઓમાં સંડોવાયેલા હોવાનું સામે આવી રહ્યું છે. તેમની ક્રિમિનલ હિસ્ટ્રીની તપાસ કરવામાં આવી રહી છે અને અન્ય ચેન સ્નેચિંગ તથા લૂંટના ગુનાઓ સાથે તેમનો સંબંધ છે કે નહીં તેની પણ તપાસ ચાલી રહી છે.આ ઘટનાએ ફરી એકવાર શહેરોમાં મહિલાઓની સુરક્ષાને લઈને સવાલો ઊભા કર્યા છે. દિવસદાટે બનતી ચેન સ્નેચિંગની ઘટનાઓને કારણે મહિલાઓમાં ભયનો માહોલ જોવા મળી રહ્યો છે. સ્થાનિક લોકોનું કહેવું છે કે આવા ગુનેગારો સામે કડક કાર્યવાહી થવી જોઈએ જેથી ભવિષ્યમાં કોઈ પણ વ્યક્તિ
કાયદાનો ડર ભૂલી આવી હરકતો કરવાની હિંમત ન કરે.
પોલીસે આરોપીઓને કોર્ટમાં રજૂ કરી આગળની કાર્યવાહી હાથ ધરી છે. સાથે જ ઘટનામાં ઉપયોગમાં લેવાયેલા વાહન, લૂંટાયેલી ચેન અને અન્ય પુરાવા એકત્રિત કરવાની પ્રક્રિયા પણ ચાલુ છે. પોલીસનું કહેવું છે કે આરોપીઓની પૂછપરછ દરમિયાન અન્ય ગુનાઓ અંગે પણ મહત્વની માહિતી મળવાની શક્યતા છે.આ સમગ્ર ઘટનાનો વીડિયો સોશિયલ મીડિયામાં ભારે ચર્ચાનો વિષય બન્યો છે. લોકોનું માનવું છે કે પોલીસ કસ્ટડીમાં હોવા છતાં આરોપીઓનો આ પ્રકારનો અહંકાર અને હેકડી કાયદાના ડરનો અભાવ દર્શાવે છે, જેને રોકવા માટે કડક અને દાખલારૂપ કાર્યવાહી જરૂરી છે.
