ચાલુ બસમાં સીટ બદલવા જતાં ૬૬ વર્ષના વૃદ્ધા નીચે પટકાયા, ઇજાગ્રસ્ત થતા સયાજી હોસ્પિટલ ખસેડાયા
ભાદરવા ચોકડીના બૈરાજબેન ઝાલા સવારે વડોદરાથી સુરત રૂટની બસમાં બેઠા અને સંતુલન ગુમાવ્યું
(પ્રતિનિધિ), વડોદરા. તા.૧
વડોદરા :- શહેરમાં આજે સવારે એક ચોંકાવનારી અને કમનસીબ ઘટના સામે આવી છે. વડોદરાના કાલાઘોડા સર્કલ પાસેથી પસાર થઈ રહેલી એસ.ટી. બસમાં સીટ બદલવાનો પ્રયાસ કરી રહેલા એક વયોવૃદ્ધ મહિલા મુસાફર ચાલુ બસે નીચે પટકાતા ઘાયલ થયા હતા. અકસ્માતને પગલે આસપાસના લોકો અને મુસાફરોમાં ભારે અફરાતફરી મચી ગઈ હતી. ઇજાગ્રસ્ત વૃદ્ધાને તાત્કાલિક સારવાર અર્થે સયાજી હોસ્પિટલમાં ખસેડવામાં આવ્યા છે.
મળતી વિગતો અનુસાર, મૂળ ભાદરવા ચોકડી પાસે આવેલા દામોદર પાર્કમાં રહેતા ૬૬ વર્ષીય બૈરાજબેન મહેન્દ્રસિંહ ઝાલા આજે વહેલી સવારે આશરે ૭:૦૦ વાગ્યે કોઈ કામસર વડોદરા આવ્યા હતા. અહીંથી તેઓ આગળ ઉકાઈ જવા માટે સુરત રૂટની એસ.ટી. બસમાં સવાર થયા હતા. બસ પોતાના નિયત રૂટ પર આગળ વધી રહી હતી ત્યારે આ અકસ્માત સર્જાયો હતો.
જ્યારે એસ.ટી. બસ કાલાઘોડા સર્કલ પાસેથી પસાર થઈ રહી હતી, ત્યારે બૈરાજબેન બસની અંદર પોતાની સીટ બદલવાનો પ્રયાસ કરી રહ્યા હતા. કાલાઘોડા સર્કલ પાસે વળાંક દરમિયાન ચાલુ બસમાં અચાનક સંતુલન બગડવાના કારણે તેઓ સીધા ચાલુ બસમાંથી નીચે રોડ પર પટકાયા હતા. વયોવૃદ્ધ મહિલા રોડ પર પડતાં જ તેઓને શરીરે તેમજ માથાના ભાગે નાની-મોટી ઈજાઓ પહોંચી હતી.
ઘટના બનતા જ બસ ચાલકે તુરંત બ્રેક મારી દીધી હતી અને આસપાસના સ્થાનિક લોકો તેમજ ટ્રાફિક પોલીસ દોડી આવ્યા હતા. ઇજાગ્રસ્ત બૈરાજબેનને તાત્કાલિક ૧૦૮ એમ્બ્યુલન્સ મારફતે વડોદરાની સયાજી હોસ્પિટલમાં સારવાર અર્થે ખસેડવામાં આવ્યા છે, જ્યાં હાલ તેમની સારવાર ચાલી રહી છે. અકસ્માતને પગલે કાલાઘોડા સર્કલ પર થોડો સમય માટે ટ્રાફિક વ્યવસ્થા ખોરવાઈ હતી.
