સુરત શહેરમાં બનેલી 35 લાખ રૂપિયાની સનસનાટીભરી લૂંટની ઘટનાનો ભેદ સુરત ક્રાઈમ બ્રાન્ચે ઉકેલી લીધો છે. રાંદેર વિસ્તારમાં ફોર્ચ્યુનર કારનો કાચ તોડી રોકડ રકમ લૂંટનાર ગેંગના બે આરોપીઓને પોલીસે ઝડપી પાડ્યા છે, જ્યારે અન્ય બે સાગરીતો હજુ ફરાર છે. મહિધરપુરા વિસ્તારમાં આવેલી આંગડિયા પેઢીમાંથી રોકડ લઈને નીકળેલા વેપારી પર આરોપીઓએ અગાઉથી જ નજર ગોઠવી હતી. ખાસ લૂંટના ઈરાદે આરોપીઓ અમદાવાદથી બાઇક પર સુરત આવ્યા હતા. વેપારી ફોર્ચ્યુનર કારમાં નીકળતા જ ગેંગે પીછો શરૂ કર્યો અને ટ્રાફિક વચ્ચે અકસ્માતનું નાટક રચી કાર રોકાવી. ત્યારબાદ પાછળનો કાચ તોડી બેગ લૂંટી આરોપીઓ ફરાર થઈ ગયા હતા. તપાસમાં ખુલ્યું કે આરોપીઓએ હાઇવે નજીક બાઈકની નંબર પ્લેટ પર સ્ટીકર ચોંટાડી નંબર બદલી દીધો હતો, જેથી ઓળખ ટાળી શકાય. મહિધરપુરા વિસ્તારમાં આંગડિયા પેઢીઓ પાસે પહેલેથી જ રેકી કરવામાં આવી હોવાનું પણ સામે આવ્યું છે, જે ગુનાની પૂર્વ તૈયારી દર્શાવે છે.
ઘટના બાદ ઉચ્ચ અધિકારીઓના માર્ગદર્શન હેઠળ ક્રાઈમ બ્રાન્ચે અલગ-અલગ ટીમો બનાવી તપાસ હાથ ધરી હતી. આસપાસના CCTV ફૂટેજ, ટ્રાફિક કેમેરા અને ટેકનિકલ સર્વેલન્સના આધારે આરોપીઓ સુધી પહોંચવામાં સફળતા મળી. અબ્રામા રોડ પરથી બે આરોપીઓને ઝડપી પાડવામાં આવ્યા છે અને તેમની પાસેથી ઓગણીસ લાખ તેર હજાર પાંચસો રોકડ રકમ જપ્ત કરવામાં આવી છે. પૂછપરછ દરમિયાન બંનેએ લૂંટમાં સંડોવણી કબૂલી હોવાનું સૂત્રો જણાવે છે. પકડાયેલા આરોપીઓ અમદાવાદની કુખ્યાત છારાનગર ગેંગ સાથે જોડાયેલા હોવાનું બહાર આવ્યું છે. બંને રીઢા ગુનેગાર હોવાનું અને તેમના વિરુદ્ધ અગાઉ પણ અનેક ગુનાઓ નોંધાયેલા હોવાનું પોલીસે જણાવ્યું છે. આ કેસમાં કુલ ચાર આરોપીઓ સંડોવાયેલા હોવાનું સામે આવ્યું છે, જેમાંથી બે ઝડપાયા છે અને બે હજુ ફરાર છે. ફરાર આરોપીઓની શોધખોળ માટે સુરત પોલીસ અને ક્રાઈમ બ્રાન્ચ સક્રિય બની છે. પોલીસનો દાવો છે કે ટૂંક સમયમાં બાકીના આરોપીઓને પણ ઝડપી લઈ બાકી રહેલી રકમ રિકવર કરવામાં આવશે. સુરતમાં વધી રહેલી લૂંટની ઘટનાઓ વચ્ચે આ ઝડપી કાર્યવાહીથી વેપારી વર્ગે રાહતનો શ્વાસ લીધો છે.
