પાલિકાએ હરાજી માટે 2 લાખથી 9.60 લાખ સુધીની ડિપોઝીટ નિર્ધારિત કરી; આગામી બે દિવસમાં વેબસાઈટ પરથી ફોર્મ મળશે
વડોદરા મહાનગરપાલિકા દ્વારા શહેરના ઉત્તર અને દક્ષિણ વિસ્તારમાં આવેલા રમતગમતના સંકુલનો વ્યાપારી હેતુ માટે ઉપયોગ કરવાનું આયોજન હાથ ધરવામાં આવ્યું છે. પાલિકા હસ્તકના સમા સ્પોર્ટ્સ કોમ્પ્લેક્ષ અને માંજલપુર સ્પોર્ટ્સ કોમ્પ્લેક્ષ ખાતે નવનિર્મિત કુલ 48 દુકાનોને આગામી 5 વર્ષના ભાડા પટ્ટા પર આપવા માટે જાહેર હરાજીની પ્રક્રિયા શરૂ કરવામાં આવી છે. આ હરાજીમાં ભાગ લેવા ઈચ્છતા નાગરિકો આગામી 11 માર્ચ સુધીમાં પોતાની અરજી જમીન મિલકત અમલદારની કચેરી ખાતે જમા કરાવી શકશે.
મહાનગરપાલિકા દ્વારા પારદર્શક રીતે કરવામાં આવનાર આ હરાજીમાં સામાજિક સમાનતાના ધોરણે અનામત નીતિનો પણ અમલ કરવામાં આવ્યો છે. કુલ 48 દુકાનો પૈકી 4 દુકાનો એસસી, એસટી અને ઓબીસી કેટેગરીના અરજદારો માટે અનામત રાખવામાં આવી છે, જે અંતર્ગત નિયમોનુસાર ફાળવણી કરવામાં આવશે. બાકીની તમામ દુકાનો સામાન્ય કેટેગરી હેઠળ હરાજીમાં મૂકવામાં આવશે.
પાલિકા દ્વારા આ દુકાનો માટે જે આર્થિક માળખું નક્કી કરાયું છે તે મુજબ, દરેક દુકાનની ભૌગોલિક સ્થિતિ અને કદ પ્રમાણે અલગ-અલગ અપસેટ વેલ્યુ નિર્ધારિત કરવામાં આવી છે. આ અપસેટ વેલ્યુ લઘુત્તમ રૂ. 1 લાખથી લઈને મહત્તમ રૂ. 4.80 લાખ સુધીની રાખવામાં આવી છે. હરાજીમાં ભાગ લેવા માટે અરજદારે ડિપોઝીટની રકમ જમા કરાવવી અનિવાર્ય છે, જે રૂ. 2 લાખથી શરૂ કરીને રૂ. 9.60 લાખ સુધીની રહેશે. આ ડિપોઝીટ અને અપસેટ વેલ્યુ જે-તે દુકાનના લોકેશન પર આધારિત રહેશે.
આ હરાજી પ્રક્રિયામાં જોડાવા માંગતા વેપારીઓ માટે આગામી બે દિવસમાં વડોદરા મહાનગરપાલિકાની સત્તાવાર વેબસાઈટ પર અરજી ફોર્મ ઉપલબ્ધ કરાવી દેવામાં આવશે. ઈચ્છુક ઉમેદવારોએ ઓનલાઈન ફોર્મ ડાઉનલોડ કરી, જરૂરી દસ્તાવેજો સાથે આગામી 11 માર્ચ સુધીમાં પાલિકાની મુખ્ય કચેરી ખાતે આવેલા ‘જમીન મિલકત અમલદાર’ની ઓફિસમાં જમા કરાવવાના રહેશે.
સ્પોર્ટ્સ કોમ્પ્લેક્ષમાં દુકાનો શરૂ થવાથી રમતવીરો અને સ્થાનિક રહીશોને જરૂરી ચીજવસ્તુઓ એક જ સ્થળે મળી રહેશે, સાથે જ પાલિકાની આંતરિક આવકમાં પણ મોટો વધારો થવાની શક્યતા છે.
