ચેમ્પિયન્સ ટ્રોફીના ગ્રુપ Aમાંથી ભારત અને ન્યુઝીલેન્ડ સેમિફાઇનલમાં પહોંચી ગયા છે. જોકે હવે એ જોવું ખૂબ જ રસપ્રદ રહેશે કે બંને ટીમોમાંથી કઈ ટીમ પ્રથમ સ્થાને રહીને લીગ મેચ પૂર્ણ કરે છે. આ મેચ રવિવારે દુબઈમાં બંને ટીમો વચ્ચે રમાશે પરંતુ આ મેચ પહેલા ભારતીય ટીમને મોટો ઝટકો લાગી શકે છે. સ્ટાર બેટ્સમેન શુભમન ગિલ આ મેચમાંથી બહાર થઈ શકે છે. મળતી માહિતી મુજબ ગિલ બીમારીના કારણે આ મેચમાંથી બહાર થઈ શકે છે.
ચેમ્પિયન્સ ટ્રોફીમાં શુભમન ગિલનું અત્યાર સુધીનું પ્રદર્શન શાનદાર રહ્યું છે. તેણે આ ટુર્નામેન્ટમાં શાનદાર બેટિંગ કરી છે અને તે શાનદાર ફોર્મમાં છે. આવી સ્થિતિમાં જો શુભમન ગિલ ન્યુઝીલેન્ડ સામેની મહત્વપૂર્ણ મેચમાંથી બહાર થઈ જાય છે તો તે ભારતીય ટીમ માટે મોટી સમસ્યા ઊભી કરી શકે છે.
શુભમન ગિલ બુધવારે પ્રેક્ટિસ સત્રમાં હાજર રહ્યો ન હતો
આ અગાઉ ઋષભ પંત પણ બીમાર પડી ગયો હતો જેના કારણે તે પાકિસ્તાન સામેની મેચના પ્રેક્ટિસ સેશનમાં હાજર રહ્યો ન હતો. જોકે, હવે ઋષભ પંત સંપૂર્ણપણે ફિટ છે અને મેદાનમાં પાછો ફર્યો છે. પણ હવે શુભમન ગિલ બીમાર પડી ગયો છે. શુભમન ગિલ દુબઈના મેદાન પર ભારતીય ટીમના પ્રેક્ટિસ સેશનમાં જોવા મળ્યો ન હતો.
આવી સ્થિતિમાં પ્રશ્ન એ ઊભો થાય છે કે શુભમન ગિલ ન્યુઝીલેન્ડ સામેની મેચમાં રમી શકશે કે નહીં. મીડિયા રિપોર્ટ્સ અનુસાર ગિલ બુધવારે પ્રેક્ટિસ સત્રમાં હાજર રહ્યો ન હતો. જોકે, અત્યાર સુધી BCCI દ્વારા આ અંગે કોઈ સત્તાવાર માહિતી જાહેર કરવામાં આવી નથી.
શું કેએલ રાહુલને ઓપનિંગ કરવાની તક મળશે?
જો ભારતીય ટીમ ન્યુઝીલેન્ડ સામેની મેચ જીતી જાય છે તો તે તેના લીગ મેચો પ્રથમ સ્થાને પૂર્ણ કરશે. પાકિસ્તાન અને બાંગ્લાદેશની ટીમો ગ્રુપ A માંથી બહાર થઈ ગઈ છે જ્યારે ગ્રુપ B માંથી ઓસ્ટ્રેલિયા, દક્ષિણ આફ્રિકા અને અફઘાનિસ્તાનની ટીમો હજુ પણ સેમિફાઇનલની રેસમાં છે.
હવે એ જોવાનું ખૂબ જ રસપ્રદ રહેશે કે ભારતીય ટીમ કઈ ટીમ સામે સેમિફાઇનલ મેચ રમશે અને શું ન્યુઝીલેન્ડ સામેની મેચમાં કેએલ રાહુલને ઓપનિંગ બેટ્સમેન તરીકે મોકલવામાં આવશે.
રોહિતે બુધવારે પ્રેક્ટિસમાં ભાગ ન લીધો
મેચ પહેલા ભારતીય કેપ્ટન રોહિત શર્માની ઈજાને લઈને એક મોટી અપડેટ આવી છે. એક અહેવાલ મુજબ રોહિતે બુધવારે પ્રેક્ટિસ સત્ર દરમિયાન કોઈ ભારે પ્રવૃત્તિમાં ભાગ લીધો ન હતો કે નેટ્સ પર બેટિંગ કરી ન હતી. તેની ઈજા કેટલી ગંભીર છે તે તો સમય જ કહેશે અને તે આગામી મેચમાં રમશે કે નહીં તે અંગે પણ પ્રશ્નો ઉભા થઈ રહ્યા છે.
પાકિસ્તાન સામેની મેચ દરમિયાન રોહિત શર્માને હેમસ્ટ્રિંગમાં ઈજા થઈ હતી પરંતુ મેચ પછી તેણે કહ્યું કે તે ઠીક છે અને ચિંતા કરવાની કોઈ વાત નથી. રિપોર્ટ અનુસાર, રોહિતને કોઈ થ્રોડાઉનનો સામનો કરવો પડ્યો ન હતો અને મુખ્ય કોચ ગૌતમ ગંભીર અને બાકીના કોચિંગ સ્ટાફ સાથે ચર્ચા કરતી વખતે તેણે ફક્ત થોડી શેડો બેટિંગ કરી હતી.
જોકે પ્રેક્ટિસ સેશન દરમિયાન ભારતીય ટીમમાં વાતાવરણ ખૂબ જ ખુશનુમા દેખાતું હતું અને ખેલાડીઓ હસતા અને એકબીજા સાથે વાતચીત કરતા જોવા મળ્યા હતા. ભારતીય ખેલાડીઓ પણ એકબીજા સાથે મજાક કરી રહ્યા હતા. બીસીસીઆઈએ તેની સાઈટ પર તેનો વીડિયો પણ જાહેર કર્યો છે.
ભારતીય ટીમ પ્રેક્ટિસ સેશન માટે પહોંચી હતી
પાકિસ્તાન સામેની જીત બાદ ભારતીય ખેલાડીઓએ પહેલીવાર ICC એકેડેમીમાં તાલીમમાં ભાગ લીધો હતો. આ સમય દરમિયાન બધા ખેલાડીઓ ફૂટબોલ રમીને અને સ્પ્રિન્ટ્સ કરીને વોર્મ-અપ કરતા હતા પરંતુ રોહિત એવી કોઈ શારીરિક પ્રવૃત્તિમાં ભાગ લેતો ન હતો જેનાથી તેના પગમાં સમસ્યા થઈ શકે.
રિપોર્ટમાં દાવો કરવામાં આવ્યો છે કે તે સ્ટ્રેન્થ અને કન્ડીશનીંગ કોચ સોહમ દેસાઈની દેખરેખ હેઠળ ધીમે ધીમે દોડી રહ્યો હતો પરંતુ મુક્તપણે ચાલી શકતો ન હતો. રોહિત મેદાન પર મોટાભાગનો સમય એક જગ્યાએ ઉભા રહીને અથવા ચાલવામાં વિતાવતો હતો. તે વધારે દોડતો જોવા મળ્યો ન હતો.
