નવી દિલ્હી: કહેવાય છે કે દુનિયામાં એક સરખા ચહેરા ધરાવતા સાત લોકો હોય છે. દરેક વ્યક્તિને મનમાં એ જાણવાની ઉત્કંઠા હોય કે શું દુનિયામાં બીજું કોઈ વ્યક્તિ પણ હશે જે અદ્દલ તેમના જેવું જ દેખાતું હોય. વળી, આવી કોઈ વ્યક્તિ મળી જાય તો આશ્ચર્ય અને ખુશીનો પાર નહીં રહે. આજના સોશિયલ મીડિયાના જમાનામાં સેલ્ફી લઈ શેર કરવામાં એક મિનીટનો પણ વિલંબ નહીં કરે, પરંતુ જર્મનીમાં હમશકલ સાથે એક યુવતીએ એવી ક્રુરતા દાખવી છે જે જાણીને ધ્રુજારી છુટી જાય.
થોડા દિવસ અગાઉ જર્મનીની એક બ્યુટી બ્લોગરની હત્યા થઈ હતી. આ કેસમાં પોલીસની તપાસમાં ચોંકાવનારા ખુલાસા થયા છે. ખરેખર બન્યું એવું છે કે આ બ્યુટી બ્લોગરની હત્યા તેના જેવી જ દેખાતી એક યુવતીએ કરી છે. હત્યારી યુવતીએ સોશિયલ મીડિયાની મદદથી જર્મનીની બ્યુટી બ્લોગરને શોધી અને ત્યાર બાદ તેને મળવા બોલાવી પોતાના બોયફ્રેન્ડ સાથે મળી હત્યા કરી દીધી હતી.
આ કેસની વિગતો એવી છે કે વર્ષ 2022માં 23 વર્ષીય જર્મન બ્યુટી બ્લોગર ખદીદજા ની હત્યા થઈ હતી. આ કેસમાં પોલીસે શરાબન કે (Sharaban K)નામની યુવતી અને તેના બોયફ્રેન્ડ શેકીર કે (Shekir K) ની ધરપકડ કરી છે. પોલીસ પૂછપરછમાં શરાબન કે એ જે વિગતો કહી તે સાંભળી પોલીસ પણ ચોંકી ગઈ હતી. ખરેખર બન્યું એવું કે શરાબન કે નો પરિવાર સાથે કોઈક મામલે વિવાદ ચાલી રહ્યો હતો. તેથી તે પોતાના પરિવારને સબક શીખવાડવા માંગતી હતી. આ સાથે જ તે પરિવારથી દૂર કયાંક જતી રહેવા માંગતી હતી. તેથી શરાબન કે એ પોતાના મૃત્યનો કારસો રચ્યો હતો. આ માટે શરાબનને પોતાના જેવી જ દેખાતી યુવતીની જરૂર હતી. તેથી તેણીએ સોશ્યિલ મીડિયા પર પોતાની હમશકલની શોધ ચલાવી હતી. તેની શોધ જર્મનીની બ્યુટી બ્લોગર ખદીદજાની પર જઈ અટકી હતી.
સોશિયલ મીડિયા પર મિત્રતા કર્યા બાદ શરાબન કે એ ખદીદજાનીને મળવા બોલાવી હતી. મિત્રભાવે ખદીદજાની તેને મળવા પહોંચી ત્યારે તેને પોતાના બદઈરાદાને અંજામ આપ્યો હતો. બોયફ્રેન્ડ શેરીફ કે સાથે મળી તે ખદીદજાનીને જંગલામાં લઈ ગઈ હતી. જ્યાં ખદીદજાની પર ધારદાર હત્યારથી 50થી વધુ ઘા કરી તેને મોતને ઘાટ ઉતારી હતી. ત્યાર બાદ તેની લાશને એવી જગ્યાએ છુપાવી જ્યાંથી તે લોકોની નજરે પડે. લાશને મુકી તે બોયફ્રેન્ડ સાથે ભાગી ગઈ હતી. જોકે, તેનો આ પ્લાન નિષ્ફળ રહ્યો હતો. જે સોશિયલ મીડિયાની મદદથી તેને ખદીદજાનીની હત્યા કરી હતી તે જ સોશિયલ મીડિયાએ તેના ગુનાનો ભાંડો ફોડ્યો હતો. પોલીસે શરબન કે અને તેના બોયફ્રેન શેરીફ કે.ની ધરપકડ કરી કાર્યવાહી હાથ ધરી છે.
