ગાંધીનગર
કચ્છ જિલ્લાના સરહદી વિસ્તાર લખપત તાલુકાના તહેરા ગામ નજીક બાવળોની ઝાડીમાંથી શંકાસ્પદ ડ્રોન મળતાં ચકચાર મચી જવા પમી છે. જેના પગલે સુરક્ષા એજન્સીઓ એલર્ટ મોડ પર આવી ગઈ છે. પશ્ચિમ કચ્છના નારણ સરોવર વિસ્તાર નજીક બનેલી આ ઘટનાને સુરક્ષા દૃષ્ટિએ અત્યંત ગંભીર માનવામાં આવી રહી છે.
આ અંગે મળતી માહિતી મુજબ સ્થાનિક લોકોને લખપતના તહેરા ગામ નજીક બાવળોની ઝાડીમાં શંકાસ્પદ ઉપકરણ દેખાતા પોલીસને જાણ કરવામાં આવી હતી. પોલીસએ તપાસ કરતા ત્યાંથી અંદાજે 8×8 કદનું ડ્રોન મળી આવ્યું હતું. ડ્રોન સાથે તેના ચાર પંખા પણ મળી આવ્યા હોવાનું જાણવા મળ્યું છે.ઘટનાની જાણ થતાં જ પોલીસ તેમજ અન્ય સુરક્ષા એજન્સીઓનો કાફલો તાત્કાલિક ઘટનાસ્થળે પહોંચી ગયો હતો. સુરક્ષા એજન્સીઓએ સમગ્ર વિસ્તારને કોર્ડન કરીને તપાસ હાથ ધરી હતી. પ્રાથમિક તપાસમાં મળેલું ડ્રોન ચીની બનાવટનું હોવાની આશંકા વ્યક્ત કરવામાં આવી રહી છે.
પોલીસે ડ્રોનને કબ્જે લઈ ફોરેન્સિક તપાસ માટે મોકલી આપ્યું છે. સાથે જ આ ડ્રોન અહીં સુધી કેવી રીતે પહોંચ્યું, તેનો ઉપયોગ કયા હેતુસર થવાનો હતો અને તેની પાછળ કોઈ શંકાસ્પદ પ્રવૃત્તિ અથવા ગેરકાયદેસર નેટવર્ક સંકળાયેલું છે કે નહીં તે મુદ્દે ઊંડાણપૂર્વક તપાસ હાથ ધરવામાં આવી રહી છે.
