કોરોના મહામારીને લઈને દુનિયાભરમાં વર્ષોથી ચાલી રહેલી ચર્ચા વચ્ચે અમેરિકાના પૂર્વ ડાયરેક્ટર ઓફ નેશનલ ઇન્ટેલિજન્સ તુલસી ગબાર્ડે એક મોટો દાવો કરીને ફરી વિવાદ ઉભો કર્યો છે. ગબાર્ડે પોતાના કાર્યકાળના અંતિમ દિવસે કેટલાક ગુપ્ત દસ્તાવેજો જાહેર કર્યા અને આરોપ લગાવ્યો કે અમેરિકાના જાણીતા વૈજ્ઞાનિક ડૉ. એન્થની ફૌસીએ ચીનની વુહાન ઇન્સ્ટિટ્યૂટ ઓફ વાયરોલોજીને લાખો ડોલરનું ફંડિંગ આપ્યું હતું. ગબાર્ડના જણાવ્યા મુજબ, આ ફંડનો ઉપયોગ ચામાચીડિયાઓમાં જોવા મળતા કોરોના વાયરસ પર એવા સંશોધન માટે કરવામાં આવ્યો હતો, જેમાં વાયરસને વધુ ચેપી અને વધુ ખતરનાક બનાવવાનો પ્રયાસ કરવામાં આવ્યો હતો. આ દાવાએ ફરી એકવાર કોરોના વાયરસની ઉત્પત્તિ અને તેની પાછળની સંભવિત લેબ થિયરી અંગે ચર્ચા શરૂ કરી છે.
ગબાર્ડે આરોપ લગાવ્યો કે જ્યારે કોરોના મહામારી સમગ્ર વિશ્વમાં ફેલાઈ, ત્યારે ડૉ. ફૌસીએ લેબમાંથી વાયરસ લીક થવાની શક્યતા અંગેની ચર્ચાઓને દબાવવાનો પ્રયાસ કર્યો હતો. તેમનું કહેવું છે કે વુહાન લેબમાં ચાલતા કેટલાક સંશોધનો વિશે પૂરતી માહિતી જાહેર કરવામાં આવી નહોતી અને લોકોને અલગ દિશામાં વિચારવા માટે પ્રેરિત કરવામાં આવ્યા હતા. આ સમગ્ર મામલામાં સૌથી વધુ ચર્ચા ‘ગેન-ઓફ-ફંક્શન રિસર્ચ’ને લઈને થઈ રહી છે. આ પ્રકારના સંશોધનમાં વૈજ્ઞાનિકો કોઈ વાયરસને વધુ શક્તિશાળી અથવા વધુ ઝડપથી ફેલાઈ શકે તેવો બનાવે છે. આવા સંશોધનનો હેતુ ભવિષ્યમાં સંભવિત મહામારીઓને સમજવાનો અને તેની સામે રસી અથવા સારવાર વિકસાવવાનો હોય છે. જોકે, વિવાદકર્તાઓનું માનવું છે કે આવા પ્રયોગોમાં જોખમ પણ ઘણું મોટું હોય છે, કારણ કે જો વાયરસ લેબમાંથી બહાર નીકળી જાય તો ગંભીર પરિણામો આવી શકે છે.
ગબાર્ડનો દાવો છે કે વુહાન લેબમાં ચામાચીડિયાના કોરોના વાયરસ પર આવું જ સંશોધન ચાલી રહ્યું હતું. તેઓ માને છે કે કોવિડ-19 મહામારીની શરૂઆત પણ આ લેબમાંથી અકસ્માતે થયેલા લીકેજને કારણે થઈ હોઈ શકે છે. જોકે, આ દાવા અંગે હજુ સુધી વૈશ્વિક સ્તરે કોઈ અંતિમ અને સર્વસ્વીકૃત પુરાવો સામે આવ્યો નથી. પૂર્વ ગુપ્તચર પ્રમુખે વધુ એક ગંભીર આરોપ લગાવતા કહ્યું કે કોરોના વાયરસની ઉત્પત્તિ અંગે એક ચોક્કસ વાતાવરણ ઉભું કરવા માટે કેટલાક વૈજ્ઞાનિકો અને નિષ્ણાતોની મદદ લેવામાં આવી હતી. તેમના જણાવ્યા અનુસાર, કેટલાક લોકો દ્વારા એવા અભ્યાસ અને રિપોર્ટ રજૂ કરવામાં આવ્યા હતા, જેમાં વાયરસ કુદરતી રીતે પ્રાણીઓમાંથી મનુષ્યોમાં ફેલાયો હોવાનું દર્શાવવામાં આવ્યું હતું. ગબાર્ડે એવું પણ જણાવ્યું કે કેટલાક ગુપ્તચર વિશ્લેષકો અને અધિકારીઓએ લેબ લીક થિયરી અંગે સવાલો ઉઠાવ્યા હતા, પરંતુ તેમને પૂરતું સમર્થન મળ્યું નહોતું. કેટલાક વ્હિસલબ્લોઅર્સના નિવેદનોના આધારે તેમણે દાવો કર્યો કે અલગ મત ધરાવતા લોકોને દબાણનો સામનો કરવો પડ્યો હતો.
ડૉ. એન્થની ફૌસી કોરોના મહામારી દરમિયાન અમેરિકાના સૌથી જાણીતા જાહેર આરોગ્ય નિષ્ણાતોમાંના એક રહ્યા હતા. ટ્રમ્પ સરકાર દરમિયાન કોરોના સામેની લડતમાં તેઓ મુખ્ય ચહેરા તરીકે ઉભરી આવ્યા હતા. પરંતુ મહામારી દરમિયાન અને ત્યારબાદ પણ તેઓ અનેક વખત રાજકીય અને વૈજ્ઞાનિક વિવાદોના કેન્દ્રમાં રહ્યા હતા. ફૌસી સામે અગાઉ પણ આરોપ લાગ્યા હતા કે અમેરિકી સરકારી ફંડનો એક ભાગ ‘ઈકોહેલ્થ એલાયન્સ’ નામની સંસ્થા મારફતે વુહાન લેબ સુધી પહોંચ્યો હતો. 2021માં અમેરિકી સંસદ સમક્ષ તેમણે જણાવ્યું હતું કે તેમની એજન્સીએ વાયરસને વધુ ખતરનાક બનાવતા સંશોધન માટે સીધું ફંડિંગ આપ્યું નહોતું. જોકે, બાદમાં કેટલાક દસ્તાવેજો સામે આવ્યા બાદ તેમના નિવેદનો પર સવાલો ઉઠ્યા હતા.
બીજી તરફ, ડૉ. ફૌસી સતત કહેતા આવ્યા છે કે કોરોના વાયરસની ઉત્પત્તિ અંગે હજુ સુધી કોઈ અંતિમ અને નિશ્ચિત નિષ્કર્ષ આવ્યો નથી. તેમના મતે, વૈજ્ઞાનિક તપાસ અને પુરાવાઓના આધારે જ સત્ય સામે આવી શકે. આ સમગ્ર વિવાદ વચ્ચે તુલસી ગબાર્ડ પણ ચર્ચામાં છે. તેઓ ટ્રમ્પ સરકારમાં ડાયરેક્ટર ઓફ નેશનલ ઇન્ટેલિજન્સ તરીકે કાર્યરત હતા અને તેમના હેઠળ અમેરિકાની 18 ગુપ્તચર એજન્સીઓ કામ કરતી હતી. તાજેતરમાં તેમણે પોતાના પદ પરથી રાજીનામું આપ્યું હતું. અહેવાલો મુજબ, તેઓ પોતાના પરિવાર સાથે વધુ સમય વિતાવવા માંગે છે. કોરોના મહામારીને લઈને નવા દાવા અને આરોપો સામે આવતા ફરી એકવાર દુનિયાનું ધ્યાન વુહાન લેબ, ગેન-ઓફ-ફંક્શન રિસર્ચ અને કોવિડ-19ની વાસ્તવિક ઉત્પત્તિ તરફ ગયું છે. જોકે, આ દાવાઓ અંગે હજુ પણ વૈજ્ઞાનિક અને રાજકીય સ્તરે ચર્ચા ચાલુ છે અને અંતિમ સત્ય શું છે તે અંગે સ્પષ્ટતા થવાની બાકી છે.
