વિદ્યાર્થીઓની સુવિધાને પ્રાથમિકતા આપતા પ્રધાનમંત્રી નરેન્દ્ર મોદીએ આજે (રવિવાર) એક નોંધપાત્ર પગલું ભર્યું. સૂત્રોના જણાવ્યા અનુસાર બપોરે 1:15 વાગ્યે દિલ્હી એરપોર્ટ પર પહોંચ્યા પછી PM મોદીએ સીધા તેમના નિવાસસ્થાને જવાને બદલે એરપોર્ટ પર થોડો સમય રોકાવાનું નક્કી કર્યું હતું. પીએમ મોદી 45 મિનિટ અહીં રોકાયા હતા.
નોંધનીય છે કે આજે દેશભરમાં યોજાનારી NEET પરીક્ષા બપોરે 2:00 વાગ્યે શરૂ થવાની હતી. મોટી સંખ્યામાં વિદ્યાર્થીઓ અને તેમના વાલીઓ પરીક્ષા કેન્દ્રો તરફ જઈ રહ્યા હતા. PM મોદીના કાફલાની અવરજવરને કારણે દિલ્હીના ચોક્કસ રસ્તાઓ પર ટ્રાફિક ખોરવાઈ શકે તેવી શક્યતા હતી. આને ધ્યાનમાં રાખીને PM મોદીએ એરપોર્ટથી પ્રસ્થાનમાં વિલંબ કર્યો જેથી વિદ્યાર્થીઓને સમયસર તેમના પરીક્ષા કેન્દ્રો પર પહોંચવામાં કોઈ મુશ્કેલી ન પડે.
PM મોદીએ વિદ્યાર્થીઓની સુવિધા માટે નિર્ણય લીધો
સૂત્રોના જણાવ્યા અનુસાર PM મોદીએ ટ્રાફિકનો પ્રવાહ સુગમ રાખવા અને વિદ્યાર્થીઓની સુવિધાને પ્રાથમિકતા આપવા માટે આ નિર્ણય લીધો હતો. આનાથી દિલ્હીના રસ્તાઓ પર ટ્રાફિક અવિરત રહે અને પરીક્ષામાં જતા વિદ્યાર્થીઓને વિલંબ ન થાય અથવા ટ્રાફિક સંબંધિત કોઈ સમસ્યાનો સામનો ન કરવો પડે.
નેશનલ એલિજિબિલિટી-કમ-એન્ટ્રન્સ ટેસ્ટ (NEET)-UG 2026 માટે ફરીથી પરીક્ષા રવિવારે બપોરે 2:00 વાગ્યે કડક સુરક્ષા વચ્ચે દેશભરમાં શરૂ થઈ હતી. અગાઉની પરીક્ષામાં ગેરરીતિના આરોપોને પગલે આ પરીક્ષા કડક તપાસ હેઠળ લેવામાં આવી રહી છે. ભારતના 551 શહેરો અને 14 આંતરરાષ્ટ્રીય સ્થળોએ ફેલાયેલા 5,440 પરીક્ષા કેન્દ્રો પર 22.79 લાખથી વધુ ઉમેદવારો હાજર રહે તેવી અપેક્ષા છે.
3 મેના રોજ યોજાયેલી પ્રારંભિક પરીક્ષા દરમિયાન પેપર લીક અને વહીવટી ભૂલો અંગેના મોટા વિવાદો અને આક્ષેપો બાદ નેશનલ ટેસ્ટિંગ એજન્સી (NTA) અને વહીવટીતંત્રે ફરીથી પરીક્ષા માટે બહુ-સ્તરીય સુરક્ષા અને લોજિસ્ટિકલ માળખું અમલમાં મૂક્યું છે. પેન-એન્ડ-પેપર પરીક્ષા બપોરે ૨:૦૦ થી સાંજે ૫:૧૫ વાગ્યા સુધી લેવામાં આવશે.
મોડા પહોંચનાર વિદ્યાર્થીઓને પ્રવેશ નહીં
વિદ્યાર્થીઓને સવારે ૧૧:૦૦ થી ૧:૩૦ વાગ્યા સુધી પરીક્ષા કેન્દ્રોમાં પ્રવેશ આપવામાં આવ્યો હતો. પ્રવેશપત્ર અને ઓળખ પુરાવાઓની ચકાસણી પછી વિદ્યાર્થીઓની સુરક્ષા તપાસ કરવામાં આવી હતી. જોકે મુંબઈમાં બે અને બેંગલુરુમાં ચાર વિદ્યાર્થીઓને મોડા પહોંચવા બદલ પ્રવેશ નકારવામાં આવ્યો હતો. બેંગલુરુમાં કેટલીક મહિલા વિદ્યાર્થીઓએ રેલિંગ પર ચઢીને પ્રવેશ મેળવવાનો પ્રયાસ કર્યો હતો પરંતુ પરીક્ષા ખંડના દરવાજા પહેલાથી જ બંધ કરી દેવામાં આવ્યા હતા. રાજસ્થાનના અજમેરમાં એક કેન્દ્ર પર, હિજાબ પહેરેલી એક વિદ્યાર્થીનીને શરૂઆતમાં પ્રવેશ નકારવામાં આવ્યો હતો. ઉગ્ર દલીલ પછી જ તેને અંદર જવા દેવામાં આવી હતી.
