યોગી આદિત્યનાથની ‘મનપસંદ’ ટીમ તૈયાર થવાની તૈયારી
ઉત્તર પ્રદેશની રાજનીતિમાં મોટા બદલાવના સંકેત જોવા મળી રહ્યા છે. મુખ્યમંત્રી Yogi Adityanathની સરકારમાં ટૂંક સમયમાં કેબિનેટ વિસ્તરણ અને ભાજપ સંગઠનમાં મોટા પાયે ફેરફારો થઈ શકે તેવી ચર્ચા તેજ બની છે. પાર્ટી અને સરકાર બંને સ્તરે ચાલી રહેલી બેઠકોએ આ અટકળોને વધુ મજબૂત બનાવી છે.
સૂત્રોના જણાવ્યા મુજબ, ભાજપના કેન્દ્રીય અને રાજ્ય સ્તરના નેતાઓ વચ્ચે સતત બેઠકો થઈ રહી છે, જેમાં નવી ટીમ રચવા અને સંગઠનને વધુ મજબૂત બનાવવાના મુદ્દાઓ પર ચર્ચા થઈ રહી છે. ખાસ કરીને 2027ની ઉત્તર પ્રદેશ વિધાનસભા ચૂંટણીને ધ્યાનમાં રાખીને આ ફેરફારો મહત્વપૂર્ણ માનવામાં આવી રહ્યા છે.
માહિતી અનુસાર કેબિનેટમાં નવા ચહેરાઓને તક આપવાની સાથે કેટલાક હાલના મંત્રીઓના વિભાગોમાં ફેરફાર અથવા કેટલાકને હટાવવાની શક્યતા પણ ચર્ચામાં છે. અંદાજે 15 જેટલા નવા ચહેરાઓને સ્થાન મળવાની અને એક ડઝનથી વધુ મંત્રીઓની જવાબદારી બદલાઈ શકે તેવી ચર્ચા ચાલી રહી છે.આ ઉપરાંત ભાજપ સંગઠન સ્તરે પણ મોટા ફેરફારો શક્ય છે. રાજ્ય સંગઠનને વધુ સશક્ત બનાવવા માટે વિવિધ પદો પર નવા નેતાઓની નિમણૂક અને સંગઠનના માળખામાં ફેરફારો અંગે ચર્ચા થઈ રહી છે. મુખ્યમંત્રી યોગી આદિત્યનાથ અને રાજ્ય ભાજપ અધ્યક્ષ વચ્ચે થયેલી બેઠક બાદ આ અટકળો વધુ તેજ બની છે.
પાર્ટી સૂત્રો મુજબ આ ફેરફારોમાં જાતિ અને પ્રાદેશિક સમીકરણોને સંતુલિત રાખવાનો ખાસ પ્રયાસ કરવામાં આવી રહ્યો છે, જેથી વિવિધ સમાજના વર્ગોમાં રાજકીય સમર્થન મજબૂત થઈ શકે. ખાસ કરીને બ્રાહ્મણ, ઓબીસી અને અન્ય મહત્વપૂર્ણ મતદારોને ધ્યાનમાં રાખીને નવી ટીમ તૈયાર કરવાની વ્યૂહરચના ચાલી રહી છે.
રાજકીય વિશ્લેષકોનું માનવું છે કે આ કેબિનેટ વિસ્તરણ અને સંગઠન ફેરફારો યોગી સરકાર માટે ચૂંટણી પહેલા ઈમેજ રિફ્રેશ અને રાજકીય સંતુલન મજબૂત કરવાનો પ્રયાસ તરીકે જોવામાં આવી રહ્યા છે. જોકે અંતિમ નિર્ણય ભાજપના કેન્દ્રીય નેતૃત્વની મંજૂરી બાદ જ જાહેર થશે.આગામી દિવસોમાં ઉત્તર પ્રદેશની રાજનીતિમાં મોટા ફેરફારો જોવા મળી શકે છે અને “યોગીની નવી ટીમ” અંગેની ચર્ચાઓ હવે વધુ તેજ બની ગઈ છે.
