અમેરિકાના ડિફેન્સ મેનપાવર ડેટા સેન્ટરમાં અનધિકૃત ઍક્સેસ; સોશિયલ સિક્યુરિટી નંબરથી લઈને નોકરી અને વ્યક્તિગત વિગતો સુધીની માહિતી સામે આવી
અમેરિકાના પેન્ટાગોન સાથે જોડાયેલા એક વિશાળ કર્મચારી ડેટા સિસ્ટમમાં સાયબર સુરક્ષા ભંગનો મામલો સામે આવ્યો છે. “ડિફેન્સ મેનપાવર ડેટા સેન્ટર (DMDC)”ની સિસ્ટમમાં અનધિકૃત લોકો દ્વારા ઍક્સેસ મેળવવામાં આવી હતી, જેના કારણે આશરે 27.6 લાખ જીવિત લોકો અને 2.94 લાખ મૃત વ્યક્તિઓ, એટલે કે કુલ લગભગ 30.54 લાખ લોકોની વ્યક્તિગત માહિતી અસરગ્રસ્ત થઈ હોવાનું અમેરિકન સંરક્ષણ અધિકારીએ જણાવ્યું છે. આ માહિતીમાં સોશિયલ સિક્યુરિટી નંબર અને લોકો કઈ પ્રકારની નોકરી કરતા હતા તેની વિગતો પણ સામેલ હોવાનું સામે આવ્યું છે.
અમેરિકાના સંરક્ષણ વિભાગના જણાવ્યા મુજબ, DMDCની એક ઇન્ફોર્મેશન સિસ્ટમમાં ઓક્ટોબર 2025થી જુલાઈ 2026 દરમિયાન થોડા અનધિકૃત યુઝર્સે વ્યક્તિગત ઓળખ સંબંધિત માહિતી સુધી પહોંચ મેળવી હતી. જુલાઈમાં સુરક્ષા ખામીની જાણ થયા બાદ પેન્ટાગોને સિસ્ટમમાં જરૂરી સુધારા કરીને ખામીને દૂર કરી હતી. જોકે, અત્યાર સુધી આ લીક થયેલી માહિતીનો દુરુપયોગ થયો હોવાના કોઈ પુરાવા મળ્યા નથી, એવું અધિકારીઓએ જણાવ્યું છે.
DMDC પેન્ટાગોનના મહત્વના કર્મચારી રેકોર્ડ સેન્ટરોમાંથી એક છે. તેમાં સક્રિય સૈનિકો, રિઝર્વ સૈનિકો, નાગરિક કર્મચારીઓ, કોન્ટ્રાક્ટરો, નિવૃત્ત સૈનિકો, વેટરન્સ અને સૈનિકોના પરિવારજનો સહિત મોટી સંખ્યામાં લોકોના રેકોર્ડ રાખવામાં આવે છે. DMDC પાસે 6 કરોડથી વધુ કર્મચારી રેકોર્ડ હોવાની માહિતી પણ સામે આવી છે. તેથી આ સાયબર સુરક્ષા ભંગની અસર માત્ર વર્તમાન સૈનિકો પૂરતી મર્યાદિત નથી.
લીક થયેલી માહિતીમાં કેટલાક કેસમાં સૈનિકોની ‘ઓક્યુપેશનલ સ્પેશિયાલિટી’, એટલે કે તેઓ સેનામાં કયા પ્રકારનું કામ કરે છે તેની વિગતો પણ સામેલ હતી. નિષ્ણાતોના મતે, જો આવી માહિતી અન્ય ડેટાબેઝ સાથે જોડાય તો કોઈ વ્યક્તિની ઓળખ, નોકરીની ભૂમિકા અને અન્ય વ્યક્તિગત વિગતો વિશે વધુ માહિતી મેળવી શકાય છે. આ કારણે ડેટા ભંગને લઈને કાઉન્ટર-ઇન્ટેલિજન્સ અને રાષ્ટ્રીય સુરક્ષાની ચિંતાઓ ઊભી થઈ છે.
અહેવાલ મુજબ, ચોરી થયેલા ડેટાને એન્ક્રિપ્ટ કરવામાં આવ્યો ન હતો, જે સુરક્ષાના દૃષ્ટિકોણથી મહત્વનો મુદ્દો બની શકે છે. નિષ્ણાતોએ ચેતવણી આપી છે કે આ પ્રકારની માહિતીનો ઉપયોગ ફિશિંગ, વ્યક્તિગત પ્રોફાઇલિંગ અથવા લક્ષિત સાયબર હુમલાઓ માટે થઈ શકે છે, ખાસ કરીને જો તેને અન્ય વ્યાપારી અથવા ઓનલાઈન ડેટા સાથે જોડવામાં આવે. જોકે, અમેરિકી અધિકારીઓએ અત્યાર સુધી માહિતીનો વાસ્તવિક દુરુપયોગ થયો હોવાની પુષ્ટિ કરી નથી.પેન્ટાગોન દ્વારા અસરગ્રસ્ત લોકોને ઓળખ સુરક્ષા અને ક્રેડિટ મોનિટરિંગ જેવી સેવાઓ પૂરી પાડવાની કાર્યવાહી કરવામાં આવી રહી છે. હાલમાં તપાસ ચાલુ છે અને આ સાયબર હુમલા પાછળ કોણ હતું તે અંગે કોઈ સત્તાવાર નિષ્કર્ષ જાહેર થયો નથી. ઘટનાએ અમેરિકાના વિશાળ સૈન્ય કર્મચારી ડેટાબેઝની સુરક્ષા અંગે ગંભીર સવાલો ઊભા કર્યા છે.
