સપ્તાહના પ્રથમ દિવસે જ ભારતીય શેરબજારમાં ભારે કડાકો જોવા મળ્યો છે. બજાર ખુલતાની સાથે જ સેન્સેક્સ અને નિફ્ટી બંને સૂચકાંકોમાં જોરદાર ઘટાડો નોંધાયો હતો. ચારેય તરફ વેચવાલી જોવા મળતાં રોકાણકારોમાં ચિંતા વધી હતી અને બજાર મૂડીમાં લાખો કરોડ રૂપિયાનું નુકસાન થયું હતું. બોમ્બે સ્ટોક એક્સચેન્જનો 30 શેર ધરાવતો સેન્સેક્સ શુક્રવારે 73,895ના સ્તરે બંધ થયો હતો. સોમવારે તે 73,734ના સ્તરે ખુલ્યો હતો. શરૂઆતના કારોબારમાં જ વેચવાલી વધી જતા સેન્સેક્સ 900થી વધુ પોઇન્ટ તૂટીને 72,981ના સ્તરે પહોંચી ગયો હતો.
નિફ્ટીની સ્થિતિ પણ આવી જ રહી હતી. નેશનલ સ્ટોક એક્સચેન્જનો નિફ્ટી અગાઉના 23,140ના બંધ સ્તરની સામે 23,065 પર ખુલ્યો હતો. ત્યારબાદ વેચવાલી વધતાં તે 23,000ના મહત્વપૂર્ણ સ્તરથી નીચે સરકી ગયો હતો અને લગભગ 280 પોઇન્ટના ઘટાડા સાથે 22,855ના સ્તરે ટ્રેડ થતો જોવા મળ્યો હતો. બજારમાં આવેલા આ ઘટાડાની અસર મોટા ભાગના શેરો પર જોવા મળી હતી. લાર્જ કેપથી લઈને અન્ય સેગમેન્ટના શેરોમાં પણ વેચવાલી જોવા મળી હતી. બેન્કિંગ અને IT જેવા મહત્વના સેક્ટરમાં પણ ઘટાડો નોંધાયો હતો.
મોટા શેરોમાં HDFC Bankનો શેર આશરે 1.90 ટકા, Kotak Bank 1.80 ટકા, SBI 1.60 ટકા, HUL 1.58 ટકા, Trent 1.56 ટકા, Bajaj Finance 1.40 ટકા, Reliance 1.35 ટકા અને ICICI Bank 1.34 ટકા ઘટ્યા હતા. BSE Bankexમાં આશરે 1.60 ટકા અને IT ઇન્ડેક્સમાં લગભગ 1.10 ટકાનો ઘટાડો નોંધાયો હતો. બજારમાં એકસાથે થયેલી આ ભારે વેચવાલીને કારણે રોકાણકારોની સંપત્તિમાં પણ મોટો ઘટાડો થયો હતો. શરૂઆતના કારોબારમાં જ રોકાણકારોના આશરે રૂ.6 લાખ કરોડથી વધુનું બજાર મૂલ્ય ઘટી ગયું હોવાનું જણાવાયું હતું.
શેરબજારના આ ઘટાડા પાછળ અનેક આંતરરાષ્ટ્રીય અને સ્થાનિક પરિબળો જવાબદાર છે. ખાસ કરીને અમેરિકા અને ઈરાન વચ્ચેના તણાવને લઈને રોકાણકારોમાં ચિંતા વધી છે. શાંતિ વાર્તામાં પ્રગતિ ન થવાથી વૈશ્વિક બજારમાં અનિશ્ચિતતા વધી છે. આ સ્થિતિની સીધી અસર ક્રૂડ ઓઈલના ભાવ પર પણ જોવા મળી રહી છે. ક્રૂડ ઓઈલના ભાવમાં વધારો ભારત જેવા ક્રૂડની મોટી આયાત કરતા દેશ માટે ચિંતાનો વિષય છે. ક્રૂડ મોંઘું થાય ત્યારે દેશનું આયાત બિલ વધી શકે છે અને તેની અસર રૂપિયા સહિત અર્થતંત્રના વિવિધ ભાગો પર પડી શકે છે. આ જ કારણોસર શેરબજારમાં પણ રોકાણકારો સાવચેતીભર્યું વલણ અપનાવી રહ્યા છે.
આ ઉપરાંત વિદેશી સંસ્થાગત રોકાણકારો એટલે કે FIIની સતત વેચવાલી પણ બજાર પર દબાણ વધારી રહી છે. અગાઉના સત્રમાં FII દ્વારા રૂ.3,600 કરોડથી વધુની વેચવાલી કરવામાં આવી હતી. વિદેશી રોકાણકારો મોટા પ્રમાણમાં શેર વેચે ત્યારે બજારમાં નાણાંનો પ્રવાહ ઘટે છે અને તેના કારણે મુખ્ય સૂચકાંકો પર દબાણ આવી શકે છે. હાલમાં વૈશ્વિક સ્તરે વ્યાજદર, ડૉલરની સ્થિતિ, ક્રૂડ ઓઈલના ભાવ અને મિડલ ઈસ્ટમાં ચાલી રહેલા તણાવ જેવા પરિબળો પર રોકાણકારોની નજર છે. આ ઉપરાંત આગામી આર્થિક આંકડા અને વૈશ્વિક બજારોના સંકેતો પણ ભારતીય બજારની દિશા નક્કી કરવામાં મહત્વની ભૂમિકા ભજવી શકે છે. સોમવારના કારોબારમાં શરૂઆતથી જ જોવા મળેલી ભારે વેચવાલીથી સ્પષ્ટ થયું કે હાલમાં બજારમાં રોકાણકારો જોખમ લેવાના બદલે સાવચેતી રાખી રહ્યા છે. જોકે, દિવસ દરમિયાન બજારની સ્થિતિમાં સુધારો થાય છે કે વેચવાલી વધુ વધે છે તેના પર આગળની દિશા નિર્ભર રહેશે.
