ઉત્તરાખંડમાં ભૂસ્ખલનને કારણે આદિ કૈલાશ માર્ગ સહિત ૮૬ રસ્તાઓ બંધ થઈ ગયા છે. તેમાં ચમોલીમાં ૨૧, નૈનીતાલમાં ૧૮ અને પિથોરાગઢમાં ૧૫ રસ્તાઓનો સમાવેશ થાય છે. હિમવર્ષા વચ્ચે ઉત્તરકાશીના ઊંચાઈવાળા વિસ્તારોમાં ૧૩૬ પર્વતારોહકો, ટ્રેકર્સ અને સહાયક કર્મચારીઓ ફસાયા છે; બચાવ કામગીરી ચાલુ છે.
દરમિયાન નેપાળ દ્વારા ગંડક નદીમાં પાણી છોડવાને કારણે બિહારના પશ્ચિમ ચંપારણ અને સુપૌલ જિલ્લાના ૨૩ ગામોમાં પૂરની સ્થિતિ સર્જાઈ છે, જેનાથી અંદાજે ૮૨,૦૦૦ લોકો પ્રભાવિત થયા છે. ઉત્તર પ્રદેશમાં છેલ્લા ચાર દિવસથી સતત પડી રહેલા વરસાદને કારણે અનેક નદીઓના જળસ્તરમાં વધારો થયો છે; ગોંડા અને બદાઉનમાં નાના પુલો પરથી પાણી વહી રહ્યું છે. રાજ્યમાં છેલ્લા બે દિવસમાં વાવાઝોડા અને વરસાદને કારણે ૬૩ લોકોનાં મોત થયાં છે.
રાજ્યમાં આઠ નદીઓ ભયજનક સપાટીથી ઉપર વહી રહી છે. કુશીનગરમાં બે ગામોના ૧,૪૦૦ પરિવારો પ્રભાવિત થયા છે અને ૪૬ જિલ્લાઓ માટે ભારે વરસાદની ચેતવણી જારી કરવામાં આવી છે. છત્તીસગઢમાં ભારે વરસાદને કારણે મહારાષ્ટ્રના ગડચિરોલી જિલ્લાના અનેક વિસ્તારોમાં પૂર જેવી સ્થિતિ સર્જાઈ છે. મધ્ય પ્રદેશના જબલપુર, સાગર, શહડોલ અને રીવા વિભાગોમાં ત્રણ દિવસથી વરસાદ પડી રહ્યો છે.
છત્તીસગઢમાં પૂર દરમિયાન IAF દ્વારા ૧૨ લોકોનો બચાવ
છત્તીસગઢમાં માલ્લીગુડા અને છત્રીપુટ રેલવે સ્ટેશનો વચ્ચે ભૂસ્ખલનને કારણે રેલવેના પાટા હવામાં અધ્ધર લટકી ગયા છે. આ માર્ગ પરની તમામ પેસેન્જર અને માલગાડીઓ રદ કરવામાં આવી છે અને રેલવેને કરોડોનું નુકસાન થવાની શક્યતા છે. ભારતીય વાયુસેના (IAF) એ હેલિકોપ્ટરની મદદથી છત્તીસગઢના દંતેવાડા નજીક ઈન્દ્રાવતી નદીમાં પૂરને કારણે ફસાયેલા ૧૨ લોકોને સુરક્ષિત રીતે બચાવી લીધા છે. આ લોકો ડોંગાઘાટ ગામ નજીક નદી કિનારે આવેલી એક કામચલાઉ ઝૂંપડીના છાપરા પર ફસાયા હતા; પૂરના વધતા પાણીને કારણે છાપરું ધરાશાયી થવાનું જોખમ હતું. લોકોને સુરક્ષિત સ્થળે ખસેડવામાં મદદ કરવા માટે એક ગરુડ કમાન્ડોને છત પર ઉતારવામાં આવ્યો હતો.
હિમાચલ પ્રદેશ: વરસાદ અને હિમવર્ષાને કારણે ઠંડીમાં વધારો
હિમાચલ પ્રદેશના વિવિધ વિસ્તારોમાં તાજા વરસાદ અને હિમવર્ષા બાદ તાપમાનમાં નોંધપાત્ર ઘટાડો નોંધાયો છે. રાજ્યનું સરેરાશ મહત્તમ તાપમાન સામાન્ય કરતાં ૧.૯ ડિગ્રી સેલ્સિયસ નીચે ગયું છે. કિન્નૌરના કલ્પામાં મહત્તમ તાપમાન ઘટીને ૮.૨ ડિગ્રી સેલ્સિયસ થઈ ગયું હતું જે સામાન્ય સ્તર કરતાં ૧૨.૧ ડિગ્રી ઓછું છે.
