Business

કે.એલ. રાહુલે રચ્યો ઇતિહાસ, ચારેય SENA દેશોમાં સદી ફટકારનાર પ્રથમ ભારતીય ઓપનર બન્યો

ભારતીય ક્રિકેટર કે.એલ. રાહુલે ન્યૂઝીલેન્ડ સામેની પ્રથમ ટેસ્ટ મેચમાં શાનદાર સદી ફટકારીને ઇતિહાસ રચ્યો છે. વેલિંગ્ટનના બેસિન રિઝર્વ મેદાન પર રમાઈ રહેલી આ મેચમાં રાહુલે સંયમ અને શાનદાર ટેક્નિકનો પરિચય આપતાં ત્રીજા દિવસે પોતાની સદી પૂરી કરી હતી. આ સાથે જ તેણે એવી સિદ્ધિ હાંસલ કરી છે, જે અત્યાર સુધી કોઈ ભારતીય ઓપનર મેળવી શક્યો નથી. રાહુલ હવે દક્ષિણ આફ્રિકા, ઇંગ્લેન્ડ, ન્યૂઝીલેન્ડ અને ઓસ્ટ્રેલિયા એટલે કે ચારેય SENA દેશોમાં ટેસ્ટ સદી ફટકારનાર પ્રથમ ભારતીય ઓપનર બની ગયો છે.

ન્યૂઝીલેન્ડે પ્રથમ દાવમાં 368 રન બનાવ્યા હતા. તેના જવાબમાં ભારતીય ટીમ તરફથી બેટિંગ કરવા ઉતરેલા રાહુલે બીજા દિવસની રમતના અંતે 52 રન બનાવ્યા હતા અને તે અણનમ રહ્યો હતો. ત્રીજા દિવસે પણ તેણે પોતાની લય જાળવી રાખી હતી. ન્યૂઝીલેન્ડના ફાસ્ટ બોલરોની આકરી બોલિંગનો સામનો કરતાં રાહુલે 207 બોલમાં પોતાની સદી પૂરી કરી હતી. આ તેની ટેસ્ટ કારકિર્દીની 13મી સદી છે. ખાસ વાત એ છે કે ન્યૂઝીલેન્ડની ધરતી પર અને ન્યૂઝીલેન્ડ સામે ટેસ્ટ ક્રિકેટમાં આ તેની પ્રથમ સદી છે.

વેલિંગ્ટનમાં સદી ફટકારતાની સાથે જ રાહુલે ચારેય SENA દેશોમાં ટેસ્ટ સદી નોંધાવવાની સિદ્ધિ મેળવી છે. અત્યાર સુધી ઘણા ભારતીય અને એશિયન દિગ્ગજ બેટ્સમેનોએ આ દેશોમાં સદી ફટકારી છે, પરંતુ ચારેય SENA દેશોમાં ટેસ્ટ સદી નોંધાવનાર પ્રથમ ભારતીય ઓપનર બનવાનું ગૌરવ હવે રાહુલને મળ્યું છે. આ સિદ્ધિ સાથે તે એશિયાના પસંદગીના ક્રિકેટરોની ખાસ યાદીમાં પણ સામેલ થયો છે.

ચારેય SENA દેશોમાં ટેસ્ટ સદી ફટકારનારા એશિયાઈ બેટ્સમેનોમાં મોહમ્મદ અઝહરુદ્દીન, સચિન તેંડુલકર, સઈદ અનવર, રાહુલ દ્રવિડ, યુનિસ ખાન, કુમાર સંગાકારા અને વિરાટ કોહલીનો સમાવેશ થાય છે. હવે આ યાદીમાં કે.એલ. રાહુલનું નામ પણ જોડાયું છે. વિદેશી પરિસ્થિતિઓમાં બેટિંગ કરવી ભારતીય બેટ્સમેનો માટે હંમેશાં પડકારજનક રહી છે. ખાસ કરીને SENA દેશોની પિચો પર ઝડપી બોલરોને મળતી મદદ વચ્ચે સદી ફટકારવી મોટી સિદ્ધિ માનવામાં આવે છે.

રાહુલ હવે ભારતના પૂર્વ ઓપનર સુનીલ ગાવસ્કરના એક ખાસ રેકોર્ડની નજીક પણ પહોંચી ગયો છે. SENA દેશોમાં બેટ્સમેન તરીકે રાહુલની આ સાતમી ટેસ્ટ સદી છે. આ યાદીમાં સુનીલ ગાવસ્કર આઠ સદી સાથે પ્રથમ સ્થાને છે. એટલે કે ગાવસ્કરના રેકોર્ડની બરાબરી કરવા માટે રાહુલને હવે માત્ર એક સદીની જરૂર છે. SENA દેશોમાં સૌથી વધુ ટેસ્ટ સદી ફટકારનારા ભારતીય ઓપનરોની યાદીમાં સુનીલ ગાવસ્કર આઠ સદી સાથે ટોચ પર છે. કે.એલ. રાહુલ સાત સદી સાથે બીજા સ્થાને છે. યશસ્વી જયસ્વાલ, વિનૂ માંકડ, વીરેન્દ્ર સેહવાગ અને રવિ શાસ્ત્રીના નામે ત્રણ-ત્રણ સદી નોંધાયેલી છે. ન્યૂઝીલેન્ડ સામેની આ સદીથી રાહુલે પોતાની કારકિર્દીમાં વધુ એક યાદગાર સિદ્ધિ ઉમેરી છે. હવે તેની નજર ગાવસ્કરના આઠ સદીના રેકોર્ડની બરાબરી કરવા પર રહેશે.

Most Popular

To Top