કેરળના રાજકારણમાં ભાજપને મોટો ફટકો પડ્યો છે. રાજ્યના પૂર્વ મુખ્યમંત્રી કે. કરુણાકરણની પુત્રી પદ્મજા વેણુગોપાલે ભાજપમાંથી રાજીનામું આપી દીધું છે. પાર્ટી છોડવા પાછળનું કારણ જણાવતાં તેમણે સ્વીકાર્યું હતું કે ભાજપમાં જોડાવાનો તેમનો નિર્ણય એક ભૂલ હતી. તેમણે કહ્યું કે તેઓ રાજીનામું આપી ચૂક્યાં છે, પરંતુ આ અંગે હજુ સુધી બહુ ઓછા લોકોને જાણ કરી છે.
પદ્મજા વેણુગોપાલના રાજીનામા બાદ તેમની કોંગ્રેસમાં ઘરવાપસી થવાની અટકળો પણ તેજ બની છે. રાજકીય વર્તુળોમાં એવી ચર્ચા છે કે તેઓ ફરી કોંગ્રેસમાં જોડાઈ શકે છે. જોકે, કોંગ્રેસમાં વાપસી અંગે તેમની તરફથી કોઈ સત્તાવાર જાહેરાત કરવામાં આવી નથી.
નોંધનીય છે કે પદ્મજા વેણુગોપાલે 7 માર્ચ, 2024ના રોજ ભાજપનો ખેસ ધારણ કર્યો હતો. તેમના પિતા કે. કરુણાકરણ કેરળના ચાર વખત મુખ્યમંત્રી રહી ચૂક્યા હતા. તેઓ કોંગ્રેસના દિગ્ગજ નેતા હતા અને સંયુક્ત લોકતાંત્રિક મોરચા (UDF)ની સ્થાપના સાથે પણ જોડાયેલા હતા. પદ્મજાના ભાજપમાં જોડાવાના નિર્ણયને તે સમયે કેરળના રાજકારણમાં મોટો ફેરફાર માનવામાં આવ્યો હતો. હવે લગભગ અઢી વર્ષ બાદ તેમણે ભાજપ છોડવાનો નિર્ણય લીધો છે.
કે. કરુણાકરણની રાજકીય કારકિર્દી લાંબી અને પ્રભાવશાળી રહી હતી. તેઓ કેરળ વિધાનસભામાં વિપક્ષના નેતા, લોકસભા અને રાજ્યસભાના સાંસદ રહી ચૂક્યા હતા. વર્ષ 1995-96 દરમિયાન તેમણે કેન્દ્રીય ઉદ્યોગ મંત્રી તરીકે પણ જવાબદારી સંભાળી હતી. 1 મે, 2005ના રોજ તેમણે ડેમોક્રેટિક ઇન્દિરા કોંગ્રેસ-કરુણાકરણ નામના અલગ પક્ષની સ્થાપના કરી હતી, જેનું પાછળથી અન્ય પક્ષમાં વિલીનીકરણ થયું હતું.
કરુણાકરણનાં સંતાનોમાં પુત્ર કે. મુરલીધરન અને પુત્રી પદ્મજા વેણુગોપાલનો સમાવેશ થાય છે. કે. મુરલીધરન કોંગ્રેસના વરિષ્ઠ નેતા છે. આમ, એક જ પરિવારનાં બે સંતાનો અલગ-અલગ રાજકીય પક્ષો સાથે જોડાયેલાં રહ્યાં છે. હવે પદ્મજાના રાજીનામા બાદ તેઓ ફરી પોતાના પરિવારના પરંપરાગત રાજકીય પક્ષ કોંગ્રેસમાં જોડાશે કે નહીં તેના પર સૌની નજર છે.
ચૂંટણીના મેદાનમાં પણ પદ્મજા વેણુગોપાલનું પ્રદર્શન ચર્ચામાં રહ્યું હતું. તેઓ ત્રિશૂર વિધાનસભા બેઠક પરથી ભાજપના ઉમેદવાર તરીકે ચૂંટણી લડ્યાં હતાં. તેમને આશરે 23 ટકા મત મળ્યા હતા અને તેઓ ત્રીજા સ્થાને રહ્યાં હતાં. આ જ બેઠક પર 2021ની ચૂંટણીમાં ભાજપને આશરે 31 ટકા મત મળ્યા હતા. આમ, પદ્મજાની ઉમેદવારીથી ભાજપના મતપ્રમાણમાં વધારો થયો નહોતો.
ભાજપમાં જોડાતાં પહેલાં પદ્મજા વેણુગોપાલ કેરળ પ્રદેશ કોંગ્રેસ સમિતિ (KPCC)નાં મહાસચિવ તરીકે કાર્યરત હતાં. તેઓ કોંગ્રેસની મહિલા પાંખમાં પણ સક્રિય ભૂમિકા ભજવી ચૂક્યાં છે. તેમના પતિ ડૉ. એમ. વેણુગોપાલ વ્યવસાયે બાળરોગ નિષ્ણાત છે અને કોચીમાં કાર્યરત છે. તેમને એક પુત્ર અને એક પુત્રી છે.