Gujarat

કોળી સમાજના CMની માગ વચ્ચે ગેનીબેન ઠાકોરનું નિવેદન, કહ્યું- મુખ્યમંત્રી કોઈ એક સમાજમાંથી જ બને તે જરૂરી નથી

ગુજરાતમાં કોળી સમાજના મુખ્યમંત્રી બનાવવાની માગણીને લઈને રાજકીય ચર્ચા તેજ બની છે. ભાજપના કેટલાક નેતાઓ દ્વારા આ માગણીને સમર્થન આપવામાં આવી રહ્યું છે, ત્યારે હવે કોંગ્રેસનાં સાંસદ ગેનીબેન ઠાકોરે પણ આ મુદ્દે પોતાનો મત રજૂ કર્યો છે. તેમણે સ્પષ્ટ શબ્દોમાં કહ્યું છે કે કોઈ એક સમાજનો વ્યક્તિ જ મુખ્યમંત્રી કે ધારાસભ્ય બની શકે તેવું નથી. મુખ્યમંત્રી કોણ બનશે તેનો નિર્ણય પક્ષનું મોવડીમંડળ કરે છે અને તેમાં ધારાસભ્યોની સહમતી પણ મહત્ત્વપૂર્ણ હોય છે.

ગેનીબેને જણાવ્યું હતું કે સરકારની રચના માટે તમામ સમાજનો સાથ અને સહકાર જરૂરી છે. મુખ્યમંત્રી કે નાયબ મુખ્યમંત્રીની પસંદગી માત્ર કોઈ એક સમાજના આધારે થઈ શકે નહીં. આ નિર્ણય લેતી વખતે અનેક રાજકીય અને સામાજિક પાસાં ધ્યાનમાં રાખવામાં આવે છે. તેમના આ નિવેદનને ગુજરાતમાં ચાલી રહેલી કોળી સમાજના મુખ્યમંત્રીની માગણી વચ્ચે મહત્ત્વપૂર્ણ માનવામાં આવી રહ્યું છે.

છેલ્લા કેટલાક દિવસોથી ગુજરાતમાં કોળી સમાજને મુખ્યમંત્રી પદે પ્રતિનિધિત્વ આપવાની માગણી ચર્ચામાં છે. આ દરમિયાન ગાંધીનગરમાં ઠાકોર સમાજ તરફથી પણ મુખ્યમંત્રી અને નાયબ મુખ્યમંત્રી પદે સમાજના પ્રતિનિધિને સ્થાન આપવાની માગણી કરવામાં આવી રહી છે. આવા રાજકીય માહોલમાં ગેનીબેનનું નિવેદન સામે આવ્યું છે. તેમણે સરકારની રચનામાં તમામ સમાજના પ્રતિનિધિત્વ અને સહકારને મહત્ત્વ આપતાં જણાવ્યું કે મુખ્યમંત્રીની પસંદગીનો અંતિમ નિર્ણય પક્ષનું મોવડીમંડળ જ કરે છે.

બીજી તરફ, ભાજપના રાજુલાના ધારાસભ્ય હીરા સોલંકીએ પણ કોળી સમાજના મુખ્યમંત્રી બનાવવાની માગણી અંગે પક્ષની ભૂમિકા સ્પષ્ટ કરી છે. તેમના ભાઈ અને પૂર્વ મંત્રી પરસોત્તમ સોલંકી સહિતના કેટલાક નેતાઓ કોળી સમાજમાંથી મુખ્યમંત્રી બનાવવાની માગણી કરી રહ્યા છે. આ મુદ્દે હીરા સોલંકીએ કહ્યું હતું કે મુખ્યમંત્રીની પસંદગી હંમેશાં પાર્ટી દ્વારા જ કરવામાં આવે છે. તેમના ભાઈનો મત વ્યક્તિગત હોઈ શકે છે, પરંતુ મુખ્યમંત્રી પસંદ કરવાનો અંતિમ નિર્ણય પક્ષનો હોય છે.

આમ, એક તરફ કોળી સમાજના નેતાઓ મુખ્યમંત્રી પદે પોતાના સમાજને પ્રતિનિધિત્વ આપવાની માગ કરી રહ્યા છે, તો બીજી તરફ ગેનીબેન ઠાકોર અને હીરા સોલંકીનાં નિવેદનોમાં મુખ્યમંત્રીની પસંદગી માટે પક્ષના નિર્ણયને મહત્ત્વ આપવામાં આવ્યું છે. ગુજરાતમાં આગામી વિધાનસભા ચૂંટણી પહેલાં વિવિધ સમાજો દ્વારા રાજકીય પ્રતિનિધિત્વની માગણી વચ્ચે આ મુદ્દો વધુ ચર્ચાસ્પદ બન્યો છે.

Most Popular

To Top