દિવાળીના તહેવારો દરમિયાન ગુજરાતનાં પ્રવાસન સ્થળો અને યાત્રાધામો પ્રવાસીઓ માટે આકર્ષણનું કેન્દ્ર બન્યાં હતાં. રાજ્યનાં દ્વારકા, નડાબેટ, અંબાજી, સોમનાથ અને સ્ટેચ્યુ ઓફ યુનિટી સહિતનાં આઠ મુખ્ય ઐતિહાસિક, ધાર્મિક અને પ્રવાસન સ્થળોની નવ દિવસમાં 38 લાખથી વધુ સ્થાનિક તેમજ દેશ-વિદેશના પ્રવાસીઓએ મુલાકાત લીધી હતી. દિવાળીની રજાઓમાં મોટી સંખ્યામાં પ્રવાસીઓ ઉમટતાં રાજ્યના પ્રવાસન ક્ષેત્રમાં નોંધપાત્ર તેજી જોવા મળી હતી.
વર્ષ 2025ના દિવાળીના નવ દિવસના સમયગાળાની સરખામણીમાં ચાલુ વર્ષે 6થી 14 નવેમ્બર, 2026 દરમિયાન રાજ્યનાં આઠ મુખ્ય સ્થળોએ પ્રવાસીઓની સંખ્યામાં વધારો નોંધાયો છે. આ આંકડાઓમાં સૌથી વધુ વૃદ્ધિ દ્વારકા ખાતે જોવા મળી હોવાનું જણાવાયું છે. દ્વારકા મંદિર ખાતે સૌથી વધુ 9.75 લાખથી વધુ પ્રવાસીઓ પહોંચ્યા હતા. જ્યારે અંબાજી મંદિર, ગબ્બર હિલ અને રોપ-વે ખાતે 11.95 લાખથી વધુ લોકોએ મુલાકાત લીધી હતી. સોમનાથ મંદિર ખાતે પણ 9.12 લાખથી વધુ શ્રદ્ધાળુઓ અને પ્રવાસીઓ ઉમટ્યા હતા.
ધાર્મિક સ્થળો ઉપરાંત રાજ્યનાં અન્ય પ્રવાસન સ્થળો પર પણ પ્રવાસીઓની ભારે ભીડ જોવા મળી હતી. સ્ટેચ્યુ ઓફ યુનિટી ખાતે 5.57 લાખથી વધુ પ્રવાસીઓ પહોંચ્યા હતા. ગિરનાર રોપ-વેની મુલાકાત 48,800થી વધુ લોકોએ લીધી હતી, જ્યારે વડનગર ખાતે 62 હજારથી વધુ પ્રવાસીઓ નોંધાયા હતા. સરહદી વિસ્તારના પ્રવાસન સ્થળ નડાબેટ ખાતે પણ 37 હજારથી વધુ લોકો ઉમટ્યા હતા. આ ઉપરાંત ભુજના સ્મૃતિવન મેમોરિયલ ખાતે મુલાકાતીઓની સંખ્યામાં 25 હજારથી વધુનો વધારો નોંધાયો હતો.
દિવાળીના તહેવારો દરમિયાન ગુજરાતનાં ઐતિહાસિક સ્થળો, ધાર્મિક કેન્દ્રો અને પ્રવાસન સ્થળો પર પ્રવાસીઓની વધતી સંખ્યા રાજ્યના પ્રવાસન ક્ષેત્ર માટે મહત્ત્વપૂર્ણ માનવામાં આવે છે. પ્રવાસન સ્થળો પર માળખાકીય સુવિધાઓમાં વધારો અને વ્યવસ્થાપન સુધારવાના પ્રયાસોને કારણે પ્રવાસીઓની અવરજવરમાં વધારો થયો હોવાનું જણાવાયું છે. આ આંકડાઓથી ગુજરાત પ્રવાસન ક્ષેત્રે વધુ એક નવો કીર્તિમાન સ્થાપિત થયો હોવાનો દાવો કરવામાં આવ્યો છે.