હોર્મુઝ મુદ્દે ઈરાનની અમેરિકાને નવી ધમકી, વૈશ્વિક તણાવ ફરી વધ્યો
મિડલ ઈસ્ટમાં વધતા તણાવ વચ્ચે ઈરાને અમેરિકા સામે ફરી એકવાર કડક ચેતવણી આપી છે. ઈરાનના નેતાઓએ સ્પષ્ટ જણાવ્યું છે કે જો અમેરિકા હોર્મુઝ જળસંધિ (Strait of Hormuz) આસપાસ લગાવેલી નૌકાદળની નાકેબંધી નહીં હટાવે, તો ઈરાન “કડક કાર્યવાહી” કરવા મજબૂર થશે. આ નિવેદન બાદ ફરી એકવાર વૈશ્વિક સ્તરે ચિંતા વધી છે.
હાલમાં અમેરિકા દ્વારા ઈરાનના બંદરો અને જહાજો સામે નૌકાદળની નાકેબંધી ચાલુ રાખવામાં આવી છે. અમેરિકી નિર્ણય પાછળ ઈરાન સાથે ચાલી રહેલા સૈન્ય અને રાજનૈતિક તણાવને મુખ્ય કારણ માનવામાં આવી રહ્યું છે. ઈરાનનું કહેવું છે કે આ પ્રકારની કાર્યવાહી આંતરરાષ્ટ્રીય કાયદાનું ઉલ્લંઘન છે અને તેને “સમુદ્રી લૂંટફાટ” જેવી ગણાવી છે.ઈરાનના અધિકારીઓએ અમેરિકાને ચેતવણી આપી છે કે જો નાકેબંધી ચાલુ રહેશે તો હોર્મુઝ જળસંધિ ફરીથી બંધ કરવાની કાર્યવાહી પણ શક્ય છે. જળસંધિ વિશ્વ માટે અત્યંત મહત્વપૂર્ણ છે, કારણ કે વિશ્વના લગભગ 20% જેટલા તેલ અને LNGનો પરિવહન આ માર્ગથી થાય છે.
અહેવાલો અનુસાર, અમેરિકાએ 13 એપ્રિલ 2026થી ઈરાન સામે નૌકાદળની નાકેબંધી શરૂ કરી હતી. આ પગલું ઈરાન સાથે થયેલી શાંતિ ચર્ચાઓ નિષ્ફળ રહેતા લેવામાં આવ્યું હતું. ત્યારથી બંને દેશો વચ્ચે તણાવ સતત વધી રહ્યો છે. તાજેતરમાં ઈરાનના સૈન્ય સલાહકારોએ તો અહીં સુધી ચેતવણી આપી હતી કે જો અમેરિકી યુદ્ધજહાજો હોર્મુઝ વિસ્તારમાં આગળ વધશે, તો ઈરાન તેમને નિશાન બનાવી શકે છે. આ નિવેદનથી આંતરરાષ્ટ્રીય રાજનીતિમાં ચિંતા વધુ તેજ થઈ ગઈ છે.
બીજી તરફ, ceasefire દરમિયાન ઈરાને કેટલાક સમય માટે વેપારી જહાજોને પસાર થવા દેવાની જાહેરાત કરી હતી, પરંતુ સાથે જ જણાવ્યું હતું કે અમેરિકાની નાકેબંધી ચાલુ રહેશે તો સ્થિતિ ફરી ગંભીર બની શકે છે. હાલ અનેક દેશો અને શિપિંગ કંપનીઓ પણ આ સ્થિતિ પર નજીકથી નજર રાખી રહ્યા છે. આ સમગ્ર પરિસ્થિતિને ધ્યાનમાં રાખતા મિડલ ઈસ્ટમાં ફરીથી મોટો સૈન્ય સંઘર્ષ ઉભો થવાની શક્યતાઓ વધી રહી છે. હોર્મુઝ જળસંધિ પર તણાવ વધુ વધે તો તેની સીધી અસર વૈશ્વિક તેલ બજાર અને આંતરરાષ્ટ્રીય વેપાર પર પડી શકે છે.
