ગોવાના મુખ્યમંત્રી પ્રમોદ સાવંતે રાજ્યને દેશની પ્રથમ ‘લિવિંગ લેબોરેટરી’ તરીકે વિકસાવવાની મહત્વાકાંક્ષી જાહેરાત કરી છે. આ પહેલનો મુખ્ય હેતુ ટકાઉ આર્કિટેક્ચર, પર્યાવરણમૈત્રી વિકાસ અને ઐતિહાસિક વારસાના સંરક્ષણને આધુનિક ટેક્નોલોજી સાથે જોડવાનો છે. નવી દિલ્હીમાં યોજાયેલી નેશનલ કોન્ફરન્સ ઓન ગોવાન આર્કિટેક્ચર એન્ડ સસ્ટેનેબિલિટી દરમિયાન તેમણે આ જાહેરાત કરી હતી. કાર્યક્રમમાં કેન્દ્રીય પ્રવાસન અને સંસ્કૃતિ મંત્રી ગજેન્દ્ર સિંહ શેખાવત તેમજ રાજ્યસભાના સાંસદ સદાનંદ શેટ તાનાવડે પણ હાજર રહ્યા હતા.
વારસા અને વિકાસને સાથે લઈ આગળ વધશે ગોવા
ગોવા સ્ટેટ ઇન્ફ્રાસ્ટ્રક્ચર ડેવલપમેન્ટ કોર્પોરેશન (GSIDC) દ્વારા આયોજિત આ પરિષદમાં દેશભરના આર્કિટેક્ટ, અર્બન પ્લાનર, એન્જિનિયર અને નીતિ નિર્માતાઓ એકત્ર થયા હતા. મુખ્યમંત્રી પ્રમોદ સાવંતે જણાવ્યું કે વડાપ્રધાન નરેન્દ્ર મોદીના ‘વિકાસ પણ, વિરાસત પણ’ના વિઝનને ધ્યાનમાં રાખીને ગોવામાં પરંપરાગત સ્થાપત્ય અને આધુનિક ગ્રીન ટેક્નોલોજીનું સંકલન કરવામાં આવશે.
તેમણે કહ્યું કે ગોવાનું લક્ષ્ય એવું ઇન્ફ્રાસ્ટ્રક્ચર તૈયાર કરવાનો છે, જે હવામાન પરિવર્તન સામે વધુ સક્ષમ હોય અને સાથે પર્યાવરણ પ્રત્યે જવાબદાર પણ રહે. પરંપરા અને નવીનતા સાથે મળીને રાજ્યના સર્વાંગી વિકાસનો માર્ગ તૈયાર કરવામાં આવશે.
ટકાઉ વિકાસ માટે નિષ્ણાતો વચ્ચે મંત્રણાઓ
મુખ્યમંત્રીએ જણાવ્યું કે આ પરિષદનો મુખ્ય હેતુ ગોવાના સમૃદ્ધ સ્થાપત્ય વારસાના આધારે ભવિષ્યના ટકાઉ વિકાસ અંગે ચર્ચા કરવાનો છે. વારસા સંરક્ષણ, શહેરી આયોજન અને પર્યાવરણમૈત્રી વિકાસ જેવા મુદ્દાઓ પર વિશેષ ધ્યાન આપવામાં આવી રહ્યું છે. સરકાર એક તરફ ઐતિહાસિક વારસાને જાળવશે તો બીજી તરફ આધુનિક વિકાસને પણ સમાન પ્રાથમિકતા આપશે.
ટૂરિઝમમાં આવી રહ્યો છે મોટો બદલાવ
પ્રમોદ સાવંતે જણાવ્યું કે ગોવામાં પ્રવાસીઓની પસંદગી હવે બદલાઈ રહી છે. અગાઉ મોટાભાગના પ્રવાસીઓ દરિયાકિનારા અને ચર્ચ જોવા આવતા હતા, પરંતુ હવે આધ્યાત્મિક પ્રવાસન, સ્પોર્ટ્સ ટૂરિઝમ અને વેલનેસ ટૂરિઝમ તરફ લોકોનો રસ ઝડપથી વધી રહ્યો છે.
આ બદલાતી માંગને ધ્યાનમાં રાખીને રાજ્ય સરકાર નવી પ્રવાસન નીતિઓ પર કામ કરી રહી છે. ખાસ કરીને સ્પોર્ટ્સ ટૂરિઝમને પ્રોત્સાહન આપવા માટે રાષ્ટ્રીય સ્તરના અનેક કાર્યક્રમોનું આયોજન કરવામાં આવી રહ્યું છે. સરકારનું માનવું છે કે પ્રવાસનનો વિકાસ પણ પર્યાવરણને નુકસાન પહોંચાડ્યા વિના શક્ય છે.
રાષ્ટ્રીય અને વૈશ્વિક સહયોગ પર ભાર
મુખ્યમંત્રીએ જણાવ્યું કે ગોવા સરકાર અન્ય રાજ્યો અને વિવિધ દેશો સાથે પણ ચર્ચા કરી રહી છે, જેથી ટકાઉ પ્રવાસન અને હરિત ઇન્ફ્રાસ્ટ્રક્ચરના ક્ષેત્રમાં નવા વિચારો અને શ્રેષ્ઠ મોડલ અપનાવી શકાય. આ પહેલ ગોવાને માત્ર પ્રવાસનનું કેન્દ્ર નહીં પરંતુ ટકાઉ વિકાસના ક્ષેત્રમાં દેશ માટે એક આદર્શ રાજ્ય તરીકે સ્થાપિત કરવામાં મદદરૂપ બનશે.
