બોલિવુડ અભિનેત્રી સારા અલી ખાનની કેદારનાથ મંદિરની મુલાકાત અને ત્યાં પૂજા-પ્રાર્થના કરવાને લઈને નવો ધાર્મિક વિવાદ ઊભો થયો છે. ઉત્તર પ્રદેશના બરેલીના ઇસ્લામિક ધર્મગુરુ મુફ્તી શહાબુદ્દીન રઝવી બરેલવીએ સારાની મુલાકાત સામે વાંધો ઉઠાવી તેમના વિરુદ્ધ ફતવો જાહેર કર્યો છે. તેમણે દાવો કર્યો છે કે ઇસ્લામિક શરિયત મુજબ અન્ય ધર્મનાં ધાર્મિક સ્થળે જઈને પૂજા-પ્રાર્થનામાં ભાગ લેવો માન્ય નથી. આ સાથે તેમણે અભિનેત્રીને અલ્લાહ પાસે તૌબા કરીને માફી માંગવાની સલાહ આપી છે. સારા અલી ખાન 25 ઓક્ટોબરે કેદારનાથ મંદિર પહોંચી હતી. મંદિરની બહાર દર્શન માટેની કતારમાં ઊભેલી અને હાથ જોડીને પ્રાર્થના કરતી તેની તસવીરો અને વીડિયો સામે આવ્યા હતા. આ મુલાકાત બાદ મુફ્તી શહાબુદ્દીન રઝવીએ વીડિયો નિવેદન આપીને પોતાની નારાજગી વ્યક્ત કરી હતી. તેમણે કહ્યું હતું કે કેટલાક યુવાનો દ્વારા તેમને સવાલ કરવામાં આવ્યો હતો કે સારા અલી ખાન કેદારનાથ મંદિરમાં જઈને પૂજા કરે તે ઇસ્લામિક શરિયત મુજબ યોગ્ય છે કે નહીં.
આ સવાલના જવાબમાં મૌલાનાએ જણાવ્યું હતું કે તેમના મતે ઇસ્લામિક શરિયત કોઈ મુસ્લિમ પુરુષ કે મહિલાને અન્ય ધર્મની ધાર્મિક પરંપરાઓ અપનાવવા અથવા મંદિરમાં પૂજા-પાઠ કરવાની મંજૂરી આપતી નથી. તેમણે સારાની આ પ્રવૃત્તિને શરિયત વિરુદ્ધ ગણાવી હતી અને જો અભિનેત્રીએ પોતાની ઇચ્છાથી મંદિરમાં જઈને પૂજા કરી હોય તો તેમણે અલ્લાહ પાસે માફી માંગવી જોઈએ તેમ કહ્યું હતું. જોકે, આ ફતવો મૌલાનાનો ધાર્મિક અભિપ્રાય છે, કોઈ સરકારી કે કાનૂની આદેશ નથી. આ મામલે સારા અલી ખાન કે તેમની ટીમ તરફથી જાહેરમાં કોઈ પ્રતિક્રિયા આપવામાં આવી નથી. કેદારનાથ સાથે સારા અલી ખાનનો સંબંધ વર્ષો જૂનો છે. વર્ષ 2018માં આવેલી ફિલ્મ ‘કેદારનાથ’થી તેણે બોલિવુડમાં અભિનયની શરૂઆત કરી હતી. આ ફિલ્મમાં તેની સાથે દિવંગત અભિનેતા સુશાંત સિંહ રાજપૂત મુખ્ય ભૂમિકામાં હતો. ફિલ્મના શૂટિંગ અને ત્યાર બાદ પણ સારા અનેક વખત કેદારનાથની મુલાકાત લઈ ચૂકી છે. છેલ્લા કેટલાક વર્ષોથી તે નિયમિત રીતે આ ધાર્મિક સ્થળે જતી રહી છે અને પોતાની મુલાકાતની તસવીરો પણ સોશિયલ મીડિયા પર શેર કરતી રહે છે.
કેદારનાથ સાથેના તેના આ જોડાણને કારણે તેની દરેક મુલાકાત ચર્ચામાં રહે છે. વર્ષ 2018માં ફિલ્મ ‘કેદારનાથ’ રિલીઝ થઈ ત્યારે પણ તેની વાર્તા અને વિષયને લઈને કેટલાક દક્ષિણપંથી સંગઠનોએ વિરોધ નોંધાવ્યો હતો. હવે તેની તાજેતરની મંદિર મુલાકાતને લઈને એક ઇસ્લામિક ધર્મગુરુએ વાંધો ઉઠાવતાં ફરી એકવાર ધાર્મિક આસ્થા અને વ્યક્તિગત પસંદગી અંગે ચર્ચા શરૂ થઈ છે. આ વિવાદ વચ્ચે બદ્રીનાથ-કેદારનાથ મંદિર સમિતિ (BKTC)ના બિન-હિન્દુ શ્રદ્ધાળુઓ માટેના નિયમની પણ ચર્ચા થઈ રહી છે. સમિતિએ બદ્રીનાથ અને કેદારનાથ મંદિરમાં પૂજા-પ્રાર્થના કરવા ઇચ્છતા બિન-હિન્દુ મુલાકાતીઓ માટે શપથપત્ર એટલે કે એફિડેવિટ રજૂ કરવાનું ફરજિયાત બનાવ્યું છે. સમિતિના મુખ્ય કાર્યકારી અધિકારી સોહન સિંહ રંગારે સારા અલી ખાનની મુલાકાત અંગે જણાવ્યું હતું કે અભિનેત્રીની ટીમે મંદિરની મુલાકાત પહેલાં જરૂરી શપથપત્ર જમા કરાવ્યું હતું. આમ, એક તરફ મંદિર સમિતિના નિયમ મુજબ જરૂરી પ્રક્રિયા પૂર્ણ કરીને સારા અલી ખાને કેદારનાથમાં દર્શન કર્યાં હતાં, તો બીજી તરફ તેમના ધાર્મિક સ્થળની મુલાકાતને લઈને મૌલાના શહાબુદ્દીન રઝવીએ વાંધો ઉઠાવ્યો છે. અભિનેત્રીની વ્યક્તિગત આસ્થા અને ધાર્મિક પસંદગીને લઈને શરૂ થયેલો આ વિવાદ હવે ચર્ચાનો વિષય બન્યો છે.
