વડાપ્રધાન નરેન્દ્ર મોદીએ ગુજરાતના એકતાનગર ખાતે સ્ટેચ્યૂ ઑફ યુનિટી પર પહોંચીને સરદાર વલ્લભભાઈ પટેલને શ્રદ્ધાંજલિ અર્પણ કરી હતી. સરદાર પટેલની 151મી જન્મજયંતી નિમિત્તે રાષ્ટ્રીય એકતા દિવસની ઉજવણી કરવામાં આવી રહી છે. આ પ્રસંગે ભારતીય વાયુસેનાના બે હેલિકોપ્ટર દ્વારા સરદાર સાહેબની પ્રતિમા પર પુષ્પવર્ષા કરવામાં આવી હતી. વડાપ્રધાને પ્રતિમાનો જલાભિષેક કરીને પુષ્પાંજલિ અર્પણ કરી હતી અને દેશના પ્રથમ ગૃહમંત્રીને નમન કર્યું હતું.
રાષ્ટ્રીય એકતા દિવસ નિમિત્તે એકતાનગરમાં વિવિધ કાર્યક્રમોનું આયોજન કરવામાં આવ્યું છે. વડાપ્રધાન મોદીએ આ પ્રસંગે 400 કરોડ રૂપિયાથી વધુના વિકાસલક્ષી પ્રોજેક્ટ્સનું લોકાર્પણ અને પ્રારંભ કરાવ્યો હતો. આ પ્રોજેક્ટ્સમાં જળ શુદ્ધિકરણ પ્લાન્ટ, લાઇટિંગ વ્યવસ્થાનું વિસ્તરણ, નર્મદા ઘાટનો વિકાસ, IRCTC હોટેલ, રેન ફોરેસ્ટ, યુનિટી ટ્રેલ અને ઇકો ટ્રેલ સહિતનાં કામોનો સમાવેશ થાય છે. આ વિકાસકાર્યો દ્વારા એકતાનગરમાં પ્રવાસન સુવિધાઓ અને માળખાકીય વ્યવસ્થાને વધુ વિકસાવવાનો પ્રયાસ કરવામાં આવી રહ્યો છે.
વડાપ્રધાને એકતાનગરમાં ચાલી રહેલા વિવિધ વિકાસકાર્યોની સમીક્ષા પણ કરી હતી. તેમણે સંબંધિત અધિકારીઓ પાસેથી પ્રોજેક્ટ્સની પ્રગતિ, આયોજન અને કામગીરી અંગે માહિતી મેળવી હતી. આ ઉપરાંત, વિકાસકાર્યોને લગતા મુદ્દાઓ પર અધિકારીઓ સાથે ચર્ચા કરી હતી. એકતાનગરને પ્રવાસન અને પર્યાવરણની દૃષ્ટિએ વધુ આકર્ષક બનાવવા માટે હાથ ધરવામાં આવેલા પ્રોજેક્ટ્સની વિગતો પણ તેમને આપવામાં આવી હતી.
આ મુલાકાત દરમિયાન વડાપ્રધાન મોદીએ એકતાનગર ખાતે આવેલા રેન ફોરેસ્ટ અને વામન વૃક્ષ વાટિકાની મુલાકાત લીધી હતી. રેન ફોરેસ્ટમાં વિવિધ પ્રકારની વનસ્પતિ અને હરિયાળી વચ્ચે વિકસાવવામાં આવેલી કુદરતી રચનાઓનું નિરીક્ષણ કર્યું હતું. જ્યારે વામન વૃક્ષ વાટિકામાં નાના કદનાં વૃક્ષો અને છોડની વિશેષ પ્રજાતિઓ વિશે માહિતી મેળવી હતી. આ બંને સ્થળો એકતાનગરના પ્રવાસન આકર્ષણોમાં મહત્વનું સ્થાન ધરાવે છે.
સ્ટેચ્યૂ ઑફ યુનિટી વિશ્વની સૌથી ઊંચી પ્રતિમા છે અને સરદાર વલ્લભભાઈ પટેલના યોગદાન તથા રાષ્ટ્રીય એકતાના પ્રતીક તરીકે ઓળખાય છે. સરદાર પટેલે દેશી રજવાડાંઓના એકીકરણમાં મહત્વપૂર્ણ ભૂમિકા ભજવી હતી. તેમની જન્મજયંતીને રાષ્ટ્રીય એકતા દિવસ તરીકે ઉજવવામાં આવે છે. આ દિવસે દેશભરમાં વિવિધ કાર્યક્રમો દ્વારા રાષ્ટ્રીય એકતા, અખંડિતતા અને દેશની એકતાના સંદેશને ઉજાગર કરવામાં આવે છે.
વડાપ્રધાન નરેન્દ્ર મોદી આજે સાંજે 5:30થી 7:40 વાગ્યા દરમિયાન એકતાનગરમાં યોજાનારી રાષ્ટ્રીય એકતા પરેડમાં હાજરી આપશે. આ પરેડમાં વિવિધ સુરક્ષા દળો અને અન્ય ટુકડીઓ દ્વારા પ્રસ્તુતિ કરવામાં આવશે. કાર્યક્રમો પૂર્ણ થયા બાદ રાત્રે 8 વાગ્યે વડાપ્રધાન એકતાનગરથી વડોદરા એરપોર્ટ જવા રવાના થશે. ત્યારબાદ રાત્રે 9:10 વાગ્યે તેઓ વડોદરાથી દિલ્હી માટે પ્રસ્થાન કરશે.
