દિવાળીના તહેવાર પહેલાં સુરત મહાનગરપાલિકાની સામાન્ય સભામાં નગરસેવકો, અધિકારીઓ અને કર્મચારીઓ માટે મંગાવવામાં આવેલા નાસ્તાનું બિલ વિવાદનું કારણ બન્યું છે. પ્રજાના વેરામાંથી ચાલતી પાલિકાની તિજોરીમાંથી નાસ્તા પાછળ કરવામાં આવેલા ખર્ચને લઈને સવાલો ઊઠી રહ્યા છે. ખાસ કરીને માત્ર ભજીયાનું બિલ જ અંદાજે રૂ. 1 લાખ જેટલું આવતાં ‘કોના બાપની દિવાળી?’ જેવી ચર્ચા શહેરમાં શરૂ થઈ છે. એક તરફ સામાન્ય નાગરિકો મોંઘવારીનો સામનો કરી રહ્યા છે, ત્યારે બીજી તરફ પાલિકાની સામાન્ય સભામાં નાસ્તા પાછળ થયેલા ખર્ચને લઈને કરકસર અને જવાબદારીના મુદ્દે સવાલો થઈ રહ્યા છે.
મળતી વિગતો મુજબ, સામાન્ય બજારમાં સારી ગુણવત્તાનાં ભજીયાં પ્રતિ કિલો રૂ. 350થી રૂ. 500ના ભાવે મળી રહે છે. જોકે, પાલિકાની સામાન્ય સભા માટે ભજીયાં પ્રતિ કિલો રૂ. 750ના ભાવે મંગાવવામાં આવ્યાં હતાં. જથ્થાબંધ ઓર્ડર હોવા છતાં માત્ર રૂ. 50નું ડિસ્કાઉન્ટ મળ્યું હોવાનું જણાવવામાં આવી રહ્યું છે. આ રીતે 130 કિલોથી વધુ ભજીયાં ખરીદવામાં આવતાં તેનું કુલ બિલ આશરે રૂ. 1 લાખની આસપાસ પહોંચ્યું હતું. બજારભાવની સરખામણીએ આટલા ઊંચા ભાવે ભજીયાં ખરીદવામાં આવતાં ખર્ચની યોગ્યતા અંગે સવાલો ઊભા થયા છે.
આ ખર્ચની ચર્ચા વચ્ચે ચંદની પડવા નિમિત્તે પીરસવામાં આવેલી અસલ સુરતી ઘારીનું બિલ પણ સામે આવ્યું છે. ઘારી પાછળ આશરે રૂ. 20 હજારનો ખર્ચ થયો હતો. તેની સરખામણીએ માત્ર ભજીયાંનું બિલ પાંચ ગણું વધારે એટલે કે લગભગ રૂ. 1 લાખ થયું હોવાનું જણાવવામાં આવી રહ્યું છે. સુરતની પરંપરાગત વાનગી ઘારી કરતાં ભજીયાં પાછળ આટલો મોટો ખર્ચ થતાં પાલિકાના નાસ્તાના આયોજન અને ખરીદીની પદ્ધતિ અંગે ચર્ચા તેજ બની છે.
આ સામાન્ય સભામાં 120 ચૂંટાયેલા નગરસેવકો ઉપરાંત અધિકારીઓ, કર્મચારીઓ અને અન્ય આશરે 80 લોકો હાજર રહ્યા હોવાનું ગણવામાં આવે તો નાસ્તો કરનારા લોકોની સંખ્યા અંદાજે 200 થાય છે. આ આંકડાના આધારે કુલ ખર્ચની ગણતરી કરવામાં આવે તો પ્રતિ વ્યક્તિ આશરે રૂ. 600 જેટલો ખર્ચ થયો હોવાનું સામે આવે છે. સામાન્ય સભામાં પીરસવામાં આવેલા નાસ્તા માટે આટલી મોટી રકમ ખર્ચાવાથી પ્રજાના પૈસાના ઉપયોગ અંગે અનેક સવાલો ઊભા થયા છે.
શહેરના અનેક વિસ્તારોમાં નાગરિકો રસ્તા, પાણી અને ડ્રેનેજ જેવી પાયાની સુવિધાઓ માટે રજૂઆતો કરી રહ્યા છે. આવી સ્થિતિમાં પાલિકાના પદાધિકારીઓ અને અધિકારીઓની બેઠકમાં નાસ્તા પાછળ થયેલો ખર્ચ સામાન્ય નાગરિકોમાં નારાજગીનું કારણ બન્યો છે. જાહેર નાણાંના ખર્ચમાં કરકસર અને પારદર્શિતા જળવાય તેવી અપેક્ષા વચ્ચે આ કિસ્સાએ પાલિકાના વહીવટ સામે સવાલો ઊભા કર્યા છે. હવે આ બિલની તપાસ કરવામાં આવે છે કે નહીં અને ખર્ચ અંગે પાલિકા તરફથી કોઈ સ્પષ્ટતા આપવામાં આવે છે કે કેમ તેના પર સૌની નજર રહેશે.
