મોરબી: મોરબીમાં રવિવારે સાંજે એક દુ:ખદ અકસ્માત સર્જાયો હતો. મચ્છુ નદી પરનો ઝૂલતો પુલ તૂટીને નદીમાં પડી જવાથી અત્યાર સુધીમાં 143 લોકોના મોત થયા છે. આ ઘટના બાદથી બ્રિજની જાળવણીની જવાબદારી સંભાળતું ઓરેવા ગ્રુપ શંકાના દાયરામાં આવ્યું છે. અહીં પ્રશ્ન એ ઉભો થયો છે કે અંજતા ઘડિયાળ બનાવતી કંપનીને બ્રિજના રિપેરિંગનું કામ કેવી રીતે મળ્યું. શું કોઈ ગડબડ થઈ છે? આ ઓરેવા કંપનીના ડિરેક્ટર કોણ છે? શું ખરેખર કંપનીની બેદરકારીને કારણે લોકોએ જીવ ગુમાવ્યા છે? ચાલો જાણીએ…
રજાનો દિવસ હોવાથી રવિવારે સાંજે 6.30 વાગ્યાના સુમારે આ દર્દનાક અકસ્માત સર્જાયો ત્યારે મોટી સંખ્યામાં લોકો બ્રિજ પર હાજર હતા. આ દુર્ઘટનામાં અત્યાર સુધીમાં 143 લોકોના મોતની પુષ્ટિ થઈ છે. મીડિયા રિપોર્ટ્સ અનુસાર, કુલ મૃત્યુઆંક 150 સુધી પહોંચી શકે છે. હાલ અકસ્માત સ્થળનો નજારો હ્રદય હચમચાવી નાખે તેવો છે. જ્યાં અરાજકતા વચ્ચે મૃતદેહોની શોધમાં રેસ્ક્યુ ઓપરેશન હાથ ધરવામાં આવી રહ્યું છે.
આવી સ્થિતિમાં, ગુજરાતના મોરબીમાં મચ્છુ નદી પરનો ઝૂલતો પુલ 140 જૂનો હતો, પરંતુ જાળવણી સંબંધિત કામ કરવા માટે આ પુલ થોડા સમય માટે બંધ કરવામાં આવ્યો હતો અને તેને પાછલા અઠવાડિયે જ (26 ઓક્ટોબર 2022) ફરીથી ખોલવામાં આવ્યો હતો. મોરબી જીલ્લાની કલેક્ટર કચેરી પર ઉપલબ્ધ માહિતી મુજબ આ પુલ 19મી સદીનો ઈજનેરી અજાયબી માનવામાં આવતો હતો. આ મોરબીના શાસકોના પ્રગતિશીલ અને વૈજ્ઞાનિક સ્વભાવનું પ્રતીક છે.
ઓરેવા ગ્રુપને 15 વર્ષ સુધી બ્રિજ સંભાળવાની જવાબદારી સોંપવામાં આવી હતી
મચ્છુ નદી પરના ઝૂલતા પુલની જાળવણીની જવાબદારી ગુજરાતની પ્રતિષ્ઠિત કંપની ઓરેવા ગ્રૂપની હતી. તમને જણાવી દઈએ કે ઓરેવા ગ્રૂપ એ જ કંપની છે જે અજંતા બ્રાન્ડની ઘડિયાળો બનાવે છે. ઓરેવા ગ્રુપને 15 વર્ષ સુધી બ્રિજના સંચાલન અને જાળવણીની જવાબદારી સોંપવામાં આવી હતી. માર્ચ મહિનામાં પુલના પુનઃસંગ્રહ માટે તેને બંધ કરવામાં આવ્યો હતો. ગુજરાતી નવા વર્ષ નિમિત્તે 26મી ઓક્ટોબરે તેને ફરીથી લોકો માટે ખોલવામાં આવ્યો હતો. કંપની બ્રિજની ટૂર માટે લોકો પાસેથી પ્રતિ વ્યક્તિ 17 રૂપિયા પણ વસૂલતી હતી.
ઘડિયાળોથી લઈને ઈ-બાઈક બનાવે છે ઓરેવા કંપની
ઓરેવા ગ્રુપ અજંતા મેન્યુફેક્ચરિંગ પ્રાઈવેટ લિમિટેડ તરીકે પણ જાણીતું છે. કંપની દિવાલ ઘડિયાળોથી લઈને ઈ-બાઈક અને ઈલેક્ટ્રીકલ બલ્બ સુધીની દરેક વસ્તુનું ઉત્પાદન કરે છે. અકસ્માત બાદ કંપની લોકોના નિશાના પર આવી ગઈ છે. બ્રિજની જાળવણીની કામગીરી હાથ ધરતા પહેલા કંપનીએ દાવો કર્યો હતો કે તે અદ્યતન ટેક્નોલોજીનો ઉપયોગ કરીને બ્રિજને એવી રીતે વિકસાવવા માંગે છે કે જે મોરબીને એક નવી ઓળખ આપે.
ઓરેવા ગ્રુપનો બિઝનેસ 45 દેશોમાં ફેલાયેલો છે
ઓધવજી પટેલ ઓરેવા ગ્રુપના સ્થાપક હતા. કંપનીનો બિઝનેસ હાલમાં વિશ્વના 45 દેશોમાં ફેલાયેલો છે. કંપનીમાં લગભગ 7000 કર્મચારીઓ છે, જેમાંથી 5000 મહિલાઓ છે. ઘડિયાળો અને ઈ-બાઈક બનાવવા ઉપરાંત કંપની ખેડૂતો માટે વોટર હાર્વેસ્ટિંગનું કામ પણ કરે છે. કંપની એનર્જી સેવિંગ એલઇડી બલ્બ, કેલ્ક્યુલેટર અને ટાઇલ્સનું પણ ઉત્પાદન કરે છે. કંપની ગુજરાતના મોરબી અને કચ્છ જિલ્લામાં ઓરેવા બ્રાન્ડ નામ હેઠળ નાસ્તાના વ્યવસાય સાથે પણ સંકળાયેલી છે.
કંપનીના સ્થાપક દિવાલ ઘડિયાળોના પિતા તરીકે જાણીતા હતા
કંપનીનું મુખ્ય મથક અમદાવાદમાં SG હાઈવે પર થલતેજ સર્કલ ખાતે આવેલું છે. ઓક્ટોબર 2012 માં ‘દિવાલ ઘડિયાળોના પિતા’ તરીકે ઓળખાતા ઓધવજી પટેલના અવસાન પછી, તેમના પુત્ર જયસુખ ઓધવજી ઓરેવા જૂથનો વ્યવસાય સંભાળી રહ્યા છે. કંપનીનું ટર્નઓવર 800 કરોડ રૂપિયાની આસપાસ છે. જયસુખ ઓધવજીને વર્ષ 2020માં ગુજરાતની અમદાવાદ પશ્ચિમ લોકસભા બેઠકના સાંસદ કીર્તિ સોલંકી દ્વારા ‘નવ નક્ષત્ર સન્માન’ નામના બિઝનેસ એવોર્ડથી પણ સન્માનિત કરવામાં આવ્યા હતા.
ક્યાં થઈ ભૂલ, જેના કારણે 132 લોકોએ જીવ ગુમાવ્યા?
બ્રિજનું નવીનીકરણ કરનાર ગ્રુપે આ બ્રિજ માટે 25 વર્ષની ગેરંટી આપી હતી. જોકે, કંપનીએ એક સાથે 100 લોકોને બ્રિજ પર ચઢવા દેવાની વાત કરી હતી. આ બ્રિજનું ફિટનેસ સર્ટિફિકેટ અને સરકારની ત્રણ એજન્સીઓ દ્વારા તપાસ કરવાની બાકી હતી. પરંતુ દિવાળી દરમિયાન ઉતાવળમાં જય સુખાભાઈ પટેલે તેમની પૌત્રીના હસ્તે આ બ્રિજનું લોકાર્પણ કરાવ્યું હતું. જણાવવામાં આવ્યું છે કે દુર્ઘટના સમયે બ્રિજ પર 500-700 લોકો હતા.
એફઆઈઆરમાં ઓરેવા ગ્રૂપ અથવા તેની સાથે જોડાયેલ કોઈ વ્યક્તિનું નામ નથી
તમને જણાવી દઈએ કે હાલમાં અકસ્માતના સંદર્ભમાં નોંધાયેલી FIRમાં ક્યાંય પણ જયસુખ અથવા ઓરેવા ગ્રુપનું નામ નથી. હા, બ્રિજની જાળવણીનું કામ કરતી એજન્સી, તેના સંચાલકો અને અન્યો સામે ફરિયાદ દાખલ કરવામાં આવી છે, પરંતુ હાલમાં તેમના વિશે કોઈ વિગતવાર માહિતી આપવામાં આવી નથી. અકસ્માતની તપાસની કામગીરી ડીએસપી પીએ ઝાલાને સોંપવામાં આવી છે. પોલીસનું કહેવું છે કે આ બેદરકારીનો મામલો છે.
