તૃણમૂલ કોંગ્રેસ (ટીએમસી) ના એક અસંતુષ્ટ જૂથે શુક્રવારે પાર્ટીના કોલકાતા મુખ્યાલય પર કબજો કર્યો હતો. ઋતાબ્રત બેનર્જીના નેતૃત્વમાં જૂથે ઓફિસના તાળા બદલી નાખ્યા અને નવા પોસ્ટરો લગાવ્યા. મમતા બેનર્જીના નજીકના સહયોગી ચંદ્રિમા ભટ્ટાચાર્ય પણ તેમનાથી અલગ થઈ ગયા છે. તેમણે તૃણમૂલ પ્રદેશ પ્રમુખ પદેથી રાજીનામું આપી દીધું છે. ભટ્ટાચાર્યએ પદ સંભાળ્યાના માત્ર એક મહિનાની અંદર જ રાજીનામું આપી દીધું; મમતા બેનર્જીએ ગયા મહિનાની 3 તારીખે તેમને તૃણમૂલ કોંગ્રેસના પ્રદેશ પ્રમુખ તરીકે નિયુક્ત કર્યા હતા.
ઋતાબ્રત બેનર્જીએ મુખ્યાલય ખાતે સમર્થકો અને નેતાઓ સાથે બેઠક યોજી હતી, જેમાં તેમના જૂથને “વાસ્તવિક” તૃણમૂલ કોંગ્રેસ જાહેર કર્યું હતું. તેમણે જણાવ્યું હતું કે હવેથી પાર્ટીની કામગીરી આ સ્થાનથી કરવામાં આવશે. એક દિવસ પહેલા ગુરુવારે તેમના જૂથે ચૂંટણી પંચ સમક્ષ પાર્ટીના નામ, ચૂંટણી પ્રતીક અને સંગઠનાત્મક માળખા પર દાવો રજૂ કર્યો હતો.
વિધાનસભા ચૂંટણીમાં હાર બાદ 3 જૂને તૃણમૂલ કોંગ્રેસના 80 માંથી 58 ધારાસભ્યો મમતા બેનર્જીના નેતૃત્વથી અલગ થઈ ગયા હતા. 22 જૂને યોજાયેલી પ્રતિનિધિઓની બેઠકમાં નવા પ્રમુખ અને ઉપપ્રમુખની નિમણૂક કરવામાં આવી હતી તેમજ 30 સભ્યોની રાષ્ટ્રીય કારોબારી સમિતિની રચના કરવામાં આવી હતી.
મમતા બેનર્જીને ટેકો આપતા જૂથના વરિષ્ઠ નેતા કુણાલ ઘોષ કાર્યાલય પહોંચ્યા હતા પરંતુ ગેટ બંધ હોવાથી તેઓ પ્રવેશ કરી શક્યા ન હતા. તેમણે ટિપ્પણી કરી હતી કે આ દાવા કરનારાઓ સ્વતંત્ર ઉમેદવારો તરીકે ચૂંટણી જીતી શક્યા નથી. તેમણે આરોપ લગાવ્યો હતો કે રાજ્ય વહીવટીતંત્ર અને પોલીસની મૌન મંજૂરીથી કાર્યાલય પર કબજો કરવામાં આવ્યો હતો.
તૃણમૂલ કોંગ્રેસમાં બળવાના સમાચાર સૌપ્રથમ 3 જૂને બહાર આવ્યા હતા. 58 અસંતુષ્ટ ધારાસભ્યોએ ઋતાબ્રત બેનર્જી જે અગાઉ પક્ષમાંથી હાંકી કાઢવામાં આવ્યા હતા તેમને તેમના નેતા તરીકે પસંદ કર્યા હતા. તેમણે વિધાનસભા અધ્યક્ષ રથેન્દ્ર બોઝને સમર્થન પત્ર સુપરત કર્યો હતો, જેમાં માંગ કરવામાં આવી હતી કે ઋતાબ્રતને વિરોધ પક્ષના નેતા જાહેર કરવામાં આવે. સ્પીકરે તેમની મંજૂરી આપી હતી.
મૂળ ટીએમસી પાસે રહેલા 28 લોકસભા સાંસદોમાંથી 20 તોડી નાખ્યા છે, જેના કારણે મમતા પાસે લોકસભામાં ફક્ત આઠ સાંસદો રહ્યા છે. રાજ્યસભાની વાત કરીએ તો 13 માંથી ચાર સાંસદોએ રાજીનામું આપ્યું છે, જેના કારણે ઉપલા ગૃહમાં ફક્ત નવ સભ્યો રહ્યા છે. વિધાનસભાની વાત કરીએ તો તાજેતરની ચૂંટણીમાં ટીએમસીએ 80 બેઠકો જીતી હતી. આમાંથી 58 ધારાસભ્યોએ અલગ જૂથ બનાવ્યું છે; મમતા પાસે ફક્ત 22 ધારાસભ્યો બાકી છે.
