સ્વિટ્ઝર્લેન્ડની એક હોટેલમાં ભારતીય મહેમાનો માટે બનાવવામાં આવેલા કેટલાક ખાસ નિયમો સોશિયલ મીડિયા પર ચર્ચાનો વિષય બન્યા છે. જાણીતા ઉદ્યોગપતિ હર્ષ ગોએન્કાએ શેર કરેલી એક પોસ્ટ બાદ ફરી એકવાર ભારતીયોની નાગરિક સમજ, જાહેર સ્થળોએ વર્તન અને વિદેશમાં દેશની છબીને લઈને ચર્ચા શરૂ થઈ છે. હર્ષ ગોએન્કાએ પોતાની પોસ્ટમાં જણાવ્યું હતું કે વર્ષો પહેલાં તેમણે સ્વિટ્ઝર્લેન્ડની એક હોટેલમાં ભારતીય મહેમાનો માટે ખાસ સૂચનાઓ લગાવવામાં આવેલી જોઈ હતી. આ નિયમો જોઈને તેઓ આશ્ચર્યચકિત થઈ ગયા હતા. તેમણે લખ્યું કે છેલ્લા કેટલાક સમયથી સોશિયલ મીડિયા પર એવા ઘણા વીડિયો સામે આવ્યા છે, જેમાં કેટલાક ભારતીયો જાહેર સ્થળોએ અયોગ્ય વર્તન કરતા જોવા મળે છે. ક્યાંક લોકો રેસ્ટોરાંમાં ગરબા રમતા જોવા મળે છે, તો ક્યાંક એરપોર્ટ કે ફ્લાઇટમાં ખૂબ જ ઊંચા અવાજે વાતચીત કરતા નજરે પડે છે.
ગોએન્કાએ એક અન્ય ઘટનાનો પણ ઉલ્લેખ કર્યો હતો. તેમના જણાવ્યા મુજબ, દાવોસમાં એક ભારતીય ઉદ્યોગપતિએ ક્લબમાં એટલા જોરથી ગીતો વગાડ્યા હતા કે તેનો અવાજ દૂર સુધી સંભળાતો હતો. તેમના મતે આવી ઘટનાઓ માત્ર વ્યક્તિગત વર્તન પૂરતી મર્યાદિત નથી રહેતી, પરંતુ તે સમગ્ર દેશની છબી પર પણ અસર કરે છે. જ્યારે કોઈ ભારતીય વિદેશમાં જાય છે, ત્યારે તે માત્ર એક વ્યક્તિ નહીં પરંતુ દેશના પ્રતિનિધિ તરીકે પણ જોવામાં આવે છે. તેમણે જાપાનનું ઉદાહરણ આપતાં જણાવ્યું કે જાપાનના લોકો તેમની શિસ્ત, નમ્રતા અને જાહેર સ્થળોએ જવાબદાર વર્તન માટે સમગ્ર વિશ્વમાં જાણીતા છે. જાહેર સ્થળે શાંતિ જાળવવી, નિયમોનું પાલન કરવું અને અન્ય લોકોની સુવિધાનો વિચાર કરવો તેમની સંસ્કૃતિનો ભાગ છે. ગોએન્કાના મતે ભારતને પણ વૈશ્વિક સ્તરે વધુ સન્માન મેળવવું હોય તો નાગરિક શિષ્ટાચારને પ્રાથમિકતા આપવી પડશે.
ચર્ચાનું મુખ્ય કારણ બનેલી સ્વિટ્ઝર્લેન્ડના ગસ્ટાડ શહેરની Arc-en-Ciel Hotel દ્વારા ભારતીય મહેમાનો માટે કેટલીક વિશેષ સૂચનાઓ આપવામાં આવી હોવાનું કહેવાય છે. હોટેલના નિયમો મુજબ, નાસ્તાનું બુફે સવારે 7:30 વાગ્યાથી 10:30 વાગ્યા સુધી ઉપલબ્ધ રહે છે. હોટેલે સ્પષ્ટ કર્યું છે કે બુફેમાંથી ખોરાક પેક કરીને બહાર લઈ જવાની મંજૂરી નથી. જો કોઈ મહેમાનને પેક્ડ લંચની જરૂર હોય, તો તે અલગથી ઓર્ડર આપી શકે છે અને તેના માટે નિર્ધારિત ચાર્જ ચૂકવવો પડશે. આ ઉપરાંત હોટેલે મહેમાનોને માત્ર ઉપલબ્ધ કરાવવામાં આવેલી કટલરીનો ઉપયોગ કરવાની સૂચના આપી છે. જો બે કે તેથી વધુ લોકો એક જ ભોજન શેર કરવા માંગતા હોય, તો દરેક વધારાની વ્યક્તિ માટે અલગ સર્વિસ ચાર્જ ચૂકવવાનો રહેશે. હોટેલનું કહેવું છે કે આ નિયમો તમામ મહેમાનોને સમાન સુવિધા મળી રહે તે માટે બનાવવામાં આવ્યા છે.
હોટેલે શાંતિ અને ગોપનીયતા જાળવવા માટે પણ કેટલીક સૂચનાઓ આપી છે. મહેમાનોને કોરિડોરમાં ધીમા અવાજે વાત કરવા અને બાલ્કનીમાં મોટેથી વાતચીત ન કરવા વિનંતી કરવામાં આવી છે. ઉપરાંત રાત્રિના નિર્ધારિત સમય બાદ માત્ર ઇમરજન્સી કોલ જ સ્વીકારવામાં આવે છે. હોટેલ મેનેજમેન્ટનું કહેવું છે કે આ નિયમો અન્ય મહેમાનોની સુવિધા અને આરામને ધ્યાનમાં રાખીને બનાવવામાં આવ્યા છે. આ સમગ્ર મુદ્દો સોશિયલ મીડિયા પર વાયરલ થતાં લોકોના અલગ-અલગ પ્રતિસાદ સામે આવ્યા છે. કેટલાક લોકોએ આ નિયમોને ભારતીયો પ્રત્યેનો ભેદભાવ ગણાવ્યો છે, જ્યારે અન્ય લોકોનું માનવું છે કે વિદેશમાં દેશની સારી છબી જાળવવા માટે દરેક પ્રવાસીએ જવાબદાર અને શિસ્તબદ્ધ વર્તન કરવું જોઈએ. જોકે આ ચર્ચાએ ફરી એકવાર એક મહત્વનો સવાલ ઊભો કર્યો છે કે વૈશ્વિક સ્તરે ભારતની પ્રતિષ્ઠા મજબૂત બનાવવા માટે માત્ર આર્થિક અને ટેક્નોલોજીકલ વિકાસ પૂરતો નથી, પરંતુ નાગરિક શિષ્ટાચાર અને જાહેર જીવનમાં જવાબદાર વર્તન પણ એટલું જ જરૂરી છે.
