જો તમારું ICICI બેંકમાં ખાતું છે તો તમારા માટે એક મોટા સમાચાર છે. બેંકે તેના બચત ખાતાઓ માટે મિનિમમ બેલેન્સમાં મોટો વધારો કર્યો છે. બચત ખાતામાં રાખવાની લઘુત્તમ રકમમાં 5 ગણો વધારો કરવામાં આવ્યો છે. મહાનગરોથી લઈને ગામડાઓ સુધીના ગ્રાહકો માટે લઘુત્તમ બેલેન્સમાં વધારો કરવામાં આવ્યો છે.
હવે ખાનગી ક્ષેત્રની ધિરાણકર્તા ICICI બેંકના બચત ખાતામાં 50000 નું મિનીમમ બેલેન્સ રાખવું પડશે. આ નિયમ 1 ઓગસ્ટ 2025 થી અમલમાં મુકાયો છે. પહેલા આ રકમ 10 હજાર રૂપિયા હતી. આવી સ્થિતિમાં જો તમે મિનીમમ બેલેન્સ નહીં રાખો, તો તમારે દંડ ભરવો પડી શકે છે.
મિનીમમ બેલેન્સ ક્યાં રાખવું જરૂરી બનશે?
હવે મેટ્રો અને શહેરી વિસ્તારોમાં બચત ખાતાઓમાં ઓછામાં ઓછા 50 હજાર અર્ધ-શહેરી વિસ્તારોમાં 25 હજાર અને ગ્રામીણ વિસ્તારોમાં ઓછામાં ઓછા 10 હજાર રાખવા પડશે. અગાઉ, મેટ્રો અને શહેરી વિસ્તારોમાં બચત ખાતાઓમાં સરેરાશ ઓછામાં ઓછા 10 હજાર રૂપિયા જાળવવાની આવશ્યકતા હતી. આ નિર્ણય સાથે ICICI બેંક પાસે હવે લોકલ બેંકોમાં સૌથી વધુ મિનીમમ એકાઉન્ટ બેલેન્સ (MAB) છે.
અન્ય બેંકોના સેવિંગ્સ એકાઉન્ટમાં મિનીમમ બેલેન્સ કેટલું છે?
હવે આ નિર્ણય પછી ICICI બેંકના બચત ખાતામાં મહત્તમ મિનીમમ બેલેન્સ મર્યાદા 50 હજાર રૂપિયા થઈ ગઈ છે. તે જ સમયે જાહેર ક્ષેત્રની બેંક SBI એ વર્ષ 2020 માં જ મિનીમમ બેલેન્સ મર્યાદા દૂર કરી દીધી હતી. એટલે કે, આ નિયમ નાબૂદ કરવામાં આવ્યો હતો. બીજી તરફ અન્ય બેંકોએ ઓપરેશન ખર્ચનું સંચાલન કરવા માટે સેવિંગ્સ ખાતામાં મિનીમમ બેલેન્સ મર્યાદા 2000 રૂપિયાથી 10 હજાર રૂપિયા રાખી છે.
મિનીમમ બેલેન્સ ન રાખો તો શું થશે?
બેંકો તેમના દૈનિક ખર્ચ અને રોકાણોને પહોંચી વળવા માટે લઘુત્તમ બેલેન્સની આવશ્યકતાઓ લાદે છે અને જો કોઈ ગ્રાહક મિનીમમ બેલેન્સ ન રાખે તો તેને દંડ ફટકારવામાં આવે છે. બેંકે તેના ગ્રાહકોને તેમના ખાતા તપાસવા અને તેનું પાલન સુનિશ્ચિત કરવા જણાવ્યું છે.
બેંકે વ્યાજ દરમાં પણ ઘટાડો કર્યો
એપ્રિલમાં ICICI બેંકે તેના બચત ખાતાઓ પરના વ્યાજ દરમાં 0.25% ઘટાડો કર્યો હતો. HDFC બેંક અને એક્સિસ બેંકે પણ વ્યાજ દર ઘટાડ્યા બાદ આ નિર્ણય લેવામાં આવ્યો છે. ICICI બેંકના બચત ખાતા પર 2.75% વ્યાજ મળશે. 50 લાખ રૂપિયાથી વધુના બેલેન્સ પરના વ્યાજ દરમાં પણ 0.25% ઘટાડો કરવામાં આવ્યો છે, જે તેને 3.25% સુધી ઘટાડી દેવામાં આવ્યો છે. આ ફેરફાર 16 એપ્રિલથી લાગુ થશે.
