રાજકોટ: ઈંગ્લેન્ડ સામે રાજકોટમાં રમાઈ રહેલી ટેસ્ટ મેચમાં ભારતે પહેલી ઈનિંગમાં કેપ્ટન રોહિત શર્મા અને લોકલ બોય રવિન્દ્ર જાડેજાની સદીની મદદથી 445 રનનો વિશાળ સ્કોર ખડો કર્યો છે. બીજી તરફ બીજી ઈનિંગમાં ઈંગ્લેન્ડે ઝડપી રમત દાખવી છે. ઈંગ્લેન્ડે 90 રન પર તેની પહેલી વિકેટ ગુમાવી છે.
મેચની હાઈલાઈટ અશ્વિનની વિકેટ રહી. ભારતીય સ્પીનર રવિચંદ્રન અશ્વિને ઈંગ્લેન્ડના ઓપનર બેટ્સમેન ઝેક ક્રાઉલીને આઉટ કર્યો. આ અશ્વિનની 500મી વિકેટ હતી. 500 વિકેટની સિદ્ધી હાંસલ કરનાર અશ્વિન ભારતનો બીજો બોલર બન્યો છે. આ અગાઉ આ કારનામું એકમાત્ર લિજેન્ડરી સ્પીનર અનિલ કુંબલે જ કરી શક્યા છે.
અશ્વિન ટેસ્ટ ક્રિકેટમાં સૌથી ઝડપી 500 વિકેટ લેનારો બીજો બોલર છે. અશ્વિને 98મી ટેસ્ટ મેચમાં આ સિદ્ધિ મેળવી છે. ટેસ્ટમાં સૌથી ઝડપી 500 વિકેટ લેવાનો રેકોર્ડ મુથૈયા મુરલીધરનના નામે છે, જેણે 87મી ટેસ્ટમાં આ અનોખી સિદ્ધિ મેળવી હતી. જ્યારે પૂર્વ ભારતીય કેપ્ટન અનિલ કુંબલેએ 105 ટેસ્ટમાં આ રેકોર્ડ બનાવ્યો હતો અને ઓસ્ટ્રેલિયાના દિવંગત સ્પિનર શેન વોર્ને તેની 108મી ટેસ્ટમાં આ રેકોર્ડ બનાવ્યો હતો. એટલે કે સૌથી ઝડપી ગતિએ 500 વિકેટ લેવાના મામલે કુંબલેએ વોર્ન અને કુંબલેને પાછળ છોડી દીધા છે.
ટેસ્ટમાં 500 વિકેટ લેનારો અશ્વિન નવમો બોલર
અશ્વિન ટેસ્ટ ક્રિકેટમાં 500 વિકેટ પૂરી કરનાર વિશ્વનો નવમો બોલર છે. ઉપરાંત, તે 500 કે તેથી વધુ વિકેટ ઝડપનાર પાંચમો સ્પિનર છે. ટેસ્ટમાં સૌથી વધુ વિકેટ શ્રીલંકાના મુથૈયા મુરલીધરન (800)એ લીધી હતી. શેન વોર્ન (708) બીજા સ્થાને છે અને જેમ્સ એન્ડરસન (695*) હાલમાં ત્રીજા સ્થાને છે. અનિલ કુંબલે ભારત માટે ટેસ્ટ ક્રિકેટમાં સૌથી વધુ વિકેટ લેનાર બોલર છે. કુંબલેએ 132 ટેસ્ટ મેચમાં 619 વિકેટ લીધી હતી. તેનું સર્વશ્રેષ્ઠ બોલિંગ પ્રદર્શન 10/74 હતું.
સૌથી વધુ ટેસ્ટ વિકેટ લેનાર બોલર્સ
- મુથૈયા મુરલીધરન (શ્રીલંકા 1992-2010): 133 ટેસ્ટ – 800 વિકેટ
- શેન વોર્ન (ઓસ્ટ્રેલિયા 1992-2007): 145 ટેસ્ટ – 708 વિકેટ
- જેમ્સ એન્ડરસન (ઈંગ્લેન્ડ 2003-2023): 185* ટેસ્ટ – 696* વિકેટ
- અનિલ કુંબલે (ભારત 1990-2008): 132 ટેસ્ટ – 619 વિકેટ
- સ્ટુઅર્ટ બ્રોડ (ઇંગ્લેન્ડ 2007-2023): 167 ટેસ્ટ – 604 વિકેટ
- ગ્લેન મેકગ્રા (ઓસ્ટ્રેલિયા 1993-2007): 124 ટેસ્ટ – 563 વિકેટ
- કર્ટની વોલ્શ (વેસ્ટ ઈન્ડિઝ 1984-2001): 132 ટેસ્ટ – 519 વિકેટ
- નાથન લિયોન (ઓસ્ટ્રેલિયા 2011-2023): 127* ટેસ્ટ – 517* વિકેટ
- રવિચંદ્રન અશ્વિન (ભારત 2011-2023): 98* ટેસ્ટ – 500* વિકેટ
