ગુજરાતમાં ચોમાસાએ ફરી એકવાર વિકરાળ સ્વરૂપ ધારણ કર્યું છે. ભારતીય હવામાન વિભાગ (IMD) દ્વારા રાજ્યના અનેક વિસ્તારો માટે અત્યંત મહત્વના ગણાવી રેડ એલર્ટ જાહેર કરવામાં આવ્યું છે. ભારેથી અતિભારે વરસાદ, વીજળીના કડાકા અને તેજ પવનની સંભાવનાને ધ્યાનમાં રાખીને સમગ્ર રાજ્યમાં વહીવટી તંત્રને હાઈ એલર્ટ પર રાખવામાં આવ્યું છે. હવામાન વિભાગના જણાવ્યા અનુસાર પશ્ચિમ મધ્યપ્રદેશ અને તેની આસપાસ સર્જાયેલી લો-પ્રેશર સિસ્ટમ તથા સક્રિય ચોમાસાના કારણે ગુજરાતમાં વરસાદી તંત્ર વધુ મજબૂત બન્યું છે. તેના કારણે આગામી કલાકોમાં અનેક વિસ્તારોમાં અતિભારે વરસાદ પડી શકે છે.
રેડ એલર્ટને ધ્યાનમાં રાખીને રાજ્ય સરકાર અને જિલ્લા વહીવટી તંત્ર દ્વારા તમામ કલેક્ટરો, મહાનગરપાલિકાઓ અને સ્થાનિક સ્વરાજ્ય સંસ્થાઓને સતર્ક રહેવા સૂચના આપવામાં આવી છે. બચાવ અને રાહત કામગીરી માટે NDRF, SDRF, ફાયર બ્રિગેડ, પોલીસ, હોમગાર્ડ અને સ્થાનિક ઇમરજન્સી ટીમોને સ્ટેન્ડબાય રાખવામાં આવી છે. નીચાણવાળા વિસ્તારોમાં સતત મોનિટરિંગ કરવામાં આવી રહ્યું છે.અમદાવાદમાં રાત્રિ દરમિયાન ભારે વરસાદ બાદ શહેર માટે પણ રેડ એલર્ટ જાહેર કરવામાં આવ્યું છે. શહેરના અનેક વિસ્તારોમાં પાણી ભરાવાની શક્યતા વ્યક્ત કરવામાં આવી છે. લોકોને શક્ય હોય ત્યાં સુધી ઘરની અંદર રહેવા અને જરૂરી સાવચેતી રાખવા સૂચના આપવામાં આવી છે.
હવામાન વિભાગે ખાસ કરીને દક્ષિણ ગુજરાત, મધ્ય ગુજરાત અને ઉત્તર ગુજરાતના કેટલાક જિલ્લાઓમાં ભારે વરસાદની સંભાવના વ્યક્ત કરી છે. કેટલાક વિસ્તારોમાં ખૂબ જ ટૂંકા સમયમાં ભારે વરસાદ પડવાથી ફ્લેશ ફ્લડ જેવી સ્થિતિ સર્જાઈ શકે છે,રાજ્યના વિવિધ શહેરોમાં મહાનગરપાલિકા અને જિલ્લા તંત્ર દ્વારા કંટ્રોલ રૂમ કાર્યરત કરવામાં આવ્યા છે.ડીવોટરિંગ પંપ, JCB, બોટ, ટ્રેક્ટર અને અન્ય બચાવ સાધનો તૈયાર રાખવામાં આવ્યા છે જેથી જરૂર પડ્યે તરત કાર્યવાહી કરી શકાય.
વહીવટી તંત્રે નાગરિકોને અપીલ કરી છે કે:
અતિઆવશ્યક કામ સિવાય ઘરની બહાર ન નીકળવું.
પાણી ભરાયેલા રસ્તા, નાળા અને નદીના કિનારાથી દૂર રહેવું.
વીજળીના થાંભલા અને ખુલ્લા વાયરથી સાવચેત રહેવું.
બાળકોને પાણી ભરાયેલા વિસ્તારોમાં જવા ન દેવા.
માત્ર સત્તાવાર હવામાન માહિતી પર વિશ્વાસ રાખવો અને અફવાઓથી દૂર રહેવું.,હવામાન વિભાગે જણાવ્યું છે કે આગામી ત્રણ કલાક દરમિયાન કેટલીક જગ્યાએ અત્યંત ભારે વરસાદ સાથે વીજળીના કડાકા અને 40થી 50 કિમી પ્રતિ કલાકની ઝડપે પવન પણ ફૂંકાઈ શકે છે. આવી સ્થિતિમાં વૃક્ષો પડવા, રસ્તાઓ પર પાણી ભરાવા અને ટ્રાફિક પ્રભાવિત થવાની શક્યતા છે.રાજ્ય સરકાર સતત પરિસ્થિતિ પર નજર રાખી રહી છે અને તમામ વિભાગોને સંકલન સાથે કામગીરી કરવાની સૂચના આપવામાં આવી છે. જો વરસાદની તીવ્રતા વધશે તો જરૂરિયાત મુજબ વધારાની રાહત અને બચાવ ટીમો પણ તૈનાત કરવામાં આવશે.હવામાન નિષ્ણાતોનું કહેવું છે કે સક્રિય વરસાદી સિસ્ટમના કારણે આગામી કલાકો ગુજરાત માટે અત્યંત મહત્વના રહેશે. તેથી દરેક નાગરિકે સાવચેતી રાખવી, બિનજરૂરી મુસાફરી ટાળવી અને સ્થાનિક પ્રશાસનની સૂચનાઓનું પાલન કરવું જરૂરી છે.
