ભારતીય ફૂટબોલ ચાહકો માટે એક ઐતિહાસિક ક્ષણ સર્જાઈ શકે છે. મીડિયા રિપોર્ટ્સ મુજબ 5 વખતની ફીફા વર્લ્ડ કપ ચેમ્પિયન બ્રાઝિલની રાષ્ટ્રીય ફૂટબોલ ટીમ 3 ઓક્ટોબરે ભારત સામે આંતરરાષ્ટ્રીય ફ્રેન્ડલી મેચ રમી શકે છે. જોકે હજુ સુધી બંને દેશોની ફૂટબોલ સંસ્થાઓ તરફથી સત્તાવાર જાહેરાત કરવામાં આવી નથી, પરંતુ બ્રાઝિલિયન મીડિયા અને અન્ય અહેવાલોમાં આ મેચને લઈને ચર્ચા તેજ બની છે.
બ્રાઝિલના ઓક્ટોબર ફીફા વિન્ડોમાં ભારતની એન્ટ્રી?
બ્રાઝિલિયન મીડિયા GE Globo અનુસાર બ્રાઝિલ પોતાની 2026ની આંતરરાષ્ટ્રીય મેચોની શ્રેણી ત્રણ ફ્રેન્ડલી સાથે પૂર્ણ કરશે. તેમાં 25 સપ્ટેમ્બરે ટાઉન્સવિલે અને 29 સપ્ટેમ્બરે બ્રિસ્બેનમાં ઓસ્ટ્રેલિયા સામેની બે મેચ પહેલેથી નક્કી થઈ ચૂકી છે. હવે ત્રીજી મેચ ભારત સામે 3 ઓક્ટોબરે કોલકાતામાં યોજાય તેવી શક્યતા વ્યક્ત કરવામાં આવી રહી છે. જોકે અત્યાર સુધી સત્તાવાર મંજૂરી બાકી છે.
કોલકાતા કેમ બન્યું બ્રાઝિલની પસંદગી?
કોલકાતા અને બ્રાઝિલ વચ્ચેનો ફૂટબોલ પ્રેમ ઘણો જૂનો છે. છેલ્લા કેટલાક વર્લ્ડ કપ દરમિયાન શહેરની ગલીઓમાં બ્રાઝિલના ધ્વજ, ખેલાડીઓના પોસ્ટર અને દિવાલચિત્રો જોવા મળ્યા હતા. હજારો ચાહકોએ પીળી જર્સી પહેરીને બ્રાઝિલને સમર્થન આપ્યું હતું. સોશિયલ મીડિયા પર વાયરલ થયેલા આ દૃશ્યોએ બ્રાઝિલિયન ફૂટબોલ કન્ફેડરેશનનું પણ ધ્યાન ખેંચ્યું હોવાનું કહેવાય છે. ત્યારબાદ ભારતીય આયોજકો સાથે ચર્ચા આગળ વધી હોવાનું અહેવાલોમાં જણાવાયું છે.
પેલેથી શરૂ થયેલો સંબંધ ફરી જીવંત બનશે?
કોલકાતાનો બ્રાઝિલ સાથેનો લાગણીસભર સંબંધ 1977થી જોડાયેલો છે. તે વર્ષે દિગ્ગજ ખેલાડી પેલેએ ન્યૂયોર્ક કોસ્મોસ તરફથી મોહન બાગાન સામે ઈડન ગાર્ડન્સમાં મેચ રમી હતી. આજે પણ તે મુકાબલો ભારતીય ફૂટબોલના સૌથી યાદગાર પ્રસંગોમાં ગણાય છે. જો બ્રાઝિલની સિનિયર ટીમ આ વખતે ભારત આવે તો લગભગ અડધી સદી બાદ ફરી એકવાર કોલકાતા વૈશ્વિક ફૂટબોલનું કેન્દ્ર બની શકે છે.
ભારતીય ટીમ માટે મોટી તક
ભારતીય ટીમ માટે બ્રાઝિલ જેવી વિશ્વસ્તરીય ટીમ સામે રમવાની તક અત્યંત મહત્વપૂર્ણ સાબિત થઈ શકે છે. વિશ્વની શ્રેષ્ઠ ટીમો સામે રમવાથી ખેલાડીઓને અનુભવ મળશે, રમતનું સ્તર સમજાશે અને આંતરરાષ્ટ્રીય સ્પર્ધાઓ માટે તૈયારી મજબૂત બનશે. સાથે જ ભારતીય ફૂટબોલને વૈશ્વિક સ્તરે વધુ ઓળખ પણ મળી શકે છે.
હાલ ચર્ચાઓ અંતિમ તબક્કામાં હોવાનું કહેવામાં આવી રહ્યું છે, પરંતુ અંતિમ કરાર અને સત્તાવાર જાહેરાત બાદ જ મેચ અંગે સ્પષ્ટતા થશે. ત્યાં સુધી દેશભરના ફૂટબોલ ચાહકોની નજર કોલકાતા પર ટકી રહેશે. કેટલાક અહેવાલોમાં વિરોધી ટીમ અંગે હજુ અંતિમ નિર્ણય બાકી હોવાનું પણ જણાવાયું છે, તેથી ભારત સામેની મેચ અંગે સત્તાવાર પુષ્ટિની રાહ જોવી પડશે.
