વેસ્ટ ઈન્ડિઝ અને પાકિસ્તાન વચ્ચે ત્રિનિદાદમાં રમાયેલી પ્રથમ ટેસ્ટ મેચમાં યજમાન ટીમે 90 રને શાનદાર જીત નોંધાવી હતી. આ જીતનો સૌથી મોટો હીરો ઝડપી બોલર જસ્ટિન ગ્રીવ્સ રહ્યો, જેણે પોતાની ઘાતક બોલિંગથી પાકિસ્તાનની બેટિંગ લાઇનઅપને ધરાશાયી કરી દીધી. ગ્રીવ્સે મેચમાં કુલ 7 વિકેટ ઝડપી હતી, જેમાં પ્રથમ ઇનિંગમાં મેળવેલી 5 વિકેટ સૌથી વધુ ચર્ચામાં રહી હતી. ટેસ્ટ ક્રિકેટમાં આ તેની પ્રથમ પાંચ વિકેટ હતી અને તેના શાનદાર પ્રદર્શન બદલ તેને ‘પ્લેયર ઓફ ધ મેચ’ જાહેર કરવામાં આવ્યો હતો.
જસ્ટિન ગ્રીવ્સે આ મેચ દરમિયાન એવો વિશ્વ રેકોર્ડ બનાવ્યો, જે ટેસ્ટ ક્રિકેટના લગભગ 150 વર્ષના ઇતિહાસમાં અગાઉ ક્યારેય જોવા મળ્યો નહોતો. તેણે સતત 5 મેડન ઓવર ફેંકી અને દરેક ઓવરમાં એક-એક વિકેટ ઝડપી હતી. એટલે કે પાંચ ઓવર સુધી તેણે એક પણ રન આપ્યો નહીં અને પાંચ મહત્વપૂર્ણ વિકેટ લઈને પાકિસ્તાનની ઇનિંગને પાટા પરથી ઉતારી દીધી. ટેસ્ટ ક્રિકેટમાં આવું કારનામું કરનાર તે વિશ્વનો પ્રથમ બોલર બન્યો છે.
આ પહેલા ઇંગ્લેન્ડના પૂર્વ ફાસ્ટ બોલર સ્ટુઅર્ટ બ્રોડના નામે સતત ચાર મેડન ઓવરમાં ચાર વિકેટ લેવાનો રેકોર્ડ હતો. બ્રોડે 2016માં દક્ષિણ આફ્રિકા સામે આ સિદ્ધિ મેળવી હતી. હવે જસ્ટિન ગ્રીવ્સે પાંચ મેડન ઓવરમાં પાંચ વિકેટ લઈને તે રેકોર્ડને પાછળ છોડી દીધો છે. ગ્રીવ્સે પોતાની પાંચેય વિકેટ અલગ-અલગ ઓવરમાં ઝડપી હતી. તેણે 64મી ઓવરના છેલ્લા બોલ પર પ્રથમ વિકેટ લીધી હતી. ત્યારબાદ 66મી ઓવરના બીજા બોલ પર બીજી, 68મી ઓવરના ત્રીજા બોલ પર ત્રીજી, 70મી ઓવરના ચોથા બોલ પર ચોથી અને 72મી ઓવરના છેલ્લા બોલ પર પાંચમી વિકેટ મેળવી હતી. આ દરમિયાન તેણે એક પણ રન આપ્યો નહોતો, જે તેની સિદ્ધિને વધુ ખાસ બનાવે છે. મેચ બાદ ગ્રીવ્સે પોતાની સફળતાનો શ્રેય ટીમના કેપ્ટન રોસ્ટન ચેસને આપ્યો હતો. તેણે જણાવ્યું કે કેપ્ટને માત્ર યોગ્ય લાઇન અને લેન્થ જાળવી રાખવાની સલાહ આપી હતી. તેણે એ જ યોજના પ્રમાણે બોલિંગ કરી અને ટીમ માટે મહત્વપૂર્ણ વિકેટ મેળવવામાં સફળ રહ્યો.
મેચની વાત કરીએ તો વેસ્ટ ઈન્ડિઝે પ્રથમ ઇનિંગમાં 311 રન બનાવ્યા હતા. તેના જવાબમાં પાકિસ્તાને મજબૂત શરૂઆત કરી હતી અને એક સમયે 3 વિકેટે 244 રન બનાવી દીધા હતા. તે સમયે એવું લાગી રહ્યું હતું કે પાકિસ્તાન મોટી લીડ મેળવશે, પરંતુ ત્યારબાદ જસ્ટિન ગ્રીવ્સે પોતાની ઘાતક બોલિંગથી મેચનો પાસો પલટી નાખ્યો. તેની શાનદાર સ્પેલના કારણે પાકિસ્તાનની આખી ટીમ માત્ર 282 રનમાં સમેટાઈ ગઈ. ગ્રીવ્સના આ ઐતિહાસિક પ્રદર્શનના કારણે વેસ્ટ ઈન્ડિઝે મેચ પર સંપૂર્ણ નિયંત્રણ મેળવી લીધું અને અંતે 90 રનથી જીત મેળવી. તેની આ બોલિંગ સ્પેલ હવે ટેસ્ટ ક્રિકેટના સૌથી યાદગાર સ્પેલમાંથી એક તરીકે યાદ રાખવામાં આવશે.
