યુનિફોર્મ સિવિલ કોડ ( UNIFORM CIVIL CODE) લાંબા સમયથી દેશમાં ચર્ચાનો વિષય છે, દિલ્હી હાઈકોર્ટે ( DELHI HIGHCOURT) આ અંગે એક મહત્વપૂર્ણ ટિપ્પણી કરી છે. છૂટાછેડા કેસમાં ( DIVORCE CASE) ચુકાદો આપતા કોર્ટે કહ્યું કે દેશમાં યુનિફોર્મ સિવિલ કોડ આવશ્યક છે.
જસ્ટિસ પ્રતિભા એમ.સિંઘે પોતાના ચુકાદામાં કહ્યું કે આજનો ભારત ધર્મ, જાતિ, સમુદાયથી ઉપર આવ્યો છે. આધુનિક ભારતમાં, ધર્મ અને જાતિના અવરોધો પણ સમાપ્ત થઈ રહ્યા છે. આ પરિવર્તનને કારણે લગ્ન અને છૂટાછેડામાં પણ મુશ્કેલીઓ આવી રહી છે. આજની યુવા પેઢી આ સમસ્યાઓનો સામનો કરી રહી છે તે યોગ્ય નથી. આ કારણોસર, દેશમાં યુનિફોર્મ સિવિલ કોડ લાગુ થવો જોઈએ.
સુનાવણી દરમિયાન કોર્ટે કહ્યું કે યુનિફોર્મ સિવિલ કોડ, જે આર્ટિકલ 44 માં અપેક્ષિત છે, તેને હવે વાસ્તવિકતામાં પરિવર્તિત કરવી જોઈએ. હાઈકોર્ટે પણ પોતાના નિર્ણયમાં કહ્યું હતું કે આ નિર્ણય કેન્દ્રીય કાયદા મંત્રાલયને મોકલવો જોઈએ, જેથી તે તેના પર વિચાર કરી શકે.
આ આખો મામલો હતો
જ્યારે કોર્ટ છૂટાછેડા કેસની સુનાવણી કરી રહી હતી, ત્યારે સામે એ સવાલ ઊભો થયો કે છૂટાછેડા અંગેનો નિર્ણય હિંદુ મેરેજ એક્ટ મુજબ આપવો જોઇએ કે મીના જાતિના નિયમો હેઠળ.
આ કિસ્સામાં, પતિને હિંદુ મેરેજ એક્ટ મુજબ છૂટાછેડાની ઇચ્છા હતી, જ્યારે પત્ની ઇચ્છતી હતી કે તેણી મીના જાતિમાંથી આવે, તો પછી હિંદુ મેરેજ એક્ટ તેના પર લાગુ ન હોવાથી તે મુજબ છૂટાછેડા લેવાય. તેથી, તે ઇચ્છતી હતી કે ફેમિલી કોર્ટમાં પતિ દ્વારા દાખલ છૂટાછેડાની અરજી નામંજૂર થવી જોઈએ. પત્નીની આ અરજી બાદ પતિએ તેની દલીલ સામે હાઈકોર્ટમાં અરજી કરી હતી. હાઈકોર્ટે પતિની અપીલને મંજૂરી આપી અને યુનિફોર્મ સિવિલ કોડ લાગુ કરવાની જરૂરિયાત અનુભવી અને ઉપરોક્ત વાતો કહી હતી.
