ભારતે એશિયન ગેમ્સમાં એક જ દિવસે કબડ્ડીના બંને સુવર્ણ ચંદ્રક જીત્યા. મહિલા ટીમે ફાઇનલમાં ઈરાનને ૩૭-૩૪થી હરાવ્યું. ત્યારબાદ પુરુષ ટીમે પણ ઈરાનને ૪૦-૩૪થી હરાવીને સુવર્ણ ચંદ્રક હાંસલ કર્યો. શનિવારે પુરુષ ટીમે સતત ૧૦મી વખત એશિયન ગેમ્સમાં મેડલ જીત્યો જ્યારે મહિલા ટીમે સતત પાંચમી એશિયાડમાં મેડલ મેળવ્યો.
એશિયન ગેમ્સમાં ભારતનું શાનદાર પ્રદર્શન ચાલુ છે. રોમાંચક અને કાંટાની ટક્કરવાળી કબડ્ડી મેચમાં ભારતીય પુરુષ ટીમે ઈરાનને ૪૦-૩૪થી હરાવીને સુવર્ણ ચંદ્રક જીતી લીધો. આ ઐતિહાસિક જીત સાથે ભારતે માત્ર કબડ્ડીમાં પોતાનું વર્ચસ્વ જાળવી રાખ્યું નથી પરંતુ ટુર્નામેન્ટમાં દેશનો ચોથો સુવર્ણ ચંદ્રક પણ હાંસલ કર્યો છે. મેચ દરમિયાન ભારતીય ખેલાડીઓએ ઉત્તમ તાલમેલ અને શક્તિનું પ્રદર્શન કર્યું અને અંતે મજબૂત ઈરાની ટીમને પરાજય આપ્યો. દિવસની શરૂઆતમાં ભારતીય મહિલા ટીમે પણ કબડ્ડીમાં સુવર્ણ ચંદ્રક જીત્યો હતો.
કબડ્ડી ઉપરાંત ૧૮ વર્ષીય અનાહત સિંઘ સ્ક્વોશમાં મહિલા સિંગલ્સની ફાઇનલમાં પહોંચી, જ્યારે અભય સિંઘે પુરુષ સિંગલ્સની ફાઇનલમાં સ્થાન મેળવ્યું. એશિયન ગેમ્સમાં બે ભારતીય ખેલાડીઓ સિંગલ્સ ફાઇનલમાં પહોંચ્યા હોય તેવી આ પ્રથમ ઘટના છે.
બીજા હાફમાં મેચનું પાસું પલટાયું
કબડ્ડીના પ્રથમ હાફના અંતે ઈરાને સરસાઈ મેળવી હતી અને વિરામ સમયે સ્કોર તેમના પક્ષમાં ૧૮-૧૭ હતો. બીજા હાફની શરૂઆતમાં ઈરાને દબાણ જાળવી રાખ્યું હતું પરંતુ ભારતે ધીમે ધીમે મેચનું પાસું પોતાની તરફેણમાં ફેરવ્યું. સુમિતે ડિફેન્સમાં મહત્વપૂર્ણ ટેકલ્સ કર્યા, જ્યારે અર્જુન દેશવાલે પોતાની રેડ્સ દ્વારા પોઈન્ટ્સ મેળવ્યા. સ્કોર ૨૧-૨૧થી બરાબર થયા પછી ભારતે આગળ વધવાનું શરૂ કર્યું. અંતે ભારતે ૪૦-૩૪થી જીત મેળવી અને સુવર્ણ ચંદ્રક જીતી લીધો.
મહિલા ટીમે પણ ઈરાનને હરાવ્યું
મહિલા કબડ્ડી ટીમે ઈરાનને ૩૭-૩૪થી હરાવીને સુવર્ણ ચંદ્રક જીત્યો. મેચ દરમિયાન ભારતે ઘણી વખત સરસાઈ મેળવી હતી, પરંતુ ઈરાને વાપસી કરવાનો પ્રયાસ ચાલુ રાખ્યો હતો. અંતિમ મિનિટોમાં ભારતીય ડિફેન્સે મજબૂત રમત દાખવીને ૩૭-૩૪થી જીત નિશ્ચિત કરી.
સ્ક્વોશમાં પણ બે ફાઇનલિસ્ટ
અનાહત સિંહે જાપાનની વિશ્વની છઠ્ઠા ક્રમની ખેલાડી સાતોમી વાતાનાબેને ૩-૨થી હરાવીને મહિલા સિંગલ્સની ફાઇનલમાં પ્રવેશ કર્યો. એક તબક્કે અનાહત ૨-૦થી પાછળ હતી અને ત્રીજી ગેમમાં તેણે બે મેચ પોઈન્ટ બચાવવા પડ્યા હતા. ત્યારબાદ તેણે શાનદાર વાપસી કરીને મેચ જીતી લીધી. બીજી તરફ અભય સિંહે પાકિસ્તાનના મુહમ્મદ ઈરફાનને ૩-૦થી હરાવીને પુરુષ સિંગલ્સની ફાઇનલમાં સ્થાન મેળવ્યું. તેણે ૧૧-૩, ૧૨-૧૦, ૧૧-૬ના સ્કોર સાથે મેચ જીતી.
૪૪ વર્ષ બાદ મેરેથોનમાં મેડલ
એથ્લેટિક્સમાં સાવન બરવાલે પુરુષોની મેરેથોનમાં ૨ કલાક, ૧૧ મિનિટ અને ૩૭ સેકન્ડનો સમય નોંધાવીને રજત ચંદ્રક જીત્યો. એશિયન ગેમ્સમાં પુરુષોની મેરેથોનમાં ભારતે મેડલ જીત્યો હોય તેવી આ ૪૪ વર્ષમાં પ્રથમ ઘટના છે. અગાઉ ભારતે ૧૯૮૨ની દિલ્હી એશિયન ગેમ્સમાં આ સ્પર્ધામાં બ્રોન્ઝ મેડલ જીત્યો હતો. સંપૂર્ણ મેરેથોન ૪૨ કિલોમીટરની હોય છે જ્યારે હાફ મેરેથોન ૨૧.૦૯૭ કિલોમીટરની હોય છે.
ભારત હોકીની સેમીફાઇનલમાં પહોંચ્યું
ડિફેન્ડિંગ ચેમ્પિયન ભારતીય પુરુષ હોકી ટીમે યજમાન જાપાનને ૨-૦થી હરાવીને સેમીફાઇનલમાં સ્થાન મેળવ્યું. અગાઉ ગ્રુપ સ્ટેજમાં ભારતે ઈન્ડોનેશિયાને ૧૩-૧, શ્રીલંકાને ૧૬-૧ અને દક્ષિણ કોરિયાને ૮-૨થી હરાવ્યું હતું. જાપાન સામેનો આ વિજય તેની સતત ચોથી જીત હતી.
