ચૂંટણી પંચ સાથે જોડાયેલો વિવાદ હવે સુપ્રીમ કોર્ટ સુધી પહોંચી ગયો છે. આ મામલો બે ચૂંટણી કમિશનરોની કથિત સંમતિ વિના ‘SIR’ અંગે લેવાયેલા નિર્ણય સાથે સંબંધિત છે અને સર્વોચ્ચ અદાલતમાં આ બાબતે સુનાવણીની માંગ કરતી અરજી દાખલ કરવામાં આવી છે. ભારતીય ચૂંટણી પંચ હાલમાં દેશની રાજકીય ઉથલપાથલમાં ફસાયેલું જોવા મળી રહ્યું છે. એક મીડિયા રિપોર્ટમાં દાવો કરવામાં આવ્યો હતો કે પંચની અંદર બધું બરાબર નથી ચાલી રહ્યું. ‘SIR’ અંગે મુખ્ય ચૂંટણી કમિશનર જ્ઞાનેશ કુમાર અને અન્ય બે ચૂંટણી કમિશનરો વચ્ચેના મતભેદોના અહેવાલોને કારણે વિપક્ષે આ મુદ્દાને મોટો બનાવ્યો છે.
વિપક્ષે આજે દેશભરમાં મુખ્ય ચૂંટણી કમિશનર વિરુદ્ધ મોટા પાયે વિરોધ પ્રદર્શન કર્યું હતું. કોંગ્રેસે દિલ્હી અને વિવિધ રાજ્યોમાં રસ્તા પર ઉતરીને દેખાવો કર્યા હતા. આ પછી તમામ જિલ્લા સમિતિઓને ૨૮ સપ્ટેમ્બરથી કલેક્ટર કચેરીઓ સુધી કૂચ (માર્ચ)નું આયોજન કરવા સૂચનાઓ આપવામાં આવી છે. કોંગ્રેસ દિલ્હીમાં ચૂંટણી પંચના મુખ્યાલયની બહાર વિરોધ પ્રદર્શન કરશે, જ્યારે વિવિધ રાજ્યોમાં ચૂંટણી પંચની કચેરીઓ સામે પણ આવા જ દેખાવો યોજાશે. બિહારમાં RJD આજે જિલ્લા મુખ્યાલયો પર વિરોધ પ્રદર્શન થયું, જ્યારે AISA દિલ્હીના જંતર-મંતર પર વિરોધ પ્રદર્શન કરાયું.
જ્ઞાનેશ કુમાર વિરુદ્ધ મહાભિયોગ પ્રસ્તાવ લાવશે કોંગ્રેસ
મહત્વની વાત એ છે કે કોંગ્રેસ મુખ્ય ચૂંટણી કમિશનર વિરુદ્ધ તમામ મોરચે વિપક્ષને એકજૂટ કરી રહી છે. પક્ષ સંસદના બંને ગૃહોમાં મુખ્ય ચૂંટણી કમિશનર જ્ઞાનેશ કુમાર વિરુદ્ધ મહાભિયોગ પ્રસ્તાવ માટે નોટિસ લાવવાનો ઈરાદો ધરાવે છે. કોંગ્રેસે આ મુદ્દે અન્ય વિપક્ષી દળોનો પણ સંપર્ક કર્યો છે. પક્ષના સૂત્રોના જણાવ્યા અનુસાર, આગામી બે અઠવાડિયામાં આ પ્રસ્તાવ રજૂ કરવામાં આવશે. કોંગ્રેસ હાલમાં આ પ્રસ્તાવનો મુસદ્દો તૈયાર કરી રહી છે અને થોડા દિવસોમાં બંને ગૃહોમાં પ્રસ્તાવ માટેની નોટિસ સબમિટ કરવામાં આવશે. નોંધનીય છે કે આવા પ્રસ્તાવ માટે નોટિસ સબમિટ કરવા માટે સંસદનું સત્ર ચાલુ હોવું જરૂરી નથી. રાહુલ ગાંધી અગાઉ જ જ્ઞાનેશ કુમારના રાજીનામાની માંગ કરી ચૂક્યા છે.
આ પહેલાં ગયા સોમવારે ચૂંટણી પંચના મુદ્દે પ્રેસ કોન્ફરન્સને સંબોધિત કરતી વખતે રાહુલ ગાંધીએ CEC જ્ઞાનેશ કુમારના રાજીનામાની માંગ કરી હતી. રાહુલ ગાંધીએ જણાવ્યું હતું કે સત્તાધારી પક્ષ વિરોધી લોકરોષ (એન્ટી-ઇન્કમબન્સી)ની અસર ભાજપ પર કેમ નથી પડતી અને પક્ષ કેવી રીતે સતત ચૂંટણીઓ જીતતો રહે છે તેનો જવાબ મળી ગયો છે.
