‘વીઆઈપી’ નેતાની રાહમાં મહિલાઓ અને સિનિયર સિટીઝનો ઝાડી-ઝાંખરામાં જવા મજબૂર, પાલિકાના વહીવટ સામે જનતામાં ભારે આક્રોશ
વડોદરા:
સંસ્કારી નગરી વડોદરાના હૃદયસમા સિયાબાગ વિસ્તાર નજીક આવેલા ઐતિહાસિક અને અતિ ધમધમતા ખંડેરાવ માર્કેટ ખાતે દરરોજ હજારોની સંખ્યામાં નાગરિકો, મહિલાઓ અને સિનિયર સિટીઝનો શાકભાજી તથા અન્ય ઘરવપરાશની ચીજવસ્તુઓની ખરીદી માટે આવે છે. આ તમામ ગ્રાહકોની સુવિધાને ધ્યાનમાં રાખીને વડોદરા મહાનગરપાલિકા દ્વારા લાખો રૂપિયાના ખર્ચે એક આધુનિક સાર્વજનિક શૌચાલયનું નિર્માણ કરવામાં આવ્યું છે. પરંતુ તંત્રની ઘોર બેદરકારી અને નેતાગીરીની લાલચોળ નીતિના કારણે આ શૌચાલય બનીને તૈયાર હોવા છતાં તેને તાળા મારી દેવામાં આવ્યા છે.
સ્થાનિક વેપારીઓ અને ખરીદી માટે આવતા ગ્રાહકોમાં ચર્ચાતી વિગતો મુજબ, પાલિકા દ્વારા કામગીરી પૂર્ણ કરી દેવાઈ હોવા છતાં કોઈ ‘મોટા નેતા’ના હાથે ઉદ્ઘાટન કરાવવાની રાહ જોવાઈ રહી હોય તેવું ચિત્ર ઊભું થયું છે. નેતાજી પાસે સમય નથી કે પછી તેમના કીમતી સમયની રાહમાં જનતાને હેરાન કરવામાં આવી રહી છે, તેવા અનેક પ્રશ્નો લોકોના મનમાં ઉદ્ભવી રહ્યા છે. જ્યાં સુધી કોઈ નેતા રિબિન ન કાપે ત્યાં સુધી લાખોના ખર્ચે બનેલી આ જાહેર સુવિધાનો ઉપયોગ જનતા ન કરી શકે, તે પાલિકા વહીવટની વરવી વાસ્તવિકતા છતી કરે છે.
આ સ્થિતિના કારણે સૌથી વધુ માઠી અસર ખરીદી માટે આવતી મહિલાઓ અને વયોવૃદ્ધ સિનિયર સિટીઝનોને ભોગવવી પડી રહી છે. ખરીદી દરમિયાન જો કોઈને કુદરતી હાજતે જવાની જરૂરિયાત ઊભી થાય, તો નવા બનેલા શૌચાલયના દરવાજે મસમોટા તાળા ઝૂલતા જોવા મળે છે. લાચારીના કારણે મહિલાઓ અને વૃદ્ધોએ નજીકમાં આવેલા ઝાડી-ઝાંખરા કે અવાવરૂ જગ્યાઓનો આશરો લેવો પડે છે. સ્વચ્છ ભારત અભિયાન અને નાગરિક સુવિધાની મોટી મોટી વાતો કરતી વડોદરા મહાનગરપાલિકાના દાવાઓ આ દ્રશ્યો જોઈને પોકળ સાબિત થઈ રહ્યા છે.
ખંડેરાવ માર્કેટમાં નિયમિતપણે આવતા ગ્રાહકો અને સ્થાનિક લોકોમાં આ મુદ્દે ભારે રોષ જોવા મળી રહ્યો છે. લોકો સવાલ ઉઠાવી રહ્યા છે કે, પ્રજાના કરવેરાના લાખો રૂપિયામાંથી બનેલી સુવિધા શું માત્ર નેતાઓના ફોટો સેશન અને ઉદ્ઘાટનની વિધિઓ માટે જ અટકાવી રાખવામાં આવશે? સામાન્ય નાગરિકોની પ્રાથમિક જરૂરિયાત કરતાં નેતાઓનો અહંકાર કે સમય વધારે મહત્વનો છે? શૌચાલયનું ઉદ્ઘાટન ક્યારે થશે અને સામાન્ય જનતા માટે આ સુવિધા ક્યારે ખુલ્લી મુકાશે, તેવા અનેક તીખા સવાલો સાથે ગ્રાહકોએ આ શૌચાલયને વહેલામાં વહેલી તકે કાર્યરત કરવાની માંગ કરી છે.
