રોહિત શેટ્ટીની લોકપ્રિય કોમેડી ફિલ્મ સિરીઝ ‘ગોલમાલ’ના ચાહકો માટે ખુશખબર છે. ‘ગોલમાલ 5’નું શૂટિંગ શરૂ થઈ ગયું છે અને આ અંગે અભિનેતા અજય દેવગને સોશિયલ મીડિયા પર ખાસ અપડેટ શેર કરી છે. તેમણે એક BTS (બિહાઇન્ડ ધ સીન) વીડિયો પોસ્ટ કર્યો છે, જેમાં ફિલ્મની ટીમ મસ્તી કરતી જોવા મળે છે. આ વીડિયો ઊટીમાં ચાલી રહેલા શૂટિંગ દરમિયાનનો છે. વીડિયોમાં ‘ગોલમાલ’નો પ્રખ્યાત ટાઇટલ ટ્રેક સંભળાય છે અને સાથે ફિલ્મની ઓળખ બની ગયેલી 5 સીટવાળી બાઇક પણ જોવા મળે છે. આ બાઇક ‘ગોલમાલ’ સિરીઝનો એક ખાસ આકર્ષણ રહી છે, જે ફરી એકવાર દર્શકોને મજા કરાવશે. અજય દેવગને વીડિયોના કેપ્શનમાં લખ્યું છે કે આ વખતે સવારી મોટી છે અને મનોરંજન તેનાથી પણ મોટું હશે. આ શબ્દોથી જ અંદાજ આવે છે કે ‘ગોલમાલ 5’ વધુ મસ્તી અને કોમેડીથી ભરપૂર હશે.
ડિરેક્ટર રોહિત શેટ્ટીએ પણ આ પ્રસંગે ફ્રેન્ચાઇઝીની 20 વર્ષની સફરને યાદ કરી. તેમણે કહ્યું કે છેલ્લા બે દાયકાથી ‘ગોલમાલ’ ટીમ પોઝિટિવ વાઇબ્સ સાથે આગળ વધી રહી છે. 2006માં શરૂ થયેલી આ સિરીઝ આજે પણ લોકોમાં એટલી જ લોકપ્રિય છે. આ વખતે ફિલ્મમાં એક ખાસ ઉમેરો થયો છે, અને તે છે અક્ષય કુમારની એન્ટ્રી. અક્ષયના આવવાથી ફિલ્મની કોમેડીનો ડોઝ વધુ મજબૂત બનશે તેવી અપેક્ષા છે. અજય દેવગણે પણ મજાકમાં કહ્યું કે અક્ષય કોઈ પણ ફ્રેન્ચાઇઝી છોડતા નથી. ફિલ્મમાં જૂના અને જાણીતા કલાકારો પણ ફરી જોવા મળશે. અરશદ વારસી, તુષાર કપૂર, સંજય મિશ્રા, શ્રેયસ તલપડે, કુણાલ ખેમુ અને જોની લીવર જેવા કલાકારો ફરી એકવાર પોતાના હાસ્યથી દર્શકોને હસાવશે. ખાસ વાત એ છે કે શરમન જોષી પણ ફરી ટીમમાં જોડાયા છે. ‘ગોલમાલ’ સિરીઝની શરૂઆત 2006માં ‘ગોલમાલ: ફન અનલિમિટેડ’થી થઈ હતી. ત્યારબાદ તેના ચાર ભાગ આવ્યા અને દરેક ફિલ્મે બોક્સ ઓફિસ પર સારો પ્રદર્શન કર્યું. હવે લગભગ 9 વર્ષ બાદ પાંચમો ભાગ આવી રહ્યો છે, જેને લઈને દર્શકોમાં ઉત્સાહ વધ્યો છે.
