દિલ્હીની રાઉઝ એવન્યુ કોર્ટે હરિયાણાના શિકોહપુર લેન્ડ ડીલ સાથે જોડાયેલા કથિત મની લોન્ડરિંગ કેસમાં કોંગ્રેસ નેતા પ્રિયંકા ગાંધીના પતિ રોબર્ટ વાડ્રાને મોટી રાહત આપી છે. કોર્ટે તેમને 50,000ના પર્સનલ બોન્ડ પર વચગાળાના જામીન મંજૂર કર્યા છે. આ કેસની આગામી સુનાવણી હવે 10 જુલાઈએ હાથ ધરાશે. કોર્ટના આ નિર્ણયને વાડ્રા માટે મહત્વપૂર્ણ રાહત તરીકે જોવામાં આવી રહ્યું છે. કોર્ટમાંથી બહાર આવ્યા બાદ રોબર્ટ વાડ્રાએ મીડિયા સાથે વાતચીતમાં એન્ફોર્સમેન્ટ ડિરેક્ટોરેટ (ED) અને કેન્દ્ર સરકાર પર આકરા પ્રહારો કર્યા હતા. તેમણે આરોપ લગાવ્યો કે ED સ્વતંત્ર રીતે કામ કરતી નથી અને સરકારના ઈશારે કાર્યવાહી કરે છે. વાડ્રાએ કહ્યું કે, તેમને દેશની ન્યાય વ્યવસ્થા પર સંપૂર્ણ ભરોસો છે, પરંતુ ED જે રીતે કાર્યવાહી કરી રહી છે તે યોગ્ય નથી. વાડ્રાએ વધુમાં દાવો કર્યો કે તેમના પરિવારને રાજકીય કારણોસર નિશાન બનાવવામાં આવી રહ્યો છે. તેમના જણાવ્યા મુજબ, જ્યારે પણ કોંગ્રેસ અથવા તેમનો પરિવાર રાજકીય રીતે મજબૂત સ્થિતિમાં આવે છે અથવા ચૂંટણીમાં સારું પ્રદર્શન કરે છે, ત્યારે તપાસ એજન્સીઓ સક્રિય થઈ જાય છે. તેમણે કહ્યું કે જો લોકો હજુ પણ તેમના પરિવારને પ્રેમ કરે છે, તો વિરોધી પક્ષ તરીકે તેમને આવી પરિસ્થિતિઓનો સામનો કરવો પડશે.
પોતાને નિર્દોષ ગણાવતા વાડ્રાએ કહ્યું કે તેમની પાસે છુપાવવા માટે કંઈ નથી અને તેઓ તપાસમાં સંપૂર્ણ સહયોગ આપશે. તેમણે પોતાને નીડર ગણાવતા કહ્યું કે કાયદાકીય પ્રક્રિયાથી તેઓ ડરતા નથી. આ સમગ્ર મામલો હરિયાણાના શિકોહપુર વિસ્તારમાં થયેલા જમીન સોદા સાથે જોડાયેલો છે. EDનો આરોપ છે કે આ સોદામાં મોટા પાયે નાણાકીય ગેરરીતિ અને મની લોન્ડરિંગ થયું હતું. તપાસ એજન્સી છેલ્લા ઘણા સમયથી આ કેસની તપાસ કરી રહી છે અને વિવિધ દસ્તાવેજો તથા નાણાકીય વ્યવહારોની તપાસ કરવામાં આવી રહી છે. આ કેસ રાજકીય રીતે પણ ખૂબ ચર્ચામાં રહ્યો છે, કારણ કે તેમાં ગાંધી પરિવાર સાથે જોડાયેલા નામો સામેલ છે. ભાજપ સતત કોંગ્રેસ પર ભ્રષ્ટાચારના આરોપ લગાવતી રહી છે, જ્યારે કોંગ્રેસ આ કાર્યવાહી ને રાજકીય બદલો ગણાવી રહી છે. હાલ કોર્ટ દ્વારા મળેલી વચગાળાની રાહત બાદ રોબર્ટ વાડ્રાને થોડો કાયદાકીય આરામ મળ્યો છે, પરંતુ કેસની તપાસ અને સુનાવણી હજુ ચાલુ રહેશે. હવે સૌની નજર 10 જુલાઈની આગામી સુનાવણી પર ટકેલી છે.
