નવી દિલ્હીઃ (New Delhi) વધુ એક કો-ઓપરેટિવ બેંક બંધ (Bank) થવા જઈ રહી છે. આ બેંક પર રિઝર્વ બેંકના (RBI) નિયમોનું પાલન ન કરવાનો આરોપ છે. આ બેંકનુ નામ છે રૂપી કો-ઓપરેટિવ બેંક લિમિટેડ (Rupee Co-operative Bank Ltd). પુણેની રૂપી કો-ઓપરેટિવ બેંકના ગ્રાહકો પાસે 22 સપ્ટેમ્બર 2022 સુધી સમય છે. મતલબ કે તે તારીખ પછી ગ્રાહક બેંકમાં જમા કરેલા પૈસા ઉપાડી શકશે નહીં.
- દેશમાં વધુ એક કો-ઓપરેટિવ બેંક બંધ થવા જઈ રહી છે
- બેંક પર રિઝર્વ બેંકના નિયમોનું પાલન ન કરવાનો આરોપ છે
- 22 સપ્ટેમ્બર 2022 પછી ગ્રાહક બેંકમાં જમા કરેલા પૈસા ઉપાડી શકશે નહીં
આ રિઝર્વ બેંકની સામાન્ય પ્રક્રિયા છે
રિઝર્વ બેંક ઓફ ઈન્ડિયા દેશની ઘણી બેંકો પર નિયમોનું પાલન ન કરવા બદલ સમયાંતરે દંડ ફટકારતી રહે છે. જો નિયમોની અવગણના કરવામાં આવે તો કેટલીક બેંકોના લાઇસન્સ રદ કરવામાં આવે છે. હવે આ યાદીમાં પુણેની રૂપી કો-ઓપરેટિવ બેંકનું નામ જોડાઈ ગયું છે.
લોકો રૂપિયા ઉપાડી શકશે નહીં
આરબીઆઈએ 10 ઓગસ્ટના રોજ જારી એક પ્રેસ રિલીઝમાં આ માહિતી આપી હતી. એવું કહેવામાં આવ્યું હતું કે પુણેની રૂપી કો-ઓપરેટિવ બેંક લિમિટેડનું લાઇસન્સ તે તારીખથી છ અઠવાડિયા પછી રદ કરવામાં આવશે. મતલબ કે આ સમયમર્યાદા 22 સપ્ટેમ્બર 2022 સુધી છે. તે પછી બેંકની તમામ શાખાઓ બંધ થઈ જશે અને ગ્રાહકો તેમના પૈસા ઉપાડી શકશે નહીં. આ પહેલા પણ ઘણી બેંકોની ખરાબ આર્થિક સ્થિતિને જોતા તેમના લાઇસન્સ રદ કરવામાં આવ્યા છે.
લાઇસન્સ કેમ રદ કરવામાં આવ્યું?
આરબીઆઈએ પુણે સ્થિત રૂપી કો-ઓપરેટિવ બેંક લિમિટેડને બંધ કરવાનો નિર્ણય લીધો છે. કારણ કે આ બેંકની નાણાકીય સ્થિતિ ખૂબ જ ખરાબ થઈ ગઈ છે. બેંક પાસે કોઈ મૂડી બચી ન હતી. વળી તેની પાસે કમાવાનું કોઈ સાધન નહોતું. આવી સ્થિતિમાં આરબીઆઈએ જ આ બેંકનું લાઇસન્સ રદ કરી દીધું છે.
બેંકમાં પૈસા જમા કરાવનારા ગ્રાહકોનું શું થશે
રૂપી સહકારી બેંક લિમિટેડમાં જેમના નાણા જમા છે તેવા ગ્રાહકોને 5 લાખ રૂપિયાની થાપણો પર વીમા કવચ મળે છે. આ વીમો ડિપોઝિટ ઇન્સ્યોરન્સ અને ક્રેડિટ ગેરંટી કોર્પોરેશન (DICGC) વીમા યોજનામાંથી આવે છે. જણાવી દઈએ કે ડીઆઈસીજીસી, રિઝર્વ બેંકની પેટાકંપની, સહકારી બેંકના ગ્રાહકોને નાણાકીય સુરક્ષા પૂરી પાડે છે. આવી સ્થિતિમાં ખાતાધારકની 5 લાખ રૂપિયાની ડિપોઝિટ પર DICGC તેને સંપૂર્ણ વીમાનું કવચ આપે છે. જે ગ્રાહકોએ તે બેંકમાં રૂ. 5 લાખથી વધુ જમા કરાવ્યા છે તેમને તેમની સંપૂર્ણ રકમ મળશે નહીં. તેમને માત્ર 5 લાખ રૂપિયા સુધી જ વળતર આપવામાં આવશે.
