મણિપુર: મણિપુરમાં (Manipur) મહિલાઓને કપડાં ઉતારીને રસ્તા (Road) પર ફેરવવાના કેસમાં ત્યાંની સ્થિતિ વધુ તંગ બની ગઈ છે. શનિવારે આ ઘટનાને લઈને ઈમ્ફાલના ગારી વિસ્તારમાં મહિલાઓએ જોરદાર વિરોધ (Protest) કર્યો હતો. શનિવારે ઘણાં વિસ્તારોમાં ટાયર સળગાવી આગ ચાંપવામાં આવી હતી. આ દરમિયાન તેમનું પોલીસ સાથે ઘર્ષણ થયું હતું. પોલીસ અને સેના આ વિસ્તારમાં માર્ચ કરી રહી છે.
આ કેસમાં ગુસ્સે ભરાયેલા ટોળાએ શુક્રવારે એક આરોપીનું ઘર પણ સળગાવી દીધું હતું. આ સાથે જ મહિલાઓ પર બળાત્કાર કરનાર અન્ય એક આરોપીની ધરપકડ કરવામાં આવી છે. પોલીસે અત્યાર સુધીમાં 5 લોકોની ધરપકડ કરી છે. મળતી માહિતી મુજબ 19 જુલાઈના રોજ મહિલાઓની દરિંગડીનો વીડિયો સામે આવ્યો હતો. 24 કલાકની અંદર પોલીસે આરોપી હુઈરેમ હેરદાસ, અરુણ સિંહ, જીવન ઈલાંગબમ અને તોમ્બા સિંહની ધરપકડ કરી લીધી હતી. તમામ થૌબલ જિલ્લાના રહેવાસી છે. હવે પોલીસે શનિવારે નોંગપોક સેકમાઈ અવાંગ લિકાઈના રહેવાસી પાંચમા આરોપી યમલેમ્બમ નુંગસિથોઈ મેઈતેઈ (19 વર્ષ)ની ધરપકડ કરી છે.
મણિપુર પોલીસના જણાવ્યા અનુસાર વાયરલ વીડિયોની મદદથી બાકીના આરોપીઓની ઓળખ કરી લેવામાં આવી છે અને તેમની ધરપકડ કરવામાં આવી છે. મણિપુર પોલીસ અને કેન્દ્રીય દળોની 12 સંયુક્ત ટીમો વધુ 12 શંકાસ્પદ લોકોની ધરપકડ કરવા માટે સર્ચ ઓપરેશન ચલાવી રહી છે.
પીસ એકોર્ડ MNF રિટર્નીઝ એસોસિએશન (PAMRA) એ જણાવ્યું હતું કે, “મિઝોરમમાં પરિસ્થિતિ તંગ બની છે. મણિપુરમાં બદમાશો દ્વારા આચરવામાં આવેલા બર્બર અને જઘન્ય કૃત્યોને કારણે મણિપુરના મેઇતેઇ લોકો માટે મિઝોરમમાં રહેવું હવે સુરક્ષિત નથી. સંસ્થા તેમને સલામતીના પગલા તરીકે તેમના વતન પરત જવાની અપીલ કરે છે.
મહિલાઓ સાથે ક્રૂરતાનો મામલો શું છે?
પોલીસે કુકી સમુદાય વિરુદ્ધ 4મી જૂને આસપાસની મહિલાઓની ફરિયાદમાં એફઆઈઆર નોંધી હતી. બપોરે 3 કલાકે 800-1000 લોકો બી.ફેનોમ ગામમાં ધૂસી આવ્યા હતા. તેઓએ ગામમાં તોડફોડ કરી, મિલકતો લૂંટી અને ઘરોમાં આગ ચાંપી દીધી હતી. આ દરમિયાન પાંચ લોકો પોતાને બચાવવા જંગલમાં ભાગી ગયા. જેમાં બે પુરૂષ અને ત્રણ મહિલાઓનો સમાવેશ થાય છે. તેમાં 56 વર્ષીય પુરુષ, તેનો 19 વર્ષનો પુત્ર અને 21 વર્ષની પુત્રી ઉપરાંત 42 વર્ષીય અને 52 વર્ષની મહિલાઓનો સમાવેશ થાય છે.
આ દરમ્યાન એક ટોળાએ 56 વર્ષના એક વ્યક્તિની હત્યા કરી હતી. અને પછી ત્રણ મહિલાઓના કપડા ઉતારી દેવામાં આવ્યા હતા. ભીડમાંથી કેટલાક લોકોએ 21 વર્ષની યુવતી સાથે ગેંગરેપ કર્યો હતો. જ્યારે યુવતીના નાના ભાઈએ વિરોધ કર્યો તો ભીડે તેને પણ મારી નાખ્યો. દરમિયાન એક મહિલા ભાગી ગઈ હતી. જોકે ટોળાએ બાકીની બે મહિલાઓને નગ્ન કરીને રસ્તા પર ઉતારી હતી અને એક ખેતરમાં લઈ જઈને છોડી દીધી હતી.
3 મેના રોજ મણિપુરમાં હિંસા તરફ દોરી જતા અઢી મહિનામાં 150 થી વધુ લોકોના મોત થયા હતા, જ્યારે કુકી સમુદાયે અનુસૂચિત જનજાતિ (ST) માં સમાવેશ કરવાની મેઇતેઈ સમુદાયની માંગનો વિરોધ કરવા પહાડી જિલ્લાઓમાં ‘આદિવાસી એકતા કૂચ’ કાઢી હતી. આ હિંસામાં અત્યાર સુધીમાં 150થી વધુ લોકોએ જીવ ગુમાવ્યા છે. 4 મેના રોજ ટોળાએ આ મહિલાઓ પર અત્યાચાર ગુજાર્યો હતો. મણિપુરની વસ્તી મીતેઈ સમુદાયના લગભગ 53 ટકા છે. તેઓ મોટે ભાગે ઇમ્ફાલ ખીણમાં રહે છે. જ્યારે કુકી અને નાગા આદિવાસીઓ 40 ટકા હિસ્સો ધરાવે છે અને મોટે ભાગે પહાડી જિલ્લાઓમાં રહે છે.
