સ્વર્ગસ્થ ઉદ્યોગપતિ સંજય કપૂરના પરિવાર સાથે જોડાયેલા કરોડો રૂપિયાના એસ્ટેટ વિવાદમાં હવે નવો અને મહત્વપૂર્ણ વળાંક આવ્યો છે. સંજય કપૂરની 80 વર્ષીય માતા રાની કપૂરે સુપ્રીમ કોર્ટમાં નવી અરજી દાખલ કરી છે, જેમાં તેમની પુત્રવધૂ પ્રિયા સચદેવ કપૂર અને અન્ય લોકો સામે ગંભીર આરોપો લગાવવામાં આવ્યા છે. રાની કપૂરે કોર્ટને વિનંતી કરી છે કે, કોર્ટ દ્વારા શરૂ કરાયેલી મધ્યસ્થી પ્રક્રિયા પૂર્ણ ન થાય ત્યાં સુધી પ્રિયા સચદેવ કપૂર અને અન્ય પક્ષોને આરકે ફેમિલી ટ્રસ્ટના કામકાજમાં દખલ કરતા રોકવામાં આવે. આ મામલો હાલમાં સુપ્રીમ કોર્ટની દેખરેખ હેઠળ મધ્યસ્થીમાં છે. સુપ્રીમ કોર્ટે 7 મેના રોજ આ કેસ મધ્યસ્થી માટે મોકલ્યો હતો અને પૂર્વ ચીફ જસ્ટિસ ડીવાય ચંદ્રચુડને મધ્યસ્થી તરીકે નિયુક્ત કર્યા હતા. હવે રાની કપૂરની નવી અરજી બાદ મામલો વધુ ગંભીર બન્યો છે.
રાની કપૂરે 18 મેના રોજ યોજાનારી રઘુવંશી ઇન્વેસ્ટમેન્ટ પ્રાઇવેટ લિમિટેડની બોર્ડ મીટિંગ પર પણ સ્ટે મૂકવાની માંગ કરી છે. આ કંપની વિવાદિત ફેમિલી એસ્ટેટનો મોટો હિસ્સો સંભાળે છે. અરજીમાં આરોપ લગાવવામાં આવ્યો છે કે આ બેઠકનો હેતુ બોર્ડમાં નવા ડિરેક્ટરોની નિમણૂક કરવાનો છે, જેનાથી ટ્રસ્ટના નિયંત્રણમાં ફેરફાર થઈ શકે છે. રાની કપૂર તરફથી હાજર રહેલા વકીલે સુપ્રીમ કોર્ટમાં વહેલી સુનાવણીની માંગ કરી હતી. ત્યારબાદ મુખ્ય ન્યાયાધીશ જે.બી. પારડીવાલાની આગેવાની હેઠળની બેન્ચે 14 મેના રોજ સુનાવણી નક્કી કરી. સુનાવણી દરમિયાન કોર્ટે પણ આ કેસની ગંભીરતા અંગે નોંધપાત્ર ટિપ્પણી કરી હતી. બેન્ચે કહ્યું કે, ‘અમે એવા ક્ષેત્રમાં પ્રવેશ કર્યો છે જ્યાં મહાભારત પણ નાનું લાગશે.’ કોર્ટની આ ટિપ્પણી બાદ કેસ વધુ ચર્ચામાં આવી ગયો છે.
આ આખો વિવાદ સંજય કપૂરના અવસાન બાદ તેમની વિશાળ સંપત્તિ અને ફેમિલી ટ્રસ્ટના નિયંત્રણને લઈને શરૂ થયો છે. અંદાજે 30,000 કરોડથી વધુની સંપત્તિ પર પરિવારના સભ્યો વચ્ચે કાનૂની ઘર્ષણ ચાલી રહ્યું છે. રાની કપૂરે અગાઉ પણ ‘આરકે ફેમિલી ટ્રસ્ટ’ને ગેરકાયદેસર અને છેતરપિંડી આધારિત ગણાવ્યો હતો. તેમણે આરોપ લગાવ્યો હતો કે તેમની જાણ વગર ટ્રસ્ટ દ્વારા મિલકતનું નિયંત્રણ કરવામાં આવી રહ્યું છે. બીજી તરફ પ્રિયા સચદેવ કપૂરે આ તમામ આરોપોને ફગાવી દીધા છે. સંજય કપૂર જાણીતા ઉદ્યોગપતિ અને પોલો ખેલાડી હતા. તેમણે દૂન સ્કૂલમાં અભ્યાસ કર્યો હતો અને બાદમાં વિદેશમાં બિઝનેસ સ્ટડીઝ કરી હતી. તેમના પિતા સુરિન્દર કપૂરે સોના ગ્રુપની સ્થાપના કરી હતી, જેને સંજયે વૈશ્વિક સ્તરે આગળ વધાર્યું હતું. સંજય કપૂર સોના કોમસ્ટાર કંપનીના ચેરમેન પણ હતા, જે ઇલેક્ટ્રિક વાહનો માટેના પાર્ટ્સ બનાવે છે. તેમની કંપનીનું મૂલ્ય લગભગ 3.6 બિલિયન ડોલર હોવાનું કહેવાય છે.
સંજયના અંગત જીવનની વાત કરીએ તો, તેમના ત્રણ લગ્ન થયા હતા. પહેલી પત્ની નંદિતા મહતાનીથી તેમને કોઈ સંતાન નહોતું. બીજી પત્ની અભિનેત્રી કરિશ્મા કપૂરથી તેમને સમાયરા અને કિયાન નામના બે બાળકો છે. ત્રીજી પત્ની પ્રિયા સચદેવથી તેમને એક સંતાન છે. ઉપરાંત સંજયે પ્રિયાના પહેલા લગ્નથી થયેલી પુત્રી સફિરાને પણ દત્તક લીધી હતી. સંજય કપૂરનું 12 જૂન 2025ના રોજ યુકેમાં પોલો રમતી વખતે અવસાન થયું હતું. શરૂઆતમાં અહેવાલ આવ્યા હતા કે એક મધમાખી મોંમાં ઘૂસતા તેમને હાર્ટ એટેક આવ્યો હતો. જોકે બાદમાં પ્રિયા સચદેવે ખુલાસો કર્યો હતો કે સંજય લાંબા સમયથી ડાબા વેન્ટ્રિક્યુલર હાઇપરટ્રોફી (LVH) જેવી હૃદય સંબંધિત બીમારીથી પીડાતા હતા. હવે સંજય કપૂરની વિશાળ સંપત્તિ અને ફેમિલી ટ્રસ્ટના નિયંત્રણને લઈને પરિવારની અંદરની લડાઈ કોર્ટ સુધી પહોંચી ગઈ છે, જેના પર સમગ્ર બિઝનેસ અને ફિલ્મ જગતની નજર ટકેલી છે.
