ટીએમસીના કોંગ્રેસમાં વિલીનીકરણ અંગે ચર્ચા આગળ વધી છે. એવું લાગે છે કે મમતા બેનર્જી સોનિયા ગાંધી દ્વારા કરવામાં આવેલી ઓફર સ્વીકાીરી છે, જોકે તેમણે અભિષેક બેનર્જી દ્વારા રાહુલ ગાંધીને કેટલીક શરતો જણાવી છે.
સૂત્રોના જણાવ્યા અનુસાર અભિષેક બેનર્જીએ રાહુલ ગાંધી સાથેની મુલાકાત દરમિયાન આ બાબતે ચર્ચા કરી હતી. ટીએમસી નેતાએ માંગ કરી હતી કે મમતા બેનર્જીને રાજ્યસભામાં મોકલવામાં આવે અને વધુમાં ઉપલા ગૃહમાં વિરોધ પક્ષના નેતા તરીકે નિયુક્ત કરવામાં આવે. જોકે આ માંગણીઓ પર કોંગ્રેસ પાર્ટીનો પ્રતિભાવ હજુ સુધી જાહેર કરવામાં આવ્યો નથી.
સોનિયા ગાંધીએ પોતે ઓફર કરી હતી
સોનિયા ગાંધીએ ટીએમસીના કોંગ્રેસમાં વિલીનીકરણનો પ્રસ્તાવ મૂકવા માટે મમતા બેનર્જીને વ્યક્તિગત રીતે ફોન કર્યો હતો. સૂત્રો સૂચવે છે કે સોનિયા ગાંધીએ વિલીનીકરણનું સૂચન કર્યું હતું, જેના બદલામાં મમતાને કોંગ્રેસના રાષ્ટ્રીય ઉપાધ્યક્ષનું પદ ઓફર કરવામાં આવ્યું હતું. વધુમાં તેમના ભત્રીજા અને સાંસદ અભિષેક બેનર્જીને પાર્ટીના મહાસચિવ તરીકે નિયુક્ત કરવામાં આવશે.
મમતા બેનર્જીએ નિર્ણય લેવા માટે સમય માંગ્યો
કોંગ્રેસ સંસદીય દળના નેતાએ પ્રસ્તાવ મૂક્યો કે TMC પર ભાજપના રાજકીય હુમલાઓને ધ્યાનમાં રાખીને મમતા બેનર્જીએ તેમના પક્ષનું કોંગ્રેસમાં વિલીનીકરણ કરવું જોઈએ નહીં તો BJP તેમને આમ આદમી પાર્ટીની જેમ હેરાન કરી શકે છે. તેમણે એમ પણ નિર્દેશ કર્યો કે TMCમાં અભિષેક બેનર્જી સામે આંતરિક અસંતોષે તેમના માટે પરિસ્થિતિ મુશ્કેલ બનાવી દીધી છે. મમતા બેનર્જીએ પ્રસ્તાવ પર વિચાર કરવા માટે થોડા દિવસોનો સમય માંગ્યો હતો.
રાહુલ-અભિષેકની મુલાકાત 90 મિનિટ ચાલી
TMCના વડા મમતા બેનર્જીએ કોંગ્રેસ સંસદીય દળના અધ્યક્ષ સોનિયા ગાંધીને બે દિવસમાં (8 અને 9 જૂન) તેમના નિવાસસ્થાન, 10 જનપથ ખાતે બે વાર મળ્યા પછી TMC-કોંગ્રેસના વિલીનીકરણ અંગેની અટકળોએ જોર પકડ્યું. આ મુલાકાતો ઉષ્માભરી રહી હતી. ત્યારબાદ આજે રાહુલ ગાંધી અને અભિષેક બેનર્જી વચ્ચે પણ એક મુલાકાત થઈ. સૂત્રોના જણાવ્યા અનુસાર 10 જનપથ ખાતે રાહુલ ગાંધી અને અભિષેક બેનર્જી વચ્ચેની મુલાકાત લગભગ દોઢ કલાક ચાલી હતી.
મમતા પાસે હવે ફક્ત 22 ધારાસભ્યો અને 19 સાંસદો
TMC પાસે મૂળ 28 લોકસભા સાંસદો હતા, જેમાંથી 20 અલગ થઈ ગયા છે. મમતા પાસે હવે લોકસભામાં ફક્ત 8 સાંસદો બાકી છે. રાજ્યસભાની વાત કરીએ તો 13 સાંસદોમાંથી બેએ રાજીનામું આપ્યું છે, જેનાથી ફક્ત 11 સાંસદો બાકી છે. વિધાનસભાની વાત કરીએ તો તાજેતરની ચૂંટણીઓમાં TMCએ 80 બેઠકો જીતી હતી પરંતુ ત્યારથી 58 ધારાસભ્યોએ એક અલગ જૂથ બનાવ્યું છે જેનાથી મમતા પાસે ફક્ત 22 ધારાસભ્યો બાકી છે.
